កំពូលស្មាតហ្វូនជំនាន់ថ្មី Huawei P70 Series នឹងបង្ហាញវត្តមាននាពេលឆាប់ៗខាងមុខនេះ ហើយមួយរយះមកនេះប្រភពព័ត៌មានចចាមអារាមជាច្រើនបានធ្វើការចេញផ្សាយពីស្មាតហ្វូនជំនាន់ថ្មីរបស់ក្រុមហ៊ុនបច្ចេកវិទ្យាខ្នាតយក្សរបស់ប្រទេសចិនមួយនេះ។ ដូចជាពេលនេះអីចឹង បើតាមបណ្តាញគណនីទម្លាយព័ត៌មានល្បីឈ្មោះរបស់ប្រទេសចិន Digital Chat Station បានធ្វើការទម្លាយព័ត៌មានថ្មីបន្ថែមទៀតអំពី Huawei P70 Series។

បើតាមការទម្លាយចេញដោយគណនី DCS បានឲ្យដឹងថា នៅខណៈពេលនេះ Huawei បាននឹងកំពុងធ្វើការតេស្តបច្ចេកវិទ្យាអេក្រង់ពីរទំហំសម្រាប់កំពូលស្មាតហ្វូនជំនាន់ថ្មី P70 Series ដោយក្នុងនោះមានទំហំ 6.5-inch និង 6.8-inch។ ដោយបន្ទះអេក្រង់ទាំងពីរទំហំនោះត្រូវបានប្រភពបញ្ជាក់ថា គឺមានរចនាបថបែបកោង 2.5D Curved Display ជាមួយកម្រិតបង្ហាញ 1.5K និងគាំទ្របច្ចេកវិទ្យាបង្ហាញ LTPO refresh rate technology ព្រមទាំងមានគែមអេក្រង់តូចស្តើងថែមទៀតផង។ បើតាមរបាយការណ៍ដែលបានចេញផ្សាយនាពេលកន្លងមក បាននិយាយថា Huawei P70 Series ក៏នឹងទទួលបានការបង្កើនសមត្ថភាពប្រព័ន្ធកាមេរ៉ាថតរូបកាន់តែខ្លាំងជាងជំនាន់មុន។ ដោយស្មាតហ្វូនកំពូលជំនាន់ថ្មីនេះត្រូវបានគេរំពឹងថា នឹងប្រើប្រាស់ប្រព័ន្ធសែនស័រកាមេរ៉ា Omnivision OV50H និងគាំទ្រប្រព័ន្ធ Variable physical Aperture។

OmniVision OV50H គឺជាសែនស័រសម្រាប់កាមេរ៉ាស្មាតហ្វូនកំពូលដែលត្រូវបានក្រុមហ៊ុនធ្វើការប្រកាសចេញកាលពីខែមករា ឆ្នាំ 2023 ដែលមានទំហំ 50MP។ សែនស័រនេះមានទំហំ 1/1.3-inch និងមានសមត្ថភាពអាចផលិតសាច់រូបភាពបានក្នុងទំហំ 1.2 Micro pixel ព្រមទាំងមានសមត្ថភាពខ្ពស់អាចធ្វើការផលិតរូបភាពបានច្បាស់ល្អនៅទីតាំងខ្សោយពន្លឺ, គាំទ្រមុខងារ HDR Mode, high refresh rate, អាចផលិតសាច់វីដេអូបានដល់ 8K និង 4K ជាមួយមុខងារទប់លំនឹង EIS ទៀតផង។ Huawei P70 Series នឹងដំឡើងមកជាមួយប្រព័ន្ធលែនកាមេរ៉ាក្រោយចំនួន 3 គ្រាប់ បង្កប់នៅលើកញ្ចប់លែនកាមេរ៉ាដែលមានការឌីស្សាញបែបចតុកោងបញ្ឈរ ហើយក៏នឹងគាំទ្រប្រព័ន្ធ XMAGE របស់ Huawei ផងដែរ។

កំពូលស្មាតហ្វូនជំនាន់ថ្មីនេះ នឹងដំឡើងមកជាមួយបន្ទះឈីបជំនាន់ថ្មី Huawei Kirin 9000S, មានថ្មទំហំ 5,000mAh និងប្រព័ន្ធ Speaker ចំនួនពីរគ្រាប់ដែលភ្ជាប់ដោយមុខងារ receiver។ បើតាមប្រភពព័ត៌មានចុងក្រោយបានបញ្ជាក់ថា Huawei P70 Series នឹងមកដល់ផ្លូវការណ៍នៅចុងខែមិនា ឬដើមខែមេសា ឆ្នាំ 2024 ខាងមុខនេះ៕