នៅទីបំផុត Toyota ដែលជាក្រុមហ៊ុនផលិតរថយន្តដ៏ធំបំផុតរបស់ប្រទេសជប៉ុន បានវិវត្តទៅកាន់ការផលិតទៅលើរថយន្តអគ្គិសនីហើយ។ កាលពីពេលមុននេះ ក្រុមហ៊ុននេះ ធ្លាប់បានបញ្ចេញនូវគំនិតសម្រាប់រថយន្តអគ្គិសនី ហើយនៅពេលនេះ គំនិតបានក្លាយជាការពិតហើយជាមួយនឹងការបង្ហាញរថយន្តអគ្គិសនីដំបូងបំផុតរបស់ខ្លួនដែលមានឈ្មោះហៅថា bZ4X។
នៅក្នុងព្រឹត្តិការណ៍ Shanghai Motor Show កាលពីដើមឆ្នាំនេះ ក្រុមហ៊ុន Toyota ក៏បានបង្ហាញនូវរថយន្ត bZ4X ដែលនេះ គឺគ្រាន់តែជា Concept ប៉ុណ្ណោះ។ នៅពេលនេះ ក្រុមហ៊ុន Toyota បានផ្តល់នូវលក្ខណៈបច្ចេកទេសកាន់តែប្រសើរទៅលើរថយន្ត SUV ប្រភេទអគ្គិសនី ដែលមានឈ្មោះហៅថា bZ4X ។ ក្រុមហ៊ុន Toyota ក៏បានដាក់លក់រថយន្តអគ្គិសនីនេះ នៅក្នុងប្រទេសចិន មុនពេលដែលដាក់លក់នៅលើទីផ្សារសកល។
សម្រាប់ពាក្យថា “bZ” នេះ គឺសំដៅទៅលើពាក្យថា beyond zero ដែលយុទ្ធសាស្រ្តរបស់ក្រុមហ៊ុន Toyota នេះគឺផ្តោតទៅលើរថយន្ត EVs។ រថយន្ត bZ4X នេះ គឺមានថាមពលថ្មកម្លាំង 71.4 kWh ដែលអាចធ្វើដំណើរបានចម្ងាយ 500 km (310 miles) សម្រាប់ front-wheel-drive version និងចម្ងាយ 460 km (286 miles) សម្រាប់ all-wheel-drive version នៃរថយន្ត SUV នេះ។
ក្រុមហ៊ុន Toyota បានបំពាក់នូវមុខងារ ដែលគួរអោយចាប់អារម្មណ៍ជាច្រើននៅលើរថយន្ត bZ4X នេះ។ រថយន្តនេះ គឺប្រើប្រាស់នូវដំបូលសូឡាផងដែរ ដែលអាចបង្កើតនូវថាមពលក្នុងការធ្វើដំណើរបានចម្ងាយដល់ទៅ 1,800 km ក្នុងមួយឆ្នាំ។ សម្រាប់ផ្ទាំងសូឡានេះ គឺផ្តល់ថាមពលទៅកាន់ថ្មយ៉ាងហោចណាស់ចំនួន 3 គ្រាប់នៅក្នុងពេលធ្វើដំណើរ។
បន្ថែមពីនេះ រថយន្ត bZ4X នេះ ក៏បំពាក់នូវប្រព័ន្ធក្នុងគ្រប់គ្រងទៅលើកង់រថយន្តដើម្បីធានាទៅលើការធ្វើដំណើរនៅក្នុងស្ថានភាពលំបាក ឬផ្លូវលំបាកៗ ឬនៅពេលដែលត្រូវការបើកមុខងារ Lane Tracing Assist ជាដើម។ រថយន្ត bZ4X SUV នឹងបង្ហាញខ្លួនជាផ្លូវការនៅលើទីផ្សារនៅពាក់កណ្តាលឆ្នាំ 2022 នេះ៕
