ចាប់តាំងពីវត្តមានរបស់រថយន្ត Model S បានបង្ហាញខ្លួនជាផ្លូវការនៅលើទីផ្សាររួចហើយនោះ ក្រុមហ៊ុន Tesla ទទួលបាននូវពាក្យបណ្តឹងជាច្រើនពីសំណាក់អតិថិជនរបស់ខ្លួន ដែលមានបញ្ហាពាក់ព័ន្ធទៅនឹងកម្មវិធី Software រួមនិងប្រព័ន្ធសុវត្ថិភាពទូទៅរបស់រថយន្តនេះ ថែមទៀតផង។
នៅពេលនេះ រដ្ឋបាលសុវត្ថិភាពចរាចរណ៍ផ្លូវហាយវេ National Highway Traffic Safety Administration (NHTSA) នៅសហរដ្ឋអាមេរិក ក៏បានចាប់ផ្តើមចូលរួមមកពាក់ព័ន្ធទៅនឹងរឿងនេះផងដែរ។ នៅក្នុងរបាយការណ៍ថ្លែងការណ៍មួយបញ្ជាក់ថា ទីភ្នាក់ងាររដ្ឋាភិបាលនេះ ក៏បានធ្វើការស៊ើបអង្កេតជាផ្លូវការហើយ ទៅលើបណ្តឹងរបស់អ្នកប្រើប្រាស់ Tesla ដែលមានបញ្ហាទៅលើប្រព័ន្ធហ្រ្វាំង។
យោងតាមព័ត៌មាន គឺបានបញ្ជាក់ថា បញ្ហាគឺមានការពាក់ព័ន្ធទៅលើរថយន្តចំនួន 115,000 ដែលមានរថយន្ត Tesla Model S ម៉ូឌែល 2015-2017 និង Model X ម៉ូឌែល 2016-2017 ។ រដ្ឋបាលសុវត្ថិភាពចរាចរណ៍ផ្លូវហាយវេនៅសហរដ្ឋអាមេរិក បានអះអាងថា ខ្លួនទទួលបាននូវពាក្យបណ្តឹងចំនួន 43 ទៅលើបញ្ហានៃរថយន្តនេះ។ ភាគច្រើន គឺអាចនឹងមានបញ្ហាទៅលើកង់ និងសម្បករបស់វា។ នៅក្នុងនោះ ក៏មានបណ្តឹងចំនួន 32 ទៀតទៅលើបញ្ហានៃល្បឿន និង 11 ទៀតមានបញ្ហានៅពេលដែលបើកលើសល្បឿន 10 mph ផងដែរ។
នៅក្នុងពាក្យបណ្តឹងចំនួន 4 បាននិយាយបន្តថា បញ្ហារថយន្តភាគច្រើន គឺមានបញ្ហានៅពេលដែលបើកបរលឿននៅលើផ្លូវហាយវេ។ មកដល់ពេលនេះ ចំនួនបណ្តឹង ក៏មានការកើនឡើងផងដែរទៅលើរថយន្តទាំងនេះ។ រដ្ឋបាលសុវត្ថិភាពចរាចរណ៍ផ្លូវហាយវេនៅសហរដ្ឋអាមេរិក បានបញ្ជាក់ថា មិនមានការបង្ហាញអំពីគ្រោះថ្នាក់ ឬអ្នករងរបួសនោះទេ។ នៅក្នុងការស៊ើបអង្កេតនេះ គឺមានការផ្តោតទៅលើប្រព័ន្ធហ្វ្រាំងនៅលើរថយន្ត Model S ម៉ូឌែល 2013-2018 និងម៉ូឌែល Model X ៕
