ជាមួយនឹងការបន្តក្នុងការអភិវឌ្ឍទៅលើឧស្សាហកម្មរថយន្តអគ្គិសនីនោះ នៅពេលនេះ អ្នកប្រើប្រាស់ជាច្រើន មានការចាប់អារម្មណ៍ជាច្រើនទៅលើរថយន្តអគ្គិសនីរួមជាមួយនឹងរថយន្ត hybrid ផងដែរ។ ថ្មីៗនេះ ស្ថាបនិករបស់ក្រុមហ៊ុន Tesla លោក Elon Musk បាននិយាយថា រថយន្តម៉ូដែល Hybrid គួរតែត្រូវបញ្ឈប់។ បើតាមព័ត៌មានថ្មី បានសសេរថា ក្រុមហ៊ុន Toyota គឺមានចក្ខុវិស័យផ្សេងខុសពីគេ។
បើតាមការបញ្ជាក់របស់ក្រុមហ៊ុននេះ បានអោយដឹងថា រថយន្តអគ្គិសនីរបស់ក្រុមហ៊ុន Toyota គឺបានត្រៀមបង្ហាញខ្លួនហើយ ខណៈដែលរថយន្ត Hybrids ក៏នៅតែមានការពេញនិយមដដែល។ តាមរបាយការណ៌របស់ “Wall Street Journal” បានសសេរថា លោក Jack Hollis ដែលជាអនុប្រធានផ្នែកលក់នៅអាមេរិកខាងជើងរបស់ក្រុមហ៊ុន Toyota បាននិយាយនៅក្នុងបទសម្ភាសន៍ថា អ្នកប្រើប្រាស់នៅមិនទាន់ងាកចេញពីរថយន្តប្រើប្រាស់សាំងទៅកាន់រថយន្តអគ្គិសនីភ្លាមៗនោះទេ។ រថយន្តប្រភេទ Hybrids អាចនឹងក្លាយជាដំណោះស្រាយដែលមានការពេញនិយមខ្លាំងនាពេលខាងមុខសម្រាប់អ្នកប្រើប្រាស់។
លោក Jack Hollis បានជឿជាក់ថា ទីផ្សាររថយន្តអគ្គិសនីក្នុងពេលបច្ចុប្បន្ននេះ គឺមិនទាន់មានភាពចាស់ទុំនៅឡើយទេ។ បន្ថែមពីនេះទៀតនោះ តម្លៃរបស់រថយន្តអគ្គិសនីក៏ខ្ពស់ផងដែរ។ ជាមួយគ្នាតម្លៃរថយន្តអគ្គិសនីជាច្រើន ក៏មានតម្លៃខ្ពស់ផងដែរ នេះគឺដោយសារតែតម្លៃនៃវត្ថុធាតុដើមដូចជា Lithium, Cobalt និងសមាសភាគផលិតថ្មឡើងថ្លៃ។ លោកបានអះអាងថា ក្រុមហ៊ុននេះ នឹងបន្តក្នុងការអភិវឌ្ឍទៅលើរថយន្ត Hybrid ជាច្រើនម៉ូដែលទៀត ដែលមានតម្លៃសមរម្យ។ សម្រាប់រថយន្ត Hybrids គឺមិនមានភាពខុសគ្នាខ្លាំងពីរថយន្តអគ្គិសនីនោះទេ។ បើធៀបជាមួយនឹងរថយន្តម៉ូដែលអគ្គីសនីសុទ្ធនោះ លោក Jack Hollis បានជឿជាក់ថា រថយន្តម៉ូដែល Hybrid នឹងកាន់តែទាក់ទាញអ្នកប្រើប្រាស់កាន់តែច្រើននៅលើទីផ្សារ៕