យោងតាមការគណនារបស់ក្រុមហ៊ុន Forbes នៅក្នុងចំណោមមេដឹកនាំក្រុមហ៊ុនជាច្រើននៅលើពិភពលោក គឺបានបង្ហាញថា នាយកប្រតិបត្តិរបស់ក្រុមហ៊ុន Tesla លោក Elon Musk បានជាប់ឈ្មោះជា CEO ដែលមានប្រាក់ចំណូលខ្ពស់បំផុតនៅក្នុងឆ្នាំ 2020 កន្លងទៅនេះ។ លោក Musk បានទទួលបានប្រាក់ប្រហែលជា 11 ពាន់លានដុល្លារ អាមេរិកកាលពីឆ្នាំមុននេះ។ នេះគឺដោយសារតែតម្លៃស្តុករបស់ក្រុមហ៊ុននេះមានការកើនឡើងខ្លាំង។
កាន់តែពិសេសជាងនេះទៀត បើមើលទៅលើកញ្ចប់ប្រាក់ខែរបស់លោក Musk នោះ គឺអាចទិញបានភាគហ៊ុនរបស់ក្រុមហ៊ុន Tesla ចំនួន 101.2 លានហ៊ុន ដោយសារតែតម្លៃហ៊ុនរបស់ក្រុមហ៊ុន Tesla គឺមានតម្លៃ 70$។ តម្លៃទីផ្សារពេលនេះ គឺមានចំនួនច្រើនជាង 670$ ក្នុងមួយហ៊ុន។ នៅពេលដែលក្រុមហ៊ុន Tesla មានការកើនឡើងខ្លាំងទៅលើប្រាក់មូលធនរបស់ខ្លួននោះ តម្លៃហ៊ុនរបស់ក្រុមហ៊ុននេះ គឺមានការកើនឡើងដល់ទៅ 7 ដងនៅក្នុងឆ្នាំ 2020 នេះ។
នៅពេលនេះ នាយកប្រតិបត្តិរបស់ក្រុមហ៊ុន Tesla គឺជាបុរសដែលមានបំផុតចំណាត់ថ្នាក់លេខ 3 នៅលើពិភពលោក ដែលមានទឹកប្រាក់សរុបចំនួន 165.7 ពាន់លានដុល្លារអាមេរិក គិតត្រឹមថ្ងៃទី 5 ខែឧសភា ឆ្នាំ 2021 កន្លងទៅនេះ។ ក្រុមហ៊ុន Forbes ព្យាការណ៍ថា លោក Musk ទទួលបាននូវប្រាក់ឈ្នូលប្រហែលជា 13.3 ពាន់លានដុល្លារអាមេរិកកាលពីឆ្នាំមុននេះ។ ប្រាក់ចំណេញរបស់លោក Musk គឺ ច្រើនជាងប្រាក់ខែរបស់នាយកប្រតិបត្តិលោក Chad Richison របស់ក្រុមហ៊ុន Paycom ដែលមានប្រាក់ឈ្នួល 211 លានដុល្លារអាមេរិកនៅក្នុងឆ្នាំ 2020 នោះ៕