នៅចំពេលដែលមានកង្វះខាតនៃបន្ទះឈីបនេះ រដ្ឋាភិបាលរបស់ប្រទេសកូរ៉េខាងត្បូង បានប្រកាសពីគោលដៅរបស់ខ្លួននៅក្នុងការផ្គត់ផ្គត់នូវបន្ទះឈីបសម្រាប់វិស័យរថយន្តអោយបានគ្រប់គ្រាន់ដោយសារតែឧស្សាហកម្មនេះគឺជាចំណូលធំសម្រាប់ប្រទេសជាតិ។ យោងតាមព័ត៌មានដែលបានចេញផ្សាយនាពេលថ្មីៗនេះ បាននិយាយថា ក្រុមហ៊ុន Samsung Electronics បានធ្វើការសហការជាមួយនឹងក្រុមហ៊ុន Hyundai Motor Co ហើយក្រុមហ៊ុនទាំងពីរនេះ គឺបានចុះកិច្ចព្រមព្រៀងជាមួយនឹងវិទ្យាស្ថានបច្ចេកវិទ្យាអេឡិចត្រូនិច (Korean Electronics Technology Institute) វិទ្យាសា្ថនបច្ចេកវិទ្យារថយន្តកូរ៉េ (Korea Automotive Technology Institute) និងក្រសួងពាណិជ្ជកម្មឧស្សាហកម្មនិងថាមពលផងដែរ។
ក្រុមហ៊ុនធំៗទាំងពីរនេះ គឺបានធ្វើការសហការគ្នាក្នុងការផ្គត់ផ្គង់ទៅលើបន្ទះឈីបសម្រាប់វិស័យឧស្សាហកម្មរថយន្ត និងការបង្កើននូវការផ្គត់ផ្គង់នៅក្នុងស្រុកកាន់តែល្អជាងមុនថែមទៀតផង។ ក្រុមហ៊ុន Samsung និង Hyundai នឹងធ្វើការអភិវឌ្ឍទៅលើបន្ទះឈីបជំនាន់ក្រោយ បន្ទះឈីបសម្រាប់ការគ្រប់គ្រងទៅលើថាមពលថ្ម សេនស័ររូបភាព និងបន្ទះឈីបជាច្រើនសម្រាប់ប្រព័ន្ធរថយន្តផងដែរ។ ក្រុមហ៊ុន Samsung ក៏មានគម្រោងក្នុងការអភិវឌ្ឍទៅលើផលិតផលបន្ទះឈីបកម្រិតខ្ពស់សម្រាប់រថយន្តដែលផ្អែកនៅលើ 12-inch wafers ខណៈពេលដែលឧស្សាហកម្មជាច្រើនប្រើប្រាស់នូវ 8-inch wafers ប៉ុណ្ណោះ។ សព្វថ្ងៃនេះ ទីផ្សារបន្ទះឈីបរថយន្ត គឺមិនសូវខ្លាំងក្លាដូចទៅនឹងបន្ទះឈីបរបស់ស្មាតហ្វូននោះទេ ប៉ុន្តែវានឹងមានការកើនឡើងនាពេលអនាគតខាងមុខ។
ក្រុមហ៊ុន Samsung Electronics និង Hyundai Motor Co បានបញ្ជាក់ថា ពួកគេមិនទាន់អាចរកប្រាក់ចំណេញបាននោះទេនៅពេលដំបូងនេះ ប៉ុន្តែគោលដៅនៃការផ្គត់ផ្គង់បន្ទះឈីបនេះ នឹងមានការកើនឡើងនៅពេលដែលបំពេញនូវតម្រូវការទៅអោយរថយន្តអេឡិចត្រូនិចរបស់ក្រុមហ៊ុនជាច្រើនទៀតដែលកំពុងតែមានការកើនឡើងនោះ។ ថ្មីៗនេះ ក្រុមហ៊ុន Samsung ទើបតែបង្ហាញនូវដំណោះស្រាយទៅលើអំពូលភ្លើង PixCell LED intelligent headlight សម្រាប់រថយន្តអគ្គិសនីផងដែរ។ ដែលបច្ចេកវិទ្យានេះ គឺនឹងប្រើប្រាស់នូវ pixel isolation technology ដើម្បីពង្រឹងទៅលើសុវត្ថិភាពក្នុងការបើកបរដូចទៅនឹង ISOCELL ផងដែរ៕