កាលពីពេលថ្មីៗនេះ ក្រុមហ៊ុនផលិតរថយន្តជប៉ុន Toyota បានធ្វើការបង្ហាញចេញរថយន្ត Toyota Highlander ស៊េរីឆ្នាំ 2025 ម៉ូដែលពិសេសគម្រប់ខួប 25 ឆ្នាំ ដែលហៅថា 2025 Toyota Highlander 25th Edition ដែលការផលិតមានកំនត្រឹមតែ 2,500 គ្រឿង និងសម្រាប់តែម៉ូដែលបំពាក់នៅម៉ាស៊ីន Hybrid តែប៉ុណ្ណោះ។

សម្រាប់ការឌីស្សាញរបស់ Toyota Highlander ម៉ូដែលពិសេសគម្រប់ខួប 25 ឆ្នាំនេះ គឺមានការកែប្រែបន្ថែមនៅប្រណិតភាពខុសពីម៉ូដែលធម្មតាដូចជា ការតុបតែងលម្អសោភ័ណ្ឌភាពផ្នែកខាងក្នុង និងក្រៅផ្តាច់មុខ ជាមួយនឹងការបំពាក់យ៉ាន់កង់ទំហំ 20-inch ដែលមានការរចនាជាមួយពណ៌ទឹកប្រាក់ដូចគ្នានឹងម៉ូដែល XSE ដែរ ខុសពីម៉ូដែលផ្សេងទៀតដែលមានយ៉ាន់ពណ៌ខ្មៅ។ បន្ថែមពីនេះ 2025 Toyota Highlander 25th Edition មានការបំពាក់នូវដែកក្រូមមួយជុំរថយន្តតែដូចជាជុំវិញផ្នែកប៉ាណាមុខ កញ្ចក់ទ្វារ និងផ្នែកខាងក្រោយជាមួយការរំលេចនូវកំនត់សំគាល់ម៉ូដែលខួប Highlander 25th Edition ផងដែរ។

រថយន្ត full-sized SUV ម៉ូដែលពិសេសរបស់ជប៉ុនមួយនេះមានជម្រើសពីរពណ៌ដែលជាពណ៌ថ្មីសម្រាប់ម៉ូដែល Highlander ឆ្នាំ 2025 គឺពណ៌ស ហៅថា Wind Chill Pearl white និងពណ៌ប្រផេះ ហៅថា Heavy Metal gray។ Highlander 25th Edition បំពាក់នូវម៉ាស៊ីន Hybrid ចំនុះ 2.5-liter ជាប្រភេទ inline-four engine ដែលអាចផលិតកំលាំងបាន 243 សេះ និងកម្រិតស៊ីសាំង 35mpg ឬប្រហែល 6.7 លីត្រក្នុង 100 គីឡូម៉ែត្រ។ ម៉ាស៊ីន Hybrid របស់ Toyota Highlander 2025-25th Edition មានជំនួយបន្ថែមពីម៉ូទ័រអគ្គិសនីប្រភេទ permanent-magnet motors ចំនួន 3 ហើយនឹងដំណើរការបើកបរដោយប្រព័ន្ធប៉ុងពីរ ឬ all-wheel-drive។

2025 Toyota Highlander 25th Edition មានជម្រើសកៅអីចំនួន 7 កៅអី, បំពាក់នូវប្រព័ន្ធបំពងសំឡេងម៉ាក JBL ចំនួន 11 គ្រាប់, អេក្រង់បង្ហាញព័ត៌មាន និងអេក្រង់កម្សាន្តទំហំ 12.3-inch ដូចគ្នា ក៏ដូចជាប្រព័ន្ធកាមេរ៉ា 360 ដឺក្រេជាដើម។ រថយន្តម៉ូដែលពិសេស Highlander 25th Edition នឹងមានលក់នៅតាមហាងដែលជាដៃគូចែកចាយនៅក្នុងខែវិច្ឆិកា ឆ្នាំ 2024។ យ៉ាងណាមិញសម្រាប់តម្លៃក្រុមហ៊ុនមិនទាន់បានប្រកាសនៅឡើយទេ ប៉ុន្តែ មានការប៉ាន់ស្មានថា រថយន្តម៉ូដែលពិសេសនេះអាចមានតម្លៃចាប់ជាង $50,000។

សូមបញ្ជាក់ថា រថយន្ត Unibody SUV ដំបូងរបស់ Toyota គឺ Highlander ត្រូវបានក្រុមហ៊ុនធ្វើការប្រកាសបង្ហាញចេញនៅក្នុងព្រឹត្តិការណ៍ New York Auto Show កាលពីឆ្នាំ 2000។ Toyota Highlander គឺជារថយន្ត SUV ដ៏មានប្រជាប្រិយភាព និងភាពធន់ខ្លាំងបំផុតសម្រាប់ការប្រើប្រាស់។ ហើយមកទល់នឹងពេលបច្ចុប្បន្ន Toyota លក់រថយន្ត Highlander បានចំនួន 3.6 លានគ្រឿងរួចនៅទីផ្សារសហរដ្ឋអាមេរិក៕