OPPO ត្រូវបានគេដឹងថា កំពុងធ្វើការលើសង្វាក់ផលិតកម្មរថយន្តអគ្គិសនីដែលអាចនឹងចេញផ្លែផ្កាលើទីផ្សារនាអំឡុងដើមឆ្នាំ 2024

កាលពីដើមខែវិច្ឆិកានេះ មានរបាយការណ៍មួយបានបង្ហើបថាក្រុមហ៊ុនសម្ព័ន្ធ BBK Electronics ដែលជាមេរបស់ក្រុមហ៊ុនផលិតស្មាតហ្វូនរបស់ប្រទេសចិនដូចជាម៉ាក OnePlus, OPPO និង vivo ជាដើម បានស្នើសុំចុះឈ្មោះពាណិជ្ជសញ្ញា (Trademark) សម្រាប់អាជីពកម្មផលិតរថយន្ត និងរថយន្តអគ្គិសនីនៅក្នុងប្រទេសឥណ្ឌា។

ហើយក្នុងពេលនេះក៏មានព័ត៌មានថ្មីមួយបាននិយាយថា នៅខណៈពេលនេះ OPPO បាននឹងកំពុងដំណើរការលើសង្វាក់ផលិតកម្មរថយន្តអគ្គិសនីដែលអាចនឹងចេញជាផ្លែផ្កានៅលើទីផ្សារនាអំឡុងដើមឆ្នាំ 2024។ បើតាមរបាយការណ៍ចេញផ្សាយដោយបណ្តាញ 91Mobiles តាមរយះ Tipster ឈ្មោះថា Mukul Sharma បានបញ្ជាក់ថា ក្រុមហ៊ុនបច្ចេកវិទ្យាខ្នាតយក្សលំដាប់សកលរបស់ចិនមួយនេះ បាននឹងកំពុងធ្វើការលើសង្វាក់ផលិតកម្មរថយន្តអគ្គិសនីសម្រាប់ទីផ្សារប្រទេសឥណ្ឌា។

យោងតាមឯកសារស្នើសុំពាណិជ្ជសញ្ញារបស់ OPPO បានឲ្យដឹងថា ក្នុងសង្វាក់ផលិតកម្មរថយន្តអគ្គិសនី (EVs) គឺមានរាប់បញ្ចូលនូវការផលិតរថយន្តអគ្គិសនី និងម៉ូដែលអគ្គិសនីប្រភេទ (Electronic Scooter) ផងដែរ ហើយគម្រោងសង្វាក់ផលិតកម្មក្នុងអាជិពកម្មថ្មីរបស់ OPPO ក៏បាននឹងកំពុងដំណើរការផងដែរក្នុងពេលបច្ចុប្បន្ននេះ។ ប្រភព Tipster ដដែលខាងលើនេះបានបញ្ជាក់បន្ថែមទៀតថា រថយន្តអគ្គិសនីរបស់ OPPO អាចនឹងចេញជាផ្លែផ្កានាចុងឆ្នាំ 2023 ឬក៏ដើមឆ្នាំ 2024។ យ៉ាងណាក៏ដោយប្រភពមិនបានបញ្ជាក់ពីពេលវេលាក្នុងការចេញលក់របស់ OPPO EVs រួមនឹងគុណសម្បត្តិ ហើយនឹងបច្ចេកវិទ្យាដែលនឹងមានបំពាក់នៅលើរថយន្តអគ្គិសនីរបស់ OPPO នោះទេ។ 

គួរកត់សំគាល់ដែរថា ជាមួយនឹងទីផ្សាររថយន្តអគ្គិសនី (EV Market) ក្នុងពេលបច្ចុប្បន្ននេះកំពុងមានវិសាលភាពរីកចម្រើនខ្លាំង ដែលញ៉ាំងឲ្យក្រុមហ៊ុនផលិតរថយន្តកំពុងសម្លឹងមើលការពង្រីកវិសាលភាពរបស់ពួកគេនៅក្នុងទីផ្សារតំបន់អាស៊ីផ្សេងៗទៀតផងដែរ។ ជាមួយគ្នានេះក្រុមហ៊ុនផលិតរថយន្ត Tesla ក៏ធ្លាប់បានប្រកាសពីផែនការណ៍ក្នុងការនាំយករថយន្តអគ្គិសនីរបស់ខ្លួនចូលទៅកាន់ទីផ្សារប្រទេសឥណ្ឌាផងដែរ ដូច្នេះ ក្រុមហ៊ុនបច្ចេកវិទ្យាខ្នាតយក្សធំៗ ជាក្រុមហ៊ុនថ្មីដែលកំពុងធ្វើការលើសង្វាក់រថយន្តអគ្គិសនី ក៏កំពុងសំឡឹងមើលវិសាលភាពក្នុងការពង្រីកទីផ្សាររបស់ខ្លួននៅក្នុងទីផ្សាររបស់ប្រទេសអាស៊ីដែលជាប្រទេសមានប្រជាជនច្រើនលំដាប់ទីពីរក្នុងពិភពលោកបន្ទាប់ពីប្រទេសចិនមួយនេះផងដែរ៕