នៅថ្ងៃនេះ ក្រុមហ៊ុន Huawei បានបញ្ជាក់ថា ស្មាតហ្វូនថ្នាក់ប្រណិតជំនាន់ថ្មីរបស់ខ្លួនម៉ូដែល Mate 70 series នឹងមានការបង្ហាញខ្លួនជាមួយនឹងការបញ្ចេញជាផ្លូវការនៃប្រព័ន្ធប្រតិបត្តិការថ្មី HarmonyOS NEXT។ ការប្រកាសនេះ នឹងធ្វើឡើងនៅក្នុងព្រឹត្តិការណ៍សន្និសីទ HDC 2024 Huawei Developer Conference ហើយក្នុងនោះ ក៏មានការដាក់អោយដំណើរការពេញលេញនៅក្នុងត្រីមាសទី 4 នៅក្នុងឆ្នាំនេះ (ខែតុលាដល់ខែធ្នូ) ខាងមុខនេះទៀតផង។

បើតាមការបង្ហាញចេញនៅក្នុងការបែកធ្លាយចុងក្រោយបំផុតនេះ ដោយអ្នកទម្លាយ Digital Chat Station បញ្ជាក់ថា ស្មាតហ្វូន Mate 70 នឹងមានបន្ទះឈីបជំនាន់ថ្មី HiSilicon Kirin 5G SoC ដែលនេះ គឺបានបង្ហាញអំពីការប្តេជ្ញាចិត្តរបស់ក្រុមហ៊ុន Huawei ក្នុងការអភិវឌ្ឍទៅលើបន្ទះឈីបជំនាន់បន្ទាប់របស់ខ្លួន។ ស្មាតហ្វូនជំនាន់នេះ នឹងមានការបំពាក់នូវកាមេរ៉ាគោលមានទំហំ 50-Megapixel ultra-large-bottom ដែលជា CMOS image sensor របស់ OmniVision ។

បន្ថែមពីនេះទៀតនោះ Digital Chat Station ថែមទាំងបានបង្ហើបថា ក្រមហ៊ុន Huawei ក៏បានធ្វើការនៅលើផលិតផលថ្មីដែលមានការបំពាក់នូវលក្ខណៈសម្បត្តិធ្ងន់ “heavyweight product” ផងដែរ។ យ៉ាងណាមិញ ផលិតផលថ្មីនេះ គឺប្រឈមមុខទៅនឹងបញ្ហាជាច្រើននៅក្នុងការផលិតដោយសារតែអត្រាទិន្នផលរបស់វាពិតជាស្ថិតនៅក្នុងកម្រិតទាប។ មកដល់ពេលនេះ នៅមិនទាន់ច្បាស់នោះទេថា ផលិតផលនេះ អាចជាម៉ូដែល Top end នៃស្មាតហ្វូន Mate 70 series នេះឡើយទេ។

អ្នកទម្លាយនេះបានអះអាងនៅលើ WeChat ថា ក្រុមហ៊ុននេះ ក៏បាននឹងកំពុងតែមានអភិវឌ្ឍទៅលើ native App ថ្មីសម្រាប់ HarmonyOS NEXT consumer version ផងដែរ។ សម្រាប់ព័ត៌មានលម្អិតជាច្រើនទៀតរបស់ស្មាតហ្វូន Mate 70 series នឹងទម្លាយនៅក្នុងពេលប៉ុន្មានខែខាងមុខនេះ៕