នៅថ្ងៃនេះ Xpeng បានប្រកាសថា ខ្លួនពិតជាទទួលបាននូវភាពជោគជ័យខ្លាំងមែនទែនពីរថយន្តអគ្គិសនីស៊េរីថ្មីរបស់ខ្លួនម៉ូដែល Mona M03 ដោយគិតត្រឹមរយៈពេល 216 ថ្ងៃ បន្ទាប់ពីការប្រកាសចេញលក់ជាផ្លូវការណ៌នៅលើទីផ្សារ ក្រុមហ៊ុនផលិតរថយន្តអគ្គិសនីតម្លៃសមរម្យនេះ បានចំនួន 100,000th គ្រឿងហើយ។ សូមជំរាបថា Xpeng Mona M03 គឺរថយន្តប្រភេទ Liftback ស៊េរីថ្មីមួយដែលត្រូវបានក្រុមហ៊ុនប្រកាសចេញលក់កាលពីថ្ងៃទី 27 ខែសីហា ឆ្នាំ 2024 ដែលមានតម្លៃខ្ទង់ប្រហែល 119,800 យន់ ឬប្រហែល 16,400ដុល្លារ នៅទីផ្សារប្រទេសចិន។

រថយន្តនេះពិតជាទទួលបានប្រជាប្រិយភាពខ្លាំងមែនទែននៅទីផ្សារក្នុងស្រុក ដែលជួយជម្រុញការលក់រថយន្ត Xpeng កើនឡើងយ៉ាងឆាប់រហ័ស។ ការនាំចេញរថយន្ត Xpeng Mona M03 បានចំនួនច្រើនជាង 30,000 គ្រឿង ហើយដោយសារតែកំណើននៃគាំទ្ររបស់អតិថិជនសម្រាប់ម៉ូដែលនេះ Xpeng បានបង្កើនសង្វាក់កម្មរបស់ខ្លួនបីដង។ ហើយនៅថ្ងៃទី 27 ខែធ្នូនេះ ការផលិត Mona M03 បានឈានដល់ចំនួន 50,000 គ្រឿងហើយ។

បើគិតជាតួរលេខនៃសង្វាក់ផលិតរបស់ Xpeng Mona M03 គឺបានចំនួន 1 គ្រឿងនៅរៀងរាល់ 72 វិនាទីម្តង និង 50 គ្រឿងនៅក្នុងរយះពេល 1 ម៉ោង ហើយដល់ 1,200 គ្រឿង ក្នុងមួយថ្ងៃ ហើយនិងឈានដល់ 35,000 គ្រឿងនៅក្នុងមួយខែ។ Mona M03 គឺជារថយន្តអគ្គិសនីប្រភេទ Liftback ដែល Xpeng ចំនាយពេលប្រមាណជា 4 ឆ្នាំក្នុងការអភិវឌ្ឍន៍ផលិត ដោយចាយទុនប្រមាណ 4 ពាន់លានយាន់ ឬប្រហែល 560 លានដុល្លារអាមេរិក។

Mona M03 មានតម្លៃចាប់ពីខ្ទង់ $16,400 ដល់ $21,350 នៅទីផ្សារប្រទេសចិន។ នាយកប្រតិបត្តិ Xpeng លោក He Xiaopeng ធ្លាប់លើកឡើងថា ក្រុមហ៊ុនទទួលបានប្រាក់ចំណេញពី Mona M03ដោយសារតែការកាត់បន្ថយថ្លៃដើមផលិតកម្មប្រកបដោយប្រសិទ្ធភាព។

Xpeng Mona M03 មានការឌីស្សាញឡើងប្រកបដោយប្រណិតភាព និងទំនើបនិយម រថយន្តនេះមានការរចនាចង្កៀងខាងមុខជារាងអក្សរ Y ឬហៅថា Y-shaped Headlight។ Mona M03 មានប្រវែងដងខ្លួន 4,780mm/ ទទឹង 1,896mm/ កំពស់ 1,445mm ជាមួយគម្លាតចន្លោះកង់មុខក្រោយ 2,815mm។

នៅផ្នែកខាងក្នុងមានការរចនាប្រណិតមិនចាញ់រថយន្តរបស់ Tesla នោះទេ ដោយក្នុងនោះមានបំពាក់នូវអេក្រង់កម្សាន្ត និងបង្ហាញព័ត៌មានរថយន្តទំហំធំដល់ 15.6-អ៊ីង និងគាំទ្រដំណើរការដោយបន្ទះឈីប Snapdragon 8155 រួមនឹងកម្មវិធីបង្ហាញផ្លូវបែប 3D Map និងប្រព័ន្ធកាមេរ៉ា 360 ដឺក្រេផងដែរ។

Xpeng Mona M03 មានជម្រើសម៉ូទ័រអគ្គិសនីចំនួនពីរកំលាំង គឺ 140kW ឬ 187 សេះ និង 160kW ឬ 214 សេះ។ ហើយសម្រាប់កញ្ចប់ថ្មអគ្គិសនីវិញ គឺមានពីរជម្រើសទំហំដូចគ្នា ក្នុងនោះមានជម្រើសទំហំ 51.8kWh និង 62.2kWh ដែលជាប្រភេទថ្មដែលផ្គត់ផ្គង់ដោយក្រុមហ៊ុន FineDream ដែលជាបុត្រសម្ព័ន្ធរបស់ BYD។ កញ្ចប់ថ្មរបស់ Mona M03 សាកភ្លើងពេញម្តងអាចរត់បានចម្ងាយផ្លូវ 515km និង 620km រៀងៗគ្នា តាមការធ្វើតេស្តស្តង់ដារពីស្ថាប័ន CLTC៕