ដោយសារតែតម្លៃប្រេងឡើងថ្លៃ បានធ្វើអោយតម្រូវការទៅលើរថយន្តអគ្គិសនីនៅក្នុងប្រទេសអារ៉ាប់រួមមានកំនើន 200%

នៅក្នុងខណៈពេលដែលតម្លៃប្រេងមានការកើនឡើងនៅក្នុងខែមិថុនានេះ បានធ្វើអោយតម្រូវការទៅលើរថយន្តអគ្គិសនី បានចាប់ផ្តើមហក់ឡើងនៅទូទាំងពិភពលោក ខណៈដែលប្រទេសនៅអារ៉ាប់រួម (UAE) ដែលជាប្រទេសផលិតប្រេងដ៏ធំមួយនោះ មានការកើនឡើងនូវរថយន្តប្រភេទនេះយ៉ាងខ្លាំងផងដែរ។ ដោយមើលឃើញពីតម្លៃប្រេងកើនឡើងនៅក្នុងប្រទេសអារ៉ាប់រួមនេះ លោក Belal Nasr នាយកប្រតិបត្តិរបស់ក្រុមហ៊ុន New Auto បាននិយាយថា រថយន្តអគ្គិសនី គឺជាជម្រើសដ៏មានប្រសិទ្ធិភាពបំផុត។

លោក Nasr បាននិយាយបន្តទៀតថា “ជាជាងការចំណាយទឹកប្រាក់ចំនួន Dh2,000 ទៅលើប្រេងឥន្ធនៈនោះ យើងអាចបង់ទឹកប្រាក់នេះ សម្រាប់ការរំលោះទៅលើរថយន្តអគ្គិសនីបាន។ ធនាគារជាច្រើនក៏ផ្តល់នូវប្រាក់កំចីដែលទាក់ទាញមែនទែនសម្រាប់រថយន្តអគ្គិសនី ហើយរដ្ឋាភិបាលក៏ជម្រុញអោយមានការប្រើប្រាស់ទៅលើរថយន្តអគ្គិសនីផងដែរ។”

គាត់បានអះអាងថា តម្លៃប្រេងមានការកើនឡើងនាំអោយមានតម្រូវការយ៉ាងខ្លាំងទៅលើរថយន្តអគ្គិសនី ហើយអតិថិជនជាច្រើនក៏មានការព្រួយបារម្ភចាប់តាំងពីតម្លៃប្រេងមានកើនឡើងសម្រាប់ទីផ្សារអន្តរជាតិនោះ។ ក្រុមហ៊ុននេះក៏បាននាំចេញនូវរថយន្តអគ្គិសនីជាច្រើនដូចជា  Volkswagen, Hyundai និង KIA ។ លោក Nasr បានបញ្ជាក់បន្ថែមថា សម្រាប់ទីផ្សារនៅអារ៉ាប់រួមគឺមានការខ្វះខាតទៅលើរថយន្តអគ្គិសនីដោយសារតែតម្រូវការខ្ពស់ទៅលើរថយន្តនេះ៕