បន្ទាប់ពីក្រុមហ៊ុន Huawei ប្រកាសចេញជាផ្លូវការណ៌នូវ Mate XT Ultimate ដែលជាស្មាតហ្វូនអេក្រង់បត់បាន 3 តង់ ដំបបូងរបស់ខ្លួនរួចមក នៅពេលនេះមានការបញ្ជាក់ពីចំណុចសំខាន់មួយនៅលើស្មាតហ្វូនជំនាន់ថ្មីនេះហើយ នោះគឺបន្ទះឈីប។ ខណៈដែលក្រុមហ៊ុនបច្ចេកវិទ្យាយក្សចិនមួយនេះនៅមិនទាន់បញ្ជាក់ជាផ្លូវការណ៌ពីការប្រើប្រាស់នូវបន្ទះឈីបនៅលើស្មាតហ្វូនអេក្រង់បត់បាន 3 តង់នេះនោះ នៅថ្ងៃនេះ មានអ្នកចូលរួមនៅក្នុងព្រឹតិ្តការណ៌នេះ បានធ្វើការបង្ហាញនូវបន្ទះឈីប ដែលមាននៅលើស្មាតហ្វូនថ្មីនេះហើយ។ Huawei Mate XT Ultimate ដំណើរការនៅលើបន្ទះឈីប Kirin 9010។

បើតាមការបញ្ជាក់ពីប្រភពខាងលើនេះ បានបង្ហាញថា បន្ទះឈីបនេះ គឺមានចំនួន 8-core CPU ដែលមាន 1 គ្រាប់រត់បានល្បឿន 2.3 GHz Taishan Big core និង 3 គ្រាប់ទៀតរត់បានល្បឿន 2.18 GHz Taishan Mid cores ខណៈដែល 4 គ្រាប់ទៀតរត់បានល្បឿន 1.55 GHz Cortex-A510 cores ហើយក៏មានការគាំទ្រដោយបន្ទះឈីប Maleoon 910 MP4 GPU ផងដែរ។

បន្ទះឈីបនេះ គឺមានការផលិតឡើងដោយក្រុមហ៊ុន SMIC (Semiconductor Manufacturing International Corporation) ដែលជាក្រុមហ៊ុនផលិតឈីបដ៏ធំរបស់ចិន។ បន្ទះឈីប Kirin 9010 នេះ ក៏ធ្លាប់មានការប្រើប្រាស់នៅលើស្មាតហ្វូន Pura 70 Ultra ផងដែរ។ ឈីបនេះ គឺដំណើរការនៅលើបច្ចេកវិទ្យា 7nm ដែលគេស្គាល់ថា N+2 ដូចគ្នាជាមួយនិង Kirin 9000s ដែលធ្លាប់ប្រើប្រាស់នៅលើ Huawei Mate 60 series អញ្ចឹងដែរ។

និយាយពីសមត្ថភាពរបស់បន្ទះឈីប Kirin 9010 នេះ ត្រូវបានគេបញ្ជាក់ថា គឺមានកម្លាំងប្រហាក់ប្រហែលគ្នាជាមួយនិងបន្ទះឈីប MediaTek Dimensity 8200។ ប៉ុន្តែសម្រាប់តម្លៃស្មាតហ្វូនអេក្រង់បត់បាន 3 តង់ Mate XT Ultimate ដែលមានការប្រើប្រាស់ឈីបនេះ គឺខ្ពស់រហូតដល់ទៅជាង $3,000 ដុល្លារឯណោះ។ ដូច្នេះផ្អែកតាមការបង្ហាញវត្តមានខ្លួនរបស់ស្មាតហ្វូនថ្មីនេះ គឺអាចនឹងមិនផ្តោតទៅលើកម្លាំងម៉ាស៊ីននោះទេ គឺក្រុមហ៊ុនមានបំណងបង្ហាញទៅលើបច្ចេកវិទ្យាថ្មីៗផ្សេង ដែលមានដូចអេក្រង់ 3 តង់ជាដើម។