ក្រុមហ៊ុន Xiaomi ត្រូវគេរំពឹងថា នឹងមានការបង្ហាញចេញនូវស្មាតហ្វូនជំនាន់ថ្មីរបស់ខ្លួនម៉ូដែល Xiaomi 15 និង Xiaomi 15 Pro នៅចុងខែតុលា ឬដើមខែកញ្ញាខាងមុខនេះហើយខណៈដែលសមាជិកថ្មីមួយទៀតដែលមានឈ្មោះថា ស្មាតហ្វូន Xiaomi 15 Ultra ត្រូវបានគេបញ្ជាក់ថា អាចនឹងមានការបង្ហាញខ្លួននៅក្នុងឆមាសទី 1 ឆ្នាំ 2025 ខាងមុខ។

ទាក់ទងនឹងព័ត៌មានថ្មីនេះ មានពាក្យចចាមអារ៉ាមជាច្រើនបាននិយាយពីស្មាតហ្វូនថ្មីនេះថែមទៀតហើយ។ បើតាមការទម្លាយចេញពី Digital Chat Station នៅពេលនេះ គឺមានការបញ្ចេញននូវលក្ខណៈសម្បត្តិមួយចំនួនរបស់ស្មាតហ្វូននេះផងដែរ។

បើតាមការបែកធ្លាយខាងលើនេះ បាននិយាយថា ស្មាតហ្វូន Xiaomi 15 Ultra នឹងមានការបង្ហាញខ្លួនជាមួយនឹងបន្ទះឈីប  Qualcomm Snapdragon 8 Gen 4 ហើយស្មាតហ្វូនថ្មីនេះ ក៏នឹងមានការបំពាក់នូវបន្ទះអេក្រង់ដែលមានសមត្ថភាពខ្ពស់ អាចបង្ហាញចេញបានកម្រិត 2K resolution display ហើយនិងមានការឌីស្សាញជាមួយនឹងគែម bezels ស្តើង រួមនិងការឌីស្សាញអេក្រង់កោងយ៉ាងស្រស់ស្អាតថែមទៀតផង។

ប្រភពខាងលើនេ ក៏មានការទម្លាយចេញនូវប្រព័ន្ធកាមេរ៉ារបស់ស្មាតហ្វូន Xiaomi 15 Ultra ថ្មីនេះផងដែរ។ បើតាមការអះអាងខាងលើនេះបាននិយាយថា Xiaomi 15 Ultra នេះ នឹងម៉ូឌុលកាមេរ៉ាមូលយ៉ាងស្រស់ស្អាត ហើយនិងមានកាមេរ៉ាសិនស័រកាមេរ៉ា 4 គ្រាប់ ដែលមានទំហំ 50MP ហើយក៏មានអមជាមួយនឹងឡែន periscope lens ទៀតផង។ ខ្នងក្រោយរបស់ស្មាតហ្វូន Xiaomi 15 Ultra នេះ អាចនឹងមានការប្រើប្រាស់នូវសមាសភាគចំនួន 3 ផ្សេងគ្នានោះគឺ Plain Leather, Fiberglass និងសេរ៉ាមិច។ ជាមួយនិងការបែកធ្លាយអំពីលក្ខណៈសម្បត្តិ និងការឌីស្សាញរបស់ស្មាតហ្វូន Xiaomi 15 Ultra នេះ អាចនឹងមានការផ្លាស់ប្តូរផងដែរនៅពេលខាងមុខ៕