Tesla ប្រកាសប្រមូលរថយន្ត Model X និង Model Y ចំនួនជាង 32 ម៉ឺនគ្រឿងក្រោយមានបញ្ហាប្រព័ន្ធភ្លើងដំណើរការមិនប្រក្រតី

ក្រុមហ៊ុន Tesla កំពុងប្រកាសប្រមូលរថយន្តជាង 321,000 គ្រឿងរបស់ខ្លួនចូលក្នុងរោងចក្រ ក្រោយរកឃើញថា មានបញ្ហាលើកម្មវិធីដែលបណ្តាលឲ្យប្រព័ន្ធភ្លើងផ្នែកខាងក្រោយលើរថយន្តខ្លះមិនដំណើរការត្រឹមត្រូវ។ ក្រុមហ៊ុនផលិតរថយន្តអគ្គិសនីឈានមុខគេក្នុងលោករបស់សហរដ្ឋអាមេរិកមួយនេះបានប្រកាសពីសកម្មភាពកាលពីថ្ងៃសៅរ៍នៅក្នុងឯកសាររដ្ឋបាលចរាចរណ៍ និងសុវត្ថិភាពផ្លូវជាតិ ឬ National Highway Traffic and Safety Administration នៅក្នុងទម្រង់ឯកសារ PDF ដែលបានដកស្រង់ការផ្សាយដោយបណ្តាញ Reuters បង្ហាញថា ការប្រមូលមកវិញសម្រាប់រថយន្តអគ្គិសនីរបស់ក្រុមហ៊ុន Tesla សម្រាប់ម៉ូដែលរថយន្ត 2023 Model 3 និង 2020 ដល់ 2023 Model Y ដែលផលិតសម្រាប់ទីផ្សារអាមេរិក។

បើតាមសេចក្តីជូនដំណឹងរបស់ស្ថាប័នសុវត្ថិភាពផ្លូវគោកហៅកាត់ថា NHTSA របស់អាមេរិកបាននិយាយថា "នេះជាករណីដ៏កម្របំផុតសម្រាប់បច្ចេកទេសភ្លើងចង្កៀងខាងក្រោយនៅលើផ្នែកម្ខាង ឬទាំងសងខាងនៃយានយន្តដែលមិនដំណើរការដោយប្រក្រតី ដែលអាចបណ្តាលឱ្យមានការរកឃើញកំហុសខុសឆ្គងក្នុងអំឡុងពេលបើកបររថយន្ត"។  ដូចជា នៅពេលចង្កៀងភ្លើងជាន់ហ្រ្វាំង ចង្កៀងភ្លើងបម្រុង និងចង្កៀងភ្លើងប្តូរសញ្ញាសុំបត់ ឬវ៉ាជែងរបស់រថយន្តមិនដំណើរការ។"

ជុំវិញបញ្ហានេះក្រុមហ៊ុន Tesla នឹងដាក់ចេញការធ្វើបច្ចុប្បន្នភាពកម្មវិធីថ្មីសម្រាប់រថយន្តទាំងនោះដើម្បីដោះស្រាយបញ្ហានេះ។ ទោះជាយ៉ាងណាក្រុមហ៊ុនមិនមានរបាយការណ៍បញ្ជាក់អំពីការមានគ្រោះថ្នាក់ណាមួយទាក់ទងនឹងបញ្ហាកើតមានឡើងនោះទេ។ ក្រុមហ៊ុនផលិតរថយន្តអគ្គិសនីល្បីឈ្មោះក្នុងពិភពលោកមួយនេះ បានរកឃើញបញ្ហាបច្ចេកទេសទាំងនេះកាលពីចុងខែតុលា។ ដោយនៅក្នុងសេចក្តីប្រកាសដាច់ដោយឡែកមួយទៀតកាលពីថ្ងៃមុននេះ ក្រុមហ៊ុន Tesla បានក៏ប្រមូលមកវិញនូវរថយន្តប្រហែល 30,000 គ្រឿងដែលរកឃើញមានបញ្ហាលើប្រព័ន្ធពោងសុវត្ថិភាពអ្នកដំណើរផ្នែកខាងមុខដំណើរការមិនប្រក្រតីចំពោះរថយន្ត Model X។

គិតត្រឹមឆ្នាំនេះក្រុមហ៊ុន Tesla បានធ្វើការប្រកាសពីដំណើរការប្រមូលរថយន្តរបស់ខ្លួនមកវិញចំនួន 19 លើកនៅទីផ្សារសហរដ្ឋអាមេរិក។ ដែលកាលពីដើមខែនេះ ក្រុមហ៊ុនបានប្រមូលមកវិញនូវរថយន្ត Model S និង Model X ចំនួន 40,186 គ្រឿង ដែលបញ្ហាផ្នែកទន់ (Software)  ដែលនាំឲ្យបានបញ្ហាលើដៃចង្កូតពិបាកក្នុងការបើកបរ។ ហើយនៅមុននោះ ក្រុមហ៊ុនបានប្រមូលរថយន្តជាងមួយលានគ្រឿងដែលមានបង្ហាញទ្វារដំណើរការមិនត្រឹមត្រូវផងដែរ៕