Spin ដែលជាក្រុមហ៊ុនបុត្រសម្ព័ន្ធរបស់ក្រុមហ៊ុនផលិតរថយន្ត Ford បានបង្ហាញចេញនូវ e-scooter ដំបូងបំផុតរបស់ខ្លួន។ សម្រាប់ផលិតផលថ្មី Scooter ដែលមានលេខកូឌ S-100T នេះ គឺមានការឌីស្សាញជាមួយនឹងរូបរាងយ៉ាងរឹងមាំ និងសុវត្ថិភាពខ្ពស់ក្នុងការប្រើប្រាស់ថែមទៀតផង។ តាមរយៈនៃការបង្ហាញវត្តមាននូវកង់អគ្គិសនីថ្មីរបស់ខ្លួននេះ ក្រុមហ៊ុន Ford បានបង្ហាញនូវក្តីសង្ឃឹមក្នុងការទាក់ទាញកាន់តែច្រើនពីសំណាក់អ្នកប្រើប្រាស់ថ្មីៗជាច្រើន ជាមួយនឹងការប្រឡូកចូលទៅក្នុងទីផ្សារនៅពេលនេះ ។
ប្រភពព័ត៌មាននេះ បានបញ្ជាក់ថា Spin S-100T នេះនឹងបង្ហាញខ្លួននៅក្នុងទីក្រុង Sacramento សហរដ្ឋអាមេរិកនៅត្រឹមខែកក្កដាខាងមុខនេះហើយ។ អ្វីដែលពិសេសនោះ គឺផលិតផលថ្មី Scooter S-100T នឹងដាក់លក់ដំបូងចំនួនត្រឹមតែ 25 គ្រឿងប៉ុណ្ណោះ។ ប៉ុន្តែក្រុមហ៊ុន Spin មានក្តីសង្ឃឹមថានឹងបង្កើនការផលិតរបស់ខ្លួនរហូតដល់ទៅច្រើនពាន់គ្រឿងនៅត្រឹមឆ្នាំ 2022 នេះ។
កង់អគ្គិសនី Scooter S-100T នេះគឺត្រូវបានក្រុមការងាររបស់ក្រុមហ៊ុន Spin ធ្វើការស្រាវជ្រាវ និងអភិវឌ្ឍ តាំងពីឆ្នាំ 2019 មកម្លេះ។ សម្រាប់ម៉ូឌែលមុនៗរបស់ក្រុមហ៊ុន Spin គឺមានកិច្ចសហការគ្នាជាមួយនឹងក្រុមហ៊ុនជាច្រើនដូចជា Segway-Ninebot និង Okai។
នៅក្នុងពេលនេះ Scooters គឺមានការពេញនិយមខ្លាំងមែនទែន។ មុនពេលដែលដាក់លក់នៅលើទីផ្សារនោះ S-100T គឺបានធ្វើតេស្តយ៉ាងល្អិតល្អន់ និងអាចប្រើប្រាស់បានដល់ទៅ 3 ឆ្នាំថែមទៀត។ ក្រុមហ៊ុន Spin មានក្តីសង្ឃឹមថាសម្រាប់កង់អគ្គិសនីថ្មីនេះនឹងជួយស្តារនូវទំនុកចិត្តឡើងវិញនៅក្នុងទីផ្សារផងដែរ។ សម្រាប់ថាមពលថ្ម រយៈចម្ងាយ និងមុខងារជាច្រើនទៀតរបស់កង់ S-100T នៅមិនទាន់ដឹងនៅឡើយទេ៕