ព្រឹត្តិការណ៍ World Artificial Intelligence Conference 2021 (WAIC 2021) គឺជាវេតិកាមួយ ដែលមានការផ្តោតខ្លាំងទៅលើបច្ចេកវិទ្យាបើកបរដោយស្វ័យប្រវត្តិ។ ព្រឹត្តិការណ៍នេះ គឺបានបញ្ចប់ទៅជាមួយនឹងរឿងដែលគួរអោយភ្ញាក់ផ្អើលផងដែរ។ ប៉ុន្តែអ្វីដែលភ្ញាក់ផ្អើលនោះ គឺក្រុមហ៊ុន Huawei បានប្រកាសអំពីការដកប្រធានផ្នែកបើកបរដោយស្វ័យប្រវត្តិលោក Su Jing ទៅវិញ។ ក្រុមហ៊ុនបច្ចេកវិទ្យាយក្សនេះ បានចេញនូវសេចក្តីប្រកាសអំពីការដកនូវប្រធានផ្នែកនេះគឺដោយសារតែការអធិប្បាយមិនត្រឹមត្រូវអំពីបច្ចេកវិទ្យាបើកបរដោយស្វ័យប្រវត្តិរបស់ក្រុមហ៊ុន Tesla នៅក្នុងព្រឹត្តិការណ៍នេះ។
លោក Su អះអាងថា រថយន្ត Tesla កំពុងតែសម្លាប់មនុស្ស ដែលគាត់ចង់សំដៅទៅលើបញ្ហានៃបច្ចេកវិទ្យា autopilot ដែលមានការរាយការណ៍អំពីបញ្ហាជាច្រើននៅក្នុងពេលថ្មីៗនេះ។ លោក Su Jing បានធ្វើការជាមួយនឹងក្រុមហ៊ុន Huawei អស់រយៈពេលជាច្រើនឆ្នាំមកហើយ ហើយគាត់ក៏មានសមត្ថភាពក្នុងការអភិវឌ្ឍទៅលើបច្ចេកវិទ្យាបើកបរស្វ័យប្រវត្តិនេះ ហើយគាត់ក៏ជាបុគ្គលិកឆ្នើមផងដែរ។ កាលពីពេលមុននេះ គាត់គឺជា ប្រធានផ្នែកស្ថាបត្យកម្មនៃ Huawei Terminal Company និងប្រធានផ្នែកបើកបរឆ្លាតវៃរបស់ក្រុមហ៊ុន Huawei ផងដែរ។
គាត់បានដឹកនាំក្នុងការបង្កើតនូវដំណោះស្រាយសុវត្ថិភាពស្វ័យប្រវត្តិ ADS ដែលមានការបង្ហាញនៅលើរថយន្ត BAIC Arcfox Alpha S ផងដែរ។ រថយន្តនេះគឺជារថយន្តឆ្លាតវៃដំបូងបំផុតដែលមានបំពាក់នូវដំណោះស្រាយ Lidar របស់ក្រុមហ៊ុន Huawei ហើយនេះគឺជាម៉ូឌែលដំបូងបំផុតដែលបំពាក់នូវប្រព័ន្ធប្រតិបត្តិការ Huawei Harmony OS នេះ។ មានការបញ្ជាក់ថា ហេតុផលនៃការដកប្រធានផ្នែករថយន្តស្វ័យប្រវត្តិនេះគឺលើសពីការអធិប្បាយទៅលើក្រុមហ៊ុន Tesla នេះ។
មានពាក្យចចាមអារ៉ាមជាច្រើនបញ្ជាក់ថា ក្រុមហ៊ុនផលិតរថយន្ត Weilai (NIO) និងក្រុមហ៊ុនជាច្រើនទៀតក៏ទាក់ទងលោក Su Jing ផងដែរ។ យ៉ាងណាមិញ លោក Su និងក្រុមហ៊ុន NIO បដិសេធទៅលើពាក្យចចាមអារ៉ាមនេះ៕
