ក្រុមហ៊ុន Honda Motors នៅក្នុងសហរដ្ឋអាមេរិក ទើបតែទម្លាយថាខ្លួនមានគោលដៅក្នុងការលក់រថយន្តអគ្គិសនី Prologue series របស់ខ្លួនចំនួន 70,000 គ្រឿង ហើយការលក់រថយន្តនេះ នឹងចាប់ផ្តើមនៅក្នុងទីផ្សាររបស់អាមេរិកនៅក្នុងឆ្នាំ 2024 នេះ។
តាមការបញ្ជាក់នៅក្នុងរបាយការណ៍របស់ Reuters នោះ ក្រុមហ៊ុនផលិតរថយន្តរបស់ជប៉ហុននេះ ក៏មានគម្រោងក្នុងការបន្ថែមនូវរថយន្តអគ្គិសនីចំនួនសរុបចំនួន 500,000 នៅក្នុងសហរដ្ឋអាមេរិកនៅក្នុងឆ្នាំ 2030 នេះ។ បន្ថែមពីនេះទៀតនោះ ក្រុមហ៊ុននេះក៏មានគោលដៅក្នុងការសម្រេចអោយបាននូវរថយន្តដែលមិនបញ្ចេញនូវឧស្ម័នពុល ១០០% នៅក្នុងអាមេរិកខាងជើងនៅត្រឹមឆ្នាំ 2040 នេះ។
ព័ត៌មាននេះត្រូវទម្លាយនៅពេលដែលប្រធានាធិបតី Joe Biden របស់អាមេរិកចុះកិច្ចព្រមព្រៀងកាលពីខែមុននេះដែលមានគោលដៅក្នុងការកំណត់អោយពាក់កណ្តាលនៃរថយន្តដែលដឹកអ្នកដំណើរនៅត្រឹមឆ្នាំ 2030 នឹងគ្មានការបញ្ចេញនូវឧស្ម័ន។ អ្វីដែលគួរអោយកត់សម្គាល់នោះ រថយន្ត Honda Prologue series គឺមានការសហការជាមួយនឹងក្រុមហ៊ុន General Motors Co ហើយវាផ្អែកនៅលើ Ultium platform ដែលផ្តោតទៅលើប្រព័ន្ធថាមពលថ្មនោះ។
ក្រុមហ៊ុនទាំងពីរនេះក៏ផលិតរថយន្ត Acura SUV ផងដែរ។ ក្រុមហ៊ុន GM នឹងទទួលខុសត្រូវក្នុងការតម្លើងនូវរថយន្ត Prologue និង Acura SUV ហើយរថយន្តទាំងពីរនេះនឹងបង្ហាញខ្លួននៅក្នុងឆ្នាំ 2024 នេះ។ យ៉ាងណាមិញ ក្រុមហ៊ុន Honda នៅមិនទាន់បានទម្លាយអំពីរោងចក្រដែលនឹងសាងសង់នូវរោងចក្ររថយន្តថ្មីនេះនៅឡើយទេ៕
