BYD Dolphin គឺជាឡានអគ្គិសនីសុទ្ធប្រភេទ Hatchback ដែលមានតម្លៃធូរថ្លៃមួយរបស់ BYD។ ឡានអគ្គិសនីខ្នាតតូចនេះមានទីផ្សារល្អខ្លាំងចាប់តាំងពីថ្ងៃចេញលក់លើកដំបូង ហើយមកទល់នឹងពេលនេះ ការលក់ BYD Dolphin ត្រូវបានគេរាយការណ៍ថា មានចំនួនដល់ 1 លានគ្រឿងហើយ ដែលធ្វើឲ្យឡាន Hatchback EV មួយនេះ ក្លាយជាម៉ូដែលមានសន្ទុះនៃការលក់លឿនខ្លាំងធៀបនឹងប្រភេទឡានអគ្គិសនីដូចគ្នាក្នុងប្រទេសចិន។

BYD Dolphin ត្រូវបានក្រុមហ៊ុនធ្វើការប្រកាសចេញលក់លើកដំបូងកាលពីខែសីហា ឆ្នាំ 2021 នៅក្នុងប្រទេសចិន ដោយដាក់ឲ្យស្ថិតនៅក្នុងក្រុមគ្រួសាររថយន្ត BYD Ocean Series។ ហើយបច្ចុប្បន្នម៉ូដែល Dolphin 2025 បាននឹងកំពុងមានវត្តមានលក់នៅលើទីផ្សារជាមួយជម្រើស 4 ម៉ូដែល ដោយមានតម្លៃចាប់ពីខ្ទង់ $14,100 ដល់ $18,400 នៅទីផ្សារប្រទេសចិន។ Dolphin ត្រូវបានផលិតឡើងដោយប្រើប្រាស់ប្រព័ន្ធគ្រោងឆ្អឹងស្តង់ដារ e-Platform 3.0 របស់ BYD ដោយមានការប្រើប្រាស់នូវលោហៈធាតុ 85% ជាប្រភេទ high-strength steel។ ឡានអគ្គិសនីខ្នាតតូចនេះ មានបណ្តោយតួរខ្លួន 4,125mm /ទទឹង 1,770/ កំពស់ 1,570mm និងគម្លាតចន្លោះកង់មុខទៅកង់ក្រោយ 2,700mm។

ឡានអគ្គិសនី Hatchback មួយនេះ មានកម្លាំងពីរជម្រើសផ្សេងគ្នា ក្នុងនោះមានជម្រើសកម្លាំង 70kW (94hp) និង 180Nm ដែលផលិតដោយម៉ូទ័រអគ្គិសនីមួយប្រភេទ  permanent magnet synchronous motor អាចជាន់ស្ទុះពី 0-50km/h ប្រើពេល 3.9 វិនាទី។ ម៉ូដែលនេះ មានកញ្ចប់ថ្មទំហំ 44.928kWh ប្រភេទ Blade (LFP) ដែលសាកភ្លើងពេញម្តងអាចជិះបានចម្ងាយ 420km។ ជម្រើសមួយម៉ូដែលទៀតមានកម្លាំង 150kW (201hp) និង 310Nm ដែលផលិតដោយម៉ូទ័រអគ្គិសនីមួយប្រភេទ  permanent magnet synchronous motor អាចជាន់ស្ទុះពី 0-50km/h ប្រើពេល 3.5 វិនាទី។ ម៉ូដែលនេះ មានកញ្ចប់ថ្មទំហំ 60.48kWh ប្រភេទ Blade (LFP) ដែលសាកភ្លើងពេញម្តងអាចជិះបានចម្ងាយ 520km។ សម្រាប់ការសាកថាមពលថ្មចូលវិញ គឺលឿនរហ័សដោយប្រើពេល 30 នាទី អាចសាកចូលពី 30% ទៅ 80%។

នៅខាងក្នុងកាប៊ីនរបស់ BYD Dolphin មានបំពាក់អេក្រង់បង្ហាញព័ត៌មានទំហំ 5-inch រួមជាមួយអេក្រង់កម្សាន្តមានទំហំ 10.1-inch ឬ 12.8-inch អាស្រ័យទៅលើជម្រើសម៉ូដែល ជាមួយនឹងដំណើរការដោយប្រព័ន្ធប្រតិបត្តិការ DiLink របស់ BYD។ នៅលើម៉ូដែល Top-trim របស់ Dolphin មានបន្ថែមនូវកន្លែងសាកថ្មទូរស័ព្ទកម្លាំង 50W Wireless Charging Pad ផងដែរ។ ទៅលើប្រព័ន្ធសុវត្ថិភាពជំនួយការបើកបរវិញ BYD Dolphin គឺមានការគាំទ្រដោយប្រព័ន្ធ DiPilot system របស់ BYD ដែលមានបញ្ចូលមកជាមួយមុខងារចំនួយការបើកបរចំនួន 7 មុខងារ រួមមានដូចជា adaptive cruise control, automatic emergency braking, និង lane departure assist…ជាដើម។

គួររំលឹងផងដែរថា នៅក្នុងខែវិច្ឆិកា កន្លងទៅ BYD បានលក់រថយន្តចំនួន 480,186 គ្រឿង ដែលនាំឱ្យការលក់សរុបក្នុងឆ្នាំ 2025 របស់ខ្លួនកើនដល់ 4,182,038 គ្រឿង៕