ថ្មីៗនេះ និយ័តករកំពូលនៅក្នុងទីភ្នាក់ងារអាកាសចរណ៍អ៊ឺរ៉ុប បានបញ្ជាក់ថា រថយន្តតាក់ស៊ី ដែលមានសមត្ថភាពអាចហោះបាន អាចនឹងបង្ហាញខ្លួននៅក្នុងឆ្នាំ 2025 ឬនៅដើមឆ្នាំ 2024 នេះ។ យោងតាមខ្លឹមសារនៅក្នុងរបាយការណ៍ចេញពី Bloomberg បានសសេរថា ព័ត៌មាននេះ គឺចេញពីលោក Patrick Ky នាយកប្រតិបត្តិរបស់ទីភ្នាក់ងារ សុវត្ថិភាពអាកាសចរណ៍របស់សហភាពអឺរ៉ុប។ ហើយការប្រកាសនេះ គឺធ្វើឡើងជាផ្លូវការនៅដើមសប្តាហ៍នេះផងដែរ។
លោក Patrick Ky បានបញ្ជាក់បន្ថែមថា សម្រាប់ Drones ស្វ័យប្រវត្តិនេះ គឺប្រហែលជាត្រូវការពេលវេលាយ៉ាងតិចណាស់ចំនួន 5 ឆ្នាំ ខណៈពេលដែលរថយន្តដែលអាចហោះបាននោះ គឺអាចនឹងលឿនជាងនេះ។ បន្ថែមពីនេះទៀតនោះ EASA ចាប់ផ្តើមធ្វើការជាមួយនឹងក្រុមហ៊ុនជាច្រើនទៀតអំពីរថយន្តដែលអាចហោះបាននេះ។ ទីភ្នាក់ងារនេះ ក៏បានធ្វើការយ៉ាងជិតស្និទ្ធិជាមួយនឹងរដ្ឋបាលអាកាសចរណ៍សហព័ន្ធសហរដ្ឋអាមេរិកនិងនិយតករអន្តរជាតិផ្សេងទៀតផងដែរ។
លោក Patrick Ky បានននិយាយទៀតថា រឿងនេះ ពិតជាងាយស្រួលជាងមុនក្នុងការចាប់ផ្តើមនូវរថយន្តតាក់ស៊ីអាចហោះបាននេះ។ យើងនៅមិនទាន់បានទៅឆ្ងាយនោះទេដោយសារតែវាទាមទារនូវការគិតយ៉ាងច្រើនអំពីអ្វីដែលយើងចង់ធ្វើជាមួយនឹងគំនិតនៃការប្រើប្រាស់ដោយស្វ័យប្រវត្តិនេះ។ និយ័តករនេះ ក៏បានធ្វើការប្រកាសអំពីការដឹកជញ្ជូនអ្នកដំណើរដោយស្វ័យប្រវត្តិនៅក្នុងអ៊ឺរ៉ុបផងដែរ។ ស្រដៀងគ្នានេះផងដែរ EASA ក៏បានធ្វើការចុះផ្សាយអំពីលទ្ធផលជាច្រើនអំពីការវាស់ស្ទង់មតិទៅលើការធ្វើដំនើរតាមអាកាសនេះគឺមានអ្នកដំណើរជាង 4000 នាក់មកពីទីក្រុងផ្សេងៗគ្នាចំនួន 6 នៅអ៊ឺរ៉ុប។ មានតួរលេខចំនួន 83% បានបញ្ជាក់ពីពីភាពវិជ្ជមានក្នុងការប្រើប្រាស់នូវសេវាកម្មធ្វើដំណើរនេះ៕