នៅថ្ងៃនេះ មានសេចក្តីរាយការណ៌ថ្មីមួយបាននិយាយពីក្រុមហ៊ុន Sony Semiconductor Manufacturing ដោយបានលើកឡើងថា ក្រុមហ៊ុនបច្ចេកវិទ្យាយក្សរបស់ជប៉ុន និងជាអ្នកផលិតសិនស័រកាមេរ៉ាដ៏ធំរបស់ពិភពលោកមួយនេះ បាននាំចេញនូវសិនស័រកាមេរ៉ារបស់ខ្លូនបានជាង 20 ពាន់លានសិនស័រ។ សូមជំរាបថា ក្រុមហ៊ុន Sony បានចាប់ផ្តើមផលិតសិនស័រកាមេរ៉ានេះតាំងពីឆ្នាំ 1980s មកម្លេះ។

យោងតាមការបញ្ជាក់របស់លោក Yoshihiro Yamaguchi ដែលជាអគ្គនាយកក្រុមហ៊ុន Sony ប្រាប់ទៅកាន់សារព័ត៌មាន Nikkei Asia បាននិយាយថា ដោយសារតែការកើនឡើងនៃតម្រូវការរបស់ផលិតផលបច្ចេកវិទ្យាចល័ត បានធ្វើអោយការនាំចេញសិនស័រ កាមេរ៉ានេះ មានការកើនឡើងទ្វេរដង គិតចាប់តាំងពីឆ្នាំ 2019 មកដល់ឆ្នាំ 2024 នេះ។ លោកបានបន្តថា កំណើនយ៉ាងឆាប់រហ័សនេះ គឺដោយសារតែតម្រូវការប្រើប្រាស់សិនស័រកាមេរ៉ានៅលើស្មាតហ្វូនមានហក់ឡើងខ្ពស់លឿន។ លោកបន្ថែមថា កាលពីឆ្នាំ 2016-2017 ស្មាតហ្វូននេះដែលមានកាមេរ៉ាក្រោយភ្លោះ ចាប់ផ្តើមបង្ហាញវត្តមាននៅលើទីផ្សារ ហើយមកដល់ពេលនេះ ស្មាតហ្វូននីមួយៗ គឺមានកាមេរ៉ាដល់ទៅ 4 គ្រាប់ឯណោះ។

អគ្គនាយកក្រុមហ៊ុន Sony រូបនេះ បាននិយាយថា មកដល់ពេលនេះ សង្វាក់ផលិតកម្មទៅលើសិនស័រនេះ គឺមាន 3 កន្លែង រួមមានដូចជា រោងចក្រនៅ Kumamoto, Nagasaki និង Oita។ លោកបន្តថា Nagasaki និង Oita គឺជារោងចក្រដែលមានការផ្តោតទៅលើការផលិត ISP សម្រាប់ស្មាតហ្វូន និងផលិតផលយានយន្តជាច្រើនដូចជា ផលិតផលឆ្លាតវៃ, Smart factories, smart ICT cameras, laser devices ហើយនិង កាមេរ៉ាសម្រាប់ data centers ផងដែរ។