លោក Zhou Yibao ដែលគេស្គាល់ថា គឺជាប្រធានផ្នែកផលិតផលរបស់ក្រុមហ៊ុន OPPO ប៉ុន្មានថ្ងៃចុងក្រោយនេះ នៅតែបន្តចែកចាយព័ត៌មានថ្មីៗជាច្រើនរបស់ស្មាតហ្វូនស៊េរីថ្មី Find X8 series។ ជាក់ស្តែងនៅលើថ្ងៃនេះ លោកបានចែករំលែកបន្ថែមនូវរូបភាពថ្មីមួយដែលបង្ហាញពីផ្នែកខាងមុខរបស់ស្មាតហ្វូន Find X8 Pro។ នេះគឺជារូបភាពផ្លូវការណ៌ដំបូងហើយសម្រាប់ការចែកចាយពេលនេះ។ រូបភាពនេះ គឺមានការបង្ហាញផ្ទាល់នៃទំនាក់ទំនងគ្នាជាមួយមិត្តភក្តិរបស់លោកនៅតំបន់ Gobi Challenge។

ការបង្ហាញពីតំបន់ Gobi desert របស់ប្រធានផលិតផលរបស់ OPPO រូបនេះ គឺលោកមានគោលបំណងចង់បញ្ជាក់ពីមុខងារផ្កាយរណបដែលមានការហៅទូរស័ព្ទចេញតាមរយៈនៃការប្រើប្រាស់នូវបច្ចេកវិទ្យាទំនាក់ទំនង satellite connectivity ដែលមាននៅលើ Find X8 Pro។ សម្រាប់ការផុសរបស់ Zhou នេះ គឺបានបញ្ជាក់ថា ស្មាតហ្វូននេះ នឹងមាន 2 ម៉ូដែលផ្សេងគ្នា ដោយមួយមានមុខងារនេះ និងមួយទៀតនឹងមិនមានមុខងារនេះនោះទេ។

រូបភាពនេះ បានបង្ហាញទៀតថា Find X8 Pro នឹងមានអេក្រង់គែមកោក micro-curved glass គ្រប់ជ្រុងតែម្តង។ ជាមួយគ្នានេះអេក្រង់របស់ស្មាតហ្វូននេះ ក៏មានការច្រិបគែមកាន់តែតូច មើលទៅតូចជាងគែមអេក្រងដែលប្រើប្រាស់នៅលើស្មាតហ្វូន  iPhone 16 Pro គ្រប់ជ្រុងទៀតផង។ ស្មាតហ្វូន Find X8 Pro ក៏នឹងមានការទ្រទ្រង់ជាមួយនិងបច្ចេកវិទ្យាថ្មីរបស់ OPPO magnetic accessories ហើយនិងមានប៊ូតុង camera ដែលមានការឌីស្សាញថ្មីផងដែរ។ ស្មាតហ្វូននេះ នឹងមានការបង្ហាញវត្តមជាផ្លូវការណ៌នេះ ជាមួយនិងបន្ទះឈីប MediaTek's Dimensity 9400។