នៅថ្ងៃនេះ ក្រុមហ៊ុនផលិតរថយន្ត Xpeng បានប្រកាសថា ខ្លួននឹងមានការដាក់សម្ពោធជាផ្លូវការណ៌នូវរថយន្តស៊េរីថ្មីម៉ូដែល G7 SUV នៅពេលដីខ្លីខាងមុខនេះហើយដើម្បីចូលខ្លួនមកប្រជែងជាមួយ Xiaomi YU7 ដែលទើបតែមានវត្តមាននៅលើទីផ្សារប្រទេសចិននាពេលថ្មីៗនេះ។ តាមការបញ្ជាក់ពីនាយកគ្របគ្រង់ក្រុមហ៊ុន Xpeng ដែលបង្ហោះនៅលើបណ្តាញសង្គម Weibo របស់ខ្លួននៅថ្ងៃនេះ  បានអោយដឹងថា រថយន្ត G7 នឹងមានវត្តមាននៅលើទីផ្សារចិន នាថ្ងៃទី 3 ខែកក្កដា នៅវេលាម៉ោង 7:30 ល្ងាច។

សម្រាប់ម៉ូដែលនេះ នឹងក្លាយជាឡានដែលឆ្លាតជាងគេនៅលើទីផ្សារ SUV ដោយសារឡានថ្មីមានការឌីស្សាញរូបរាង និងការតម្លើងនូវប្រព័ន្ធបច្ចេកវិទ្យាថ្មីៗ មានលក្ខណៈសម្បូរបែបជាងទីបំផុត នេះបើតាមការបញ្ជាក់ពីលោក He Xiaopeng ដែលជាស្ថាបនិក និងជានាយកប្រតិបត្តិរបស់ Xpeng បង្ហោះសារនៅលើ Weibo ថ្ងៃនេះ។

នៅលើឡាន Xpeng G7 SUV ថ្មីនេះ មានការបំពាក់នូវបច្ចេកវិទ្យា AI សំខាន់ចំនួន 3 ដែលមានការអភិវឌ្ឍឡើងជាមួយបន្ទះឈីប Xpeng Turing AI មានសមត្ថភាពអាចផ្តល់នូវកម្រិតជាង  2,200 TOPS និងមានការទ្រទ្រង់បានជាមួយនូវ VLA+VLM large language models ដោយបានធ្វើអោយឡានេះ គឺជាឡាន super AI car ដំបូងគេដែលមានភ្ជាប់មកជាមួយ L3 computing power នេះបើតាមការបញ្ជាក់របស់ស្ថាបនិក និងជានាយកប្រតិបត្តិរបស់ Xpeng រូបនេះ។

ជាមួយគ្នានេះនៅលើ G7 នេះក៏មានការតម្លើងមកនូវបច្ចេកវិទ្យាថ្មីៗមួយចំនួនទៀតផងដែរ ក្នុងនោះមានដូចជា AR-HUD និងAI chassis ជាដើម។ សូមជំរាបថា Xpeng បានបង្ហាញវត្តមានឡានអគ្គិសនី G7 នេះ កាលពីថ្ងៃទី 11 ខែមិថុណាកន្លងទៅ ដោយថែមទាំងមានការដាក់អោយមានការបញ្ជាទិញមុនផងដែរ។ សម្រាប់ការរយៈពេលត្រឹមតែ 46 នាទីប៉ុណ្ណោះ ឡានអគ្គិសនីថ្មីនេះ មានការបញ្ជាទិញដល់ទៅជាង 10,000 គ្រឿង។

សូមជំរាបថា ការបង្ហាញវត្តមានឡានអគ្គិសនី Xpeng G7 SUV នេះ គឺដើម្បីចូលខ្លួនមកប្រជែងជាមួយ Xiaomi YU7 ដែលទើបតែសម្ពោធជាផ្លូវការណ៌នៅលើទីផ្សារប្រទេសចិនថ្មីនេះដោយឡាន Xiaomi ថ្មីនេះ មានការចាប់អារម្មណ៌ខ្លាំងមែនទែន។ គិតមកដល់ពេលនេះ Xiaomi YU7 មានកក់មុនបានចំនួន 240,000 គ្រឿងហើយ។