Galaxy S26 Series គឺជាស្មាតហ្វូនស៊េរីថ្មីរបស់ Samsung ដែលស្ថិតនៅចំចំណុចកណ្តាលនៃស្ថានភាពផ្គត់ផ្គង់ ដែលកំពុងតែមានការរីកចម្រើន ហើយនឹងទទួលបានការចាប់អារម្មណ៍ច្រើននៅក្នុងឧស្សាហកម្មនេះផងដែរ។ យោងតាមរបាយការណ៍ថ្មីមួយចេញពីកូរ៉េខាងត្បូង បានទម្លាយថា ក្រុមហ៊ុន Samsung បានត្រៀមធ្វើការពិភាក្សាកម្រិតខ្ពស់មួយជាមួយនឹងក្រុមហ៊ុន Micron ដើម្បីធានាទៅលើការផ្គត់ផ្គង់ Mobile DRAM សម្រាប់ស្មាតហ្វូន Flagship នាពេលខាងមុខនេះផងដេរ។

ទាក់ទងជាមួយនិងព័ត៌មាននេះ លោក TM Roh ដែលជាប្រធានផ្នែក Samsung DX គ្រោងនឹងបើកកិច្ចប្រជុំជាមួយនឹងលោក Sanjay Mehrotra ដែលជានាយកប្រតិបត្តិរបស់ក្រុមហ៊ុន Micron នៅថ្ងៃបើកព្រឹត្តិការណ៍ CES 2026 ដែលនឹងធ្វើឡើងនៅ Las Vegas ដូចគ្នា។ កិច្ចប្រជុំដ៏កម្រនេះ នឹងរៀបចំណាស់នៅក្នុងព្រឹត្តិការណ៍នេះ ប៉ុន្តែភាពតានតឹងនៃការផ្គត់ផ្គង់ទៅលើ  LPDDR5X ត្រូវតែធ្វើអោយកិច្ចប្រជុំនេះរៀបចំឡើងដោយជៀសមិនបាននោះទេ។ ប្រភពនៅក្នុងឧស្សាហកម្មនេះ បាននិយាយថា តម្លៃបច្ចុប្បន្នទៅលើម៉េមូរីមានការកើនឡើងខ្លាំងមិនធម្មតានោះទេ។

តាមប្រភពខាងលើនេះបន្តថា សម្រាប់ LPDDR5X 12GB ដែលមានតម្លៃប្រហែលជា 30 ដុល្លារកាលពីដើមឆ្នាំនេះ គឺបានកើនឡើងជិត 70 ដុល្លារនៅចុងខែវិច្ឆិកានេះ ដូច្នេះហើយ ក្រុមហ៊ុន Samsung ត្រូវតែមានការចរចារជាមួយនឹងក្រុមហ៊ុន Micron។ ក្រុមហ៊ុនទាំងពីរនេះ នៅមិនទាន់ពិភាក្សាបញ្ចប់លក្ខខណ្ឌសម្រាប់ស្មាតហ្វូន Galaxy S26 Series នៅឡើយទេ ដែលធ្វើអោយស្មាតហ្វូននេះ អាចស្ថិតនៅក្នុងសម្ពាធ និងបញ្ហាសម្រាប់ការផលិតទ្រង់ទ្រាយធំផងដែរ។

របាយការណ៍ជាច្រើន ចេញពីកូរ៉េខាងត្បូង បានបញ្ជាក់ថា ក្រុមហ៊ុនផលិតម៉េមូរីជាច្រើនកំពុងតែស្ថិតនៅក្នុងស្ថានភាពលំបាកសម្រាប់ការផលិតទៅលើម៉េមូរីដោយសារតែតម្លៃកើនឡើងខ្លាំង។ ការឡើងថ្លៃនេះ ក៏បានបង្ករជាបញ្ហាដ៏ពិបាកមួយទៀតសម្រាប់អាជីវកម្មរបស់ក្រុមហ៊ុន Samsung ដែលត្រៀមខ្លួនក្នុងការផលិតទ្រង់ទ្រាយធំទៅលើបន្ទះឈីប Processors របស់ខ្លួននៅឆ្នាំក្រោយនេះ។

ខណៈដែលស្មាតហ្វូនជំនាន់ថ្មី Galaxy S26 Series បានត្រៀមបង្ហាញខ្លួននៅដើមឆ្នាំ 2026 នេះ កិច្ចប្រជុំ CES របស់លោក TM Roh ប្រហែលជាអាចនឹងមានឥទ្ធិពលមួយចំនួនដែលក្រុមហ៊ុន Samsung ប្រហែលជាអាចធ្វើការធានានូវការផ្គត់ផ្គង់ DRAM សម្រាប់ស្មាតហ្វូន Flagship របស់ខ្លួននោះ៕