ក្រុមហ៊ុនបច្ចេកវិទ្យាខ្នាតយក្សរបស់ប្រទេសចិន Xiaomi ត្រូវបានគេរាយការណ៍ថា កំពុងរៀបចំពង្រីកដែនទីផ្សារអាជីវកម្មរថយន្តអគ្គិសនីរបស់ខ្លួនទៅកាន់ទីផ្សារប្រទេសមួយចំនួនផ្សេងនៅឯនាយសមុទ្ទ បន្ទាប់ពីជោគជ័យនៅទីផ្សារក្នុងស្រុក។ ក្រុមហ៊ុន Xiaomi បានធ្វើការប្រកាសចេញរថយន្តអគ្គិសនីដំបូងរបស់ខ្លួនម៉ូដែល Xiaomi SU7 ដែលជារថយន្ត Sedan នៅទីផ្សារប្រទេសចិន ហើយក្រុមហ៊ុននេះត្រៀមខ្លួនរួចរាល់ក្នុងការប្រកាសចេញរថយន្តម៉ូដែលទីពីររបស់ខ្លួន គឺ YU7 ដែលជាប្រភេទរថយន្ត Crossover-SUV នៅឆ្នាំក្រោយនេះ។

ក្រុមហ៊ុនត្រូវបានគេរាយការណ៍ថា កំពុងប្រមូលផ្តុំក្រុមការងារដែលខិតខំប្រឹងប្រែងដើម្បីដឹកនាំការលក់រថយន្តនៅលើទីផ្សារអន្តរ ជាតិរបស់ខ្លួន ដោយផ្តោតលើការស្រាវជ្រាវទីផ្សារ ការគ្រប់គ្រងគម្រោង និងការគាំទ្រផ្តល់សេវាកម្មថែទាំបន្ទាប់ពីការលក់។ យោងតាមរបាយការណ៍ Xiaomi នឹងចាប់ផ្តើមជាមួយនឹងការលក់ជាផ្នែកក្រុមតូចៗនៅក្នុងតំបន់ដែលបានជ្រើសរើស។ ដោយប្រើបណ្តាញដែលមានស្រាប់នៃហាងរបស់ Xiaomi ជាង 100 នៅទូទាំងពិភពលោក ក្រុមហ៊ុននឹងអាចធ្វើការវាស់ស្ទង់ការឆ្លើយតបតម្រូវការទីផ្សារ និងកែសម្រួលវិធីសាស្រ្តរបស់ខ្លួនមុនពេលចាប់ផ្តើមដំណើរការពេញលេញ។

រថយន្តអគ្គិសនីដំបូងរបស់ Xiaomi គឺជាម៉ូដេល SU7 ដែលមានជម្រើសដូចជា SU7, SU7 Pro, SU7 Max និង SU7 Ultra។ rរថយន្តអគ្គិសនីដំបូងរបស់ Xiaomi បានបង្ហាញខ្លួនលើកដំបូងក្នុងប្រទេសចិនក្នុងខែមីនាជាមួយនឹងតម្លៃចាប់ពីខ្ទង់ប្រហែល $27,864។ ថ្មីៗនេះ ក្រុមហ៊ុនបានប្រកាសថា ខ្លួនបាននាំចេញរថយន្ត SU7 បានលើសចំនួនគោលដៅដែលបានកំណត់ក្នុងឆ្នាំ 2023 របស់ខ្លួនចំនួន 100,000 គ្រឿង និងកំណត់គោលដៅនាំចេញថ្មីចំនួន 130,000 គ្រឿងសម្រាប់ឆ្នាំ 2024។

ក្នុងអំឡុងពេលព្រឹត្តិការណ៍ពិសេសមួយនៅទីក្រុងប៉ារីស នាយកប្រតិបត្តិ Xiaomi លោក Lei Jun បានបង្ហាញពីមហិច្ឆតាក្នុងការលក់រថយន្តម៉ាក Xiaomi នៅទីផ្សារអឺរ៉ុបឲ្យបានមុនឆ្នាំ 2030។ ស្របពេលដែលរថយន្តអគ្គិសនីម៉ូដែលទីពីរ គឺ Xiaomi YU7 ត្រូវបានគេរាយការណ៍ថា នឹងបង្ហាញវត្តមាននៅលើទីផ្សារជាផ្លូវការណ៍នៅរវាងខែមិថុនា ឬខែកក្តដា ឆ្នាំ 2025។ រថយន្ត Crossover ម៉ូដែលថ្មីទីពីររបស់ Xiaomi នឹងមានតម្លៃចាប់ពីខ្ទង់ $34,000 ឡើងទៅ៕