យោងតាមព័ត៌មានថ្មី ដែលបានចេញផ្សាយកាលពីម្សិលមិញនេះ បាននិយាយថា ក្រុមហ៊ុន Apple កំពុងតែចរចាជាមួយនឹងក្រុមហ៊ុនផលិតរថយន្តមួយដើម្បីផលិតនូវរថយន្ត ‘Apple Car’ នាពេលខាងមុខនេះហើយ។ ក្រុមហ៊ុនអាមេរិកាំងមួយនេះ អាចនឹងសហការជាមួយនឹងក្រុមហ៊ុន Toyota ដើម្បីផលិតរថយន្ត Apple Car របស់ខ្លួន ហើយការផលិតរថយន្តនេះនឹងចាប់ផ្តើមនៅឆ្នាំ 2024 ។
តាមការរាយការណ៍របស់ DigiTimes បានអោយដឹងថា អ្នកតំណាងជាច្រើនរបស់ក្រុមហ៊ុនផលិតស្មាតហ្វូននេះបានជួបជា មួយនឹងក្រុមហ៊ុន SK Group និង LG Electronics របស់ប្រទេសកូរ៉េខាងត្បូង ហើយពេលនេះ ក៏ក្រុមហ៊ុននេះ នឹងបន្តការចរចារជាមួយនឹងក្រុមហ៊ុនផលិតរថយន្តរបស់ជប៉ុន Toyota ដើម្បីធ្វើការជាដៃគូផងដែរ។
ពាក្យចចាមអារ៉ាមជាច្រើនមុននេះ បានបញ្ជាក់ថា ក្រុមហ៊ុន Apple ក៏បានធ្វើការនៅលើគម្រោង Apple Car ផងដែរ។ ដូច្នេះដើម្បីអាចសម្រេចបាននូវគោលដៅនៅក្នុងវិស័យរថយន្តនេះ ក្រុមហ៊ុននេះ ត្រូវតែស្វែងរកនូវក្រុមហ៊ុនដៃគូផលិតរថយន្ត ដើម្បីធ្វើការផ្គត់ផ្គង់បាន។ របាយការណ៍ថ្មីៗនេះ បានបញ្ជាក់ថា ក្រុមហ៊ុន Toyota ក៏ធ្វើការផលិតទៅលើថ្មសម្រាប់រថយន្តបើកបរស្វ័យប្រវត្តិនៅក្នុងទីផ្សាររបស់អាមេរិកផងដែរ៕