ក្រុមហ៊ុន Suzuki Motor Corp បានប្រកាសកាលពីដើមសប្តាហ៍នេះថា រថយន្តដំណើរការដោយថាមពលអគ្គិសនីសុទ្ធដំបូងរបស់ខ្លួន នឹងបង្ហាញខ្លួនផ្លូវការណ៍នៅប្រទេសជប៉ុននាថ្ងៃទី 16 ខែមករា ឆ្នាំ 2026។ ហើយរថយន្តអគ្គិសនីដំបូងរបស់ Suzuki គឺមានឈ្មោះថា Suzuki eVitara ដែលជាប្រភេទឡាន SUV។

eVitara នឹងត្រូវបាននាំចេញពីរោងចក្រផលិតរបស់ Suzuki នៅក្នុងប្រទេសឥណ្ឌា ទៅកាន់ទៅផ្សារបណ្តាប្រទេសជាង 100 នៅទូទាំងពិភពលោក។ រថយន្តអគ្គិសនីដំបូងរបស់ Suzuki នឹងមានតម្លៃចាប់ពីខ្ទង់ 3.99 លានយ៉េន ឬស្មើរនឹងប្រមាណ $27,000។ Suzuki eVitara អាចជិះបានចម្ងាយផ្លូវជាង 430 គីឡូម៉ែត្រ នៅពេលសាកភ្លើងពេញម្តង។

ប្រធានក្រុមហ៊ុន Suzuki លោក Toshihiro Suzuki បាននិយាយនៅក្នុងសន្និសីទសារព័ត៌មានមួយថា "យើងនឹងចូលទៅក្នុងទីផ្សាររថយន្តអគ្គិសនីជាមួយនឹងម៉ូដែល eVitara ហើយយើងសង្ឃឹមថានឹងបន្តបញ្ចេញរថយន្ត EV ដែលសមស្របបំផុតសម្រាប់ទីផ្សារនីមួយៗ ដើម្បីបំពេញតម្រូវការប្រើប្រាស់ក្នុងចំណោមអតិថិជនរបស់យើង"។ Suzuki eVitara ត្រូវបានដាក់បង្ហាញជាលើកដំបូងនៅក្នុងប្រទេសអ៊ីតាលីក្នុងខែវិច្ឆិកា ឆ្នាំ 2024 ដោយការបញ្ជាទិញមុនបានចាប់ផ្តើមរួចហើយនៅក្នុងទ្វីបអឺរ៉ុប។ Suzuki បាននិយាយថា "EVs អាចនឹងក្លាយទៅជាស្តង់ដារនាពេលអនាគត" ។

កាលពីខែមុននេះ Suzuki បានធ្វើប្រារព្ធពិធីមួយនៅរដ្ឋ Gujarat ប្រទេសឥណ្ឌា ក្នុងការដាក់បង្ហាញជាសារធារណៈនៅរថយន្ត eVitara SUV ដែលមានការចូលរួមពីប្រធានក្រុមហ៊ុន Suzuki និងនាយករដ្ឋមន្ត្រីឥណ្ឌា Narendra Modi។ រថយន្តនេះត្រូវបានគេរំពឹងថា នឹងមានការនាំចេញក្នុងទ្រង់ទ្រាយធំបំផុតសម្រាប់រថយន្តអគ្គិសនីពីប្រទេសឥណ្ឌា។ កាលពីដើមឆ្នាំ 2026 នេះ Suzuki បាននិយាយថា ខ្លួនគ្រោងនឹងវិនិយោគលើទំហំទឹកប្រាក់ប្រមាណ 4 ពាន់ពាន់លានយ៉េន រហូតដល់បញ្ចប់បញ្ចីសារពើពន្ធក្នុងឆ្នាំ 2030 សម្រាប់ការអភិវឌ្ឍន៍រថយន្តអគ្គិសនី៕