ក្រុមហ៊ុន BYD បានធ្វើការដាក់បង្ហាញចេញរថយន្តស៊េរីថ្មីម៉ូដែល Seal 06 ដែលជារថយន្ត Plug-in Hybrid ស៊េរីថ្មីរបស់ខ្លួន ដែលកន្លងមក ត្រូវបានគេរំពឹងថា ជាម៉ូដែល Qin L។ ទោះជាយ៉ាងណា Seal 06 គឺជាសមាជិតថ្មីក្នុងគ្រួសារ Seal EV និង Seal DM-i របស់ BYD ដែលកំពុងមានប្រជាប្រិយភាពខ្លាំងនៅលើទីផ្សារនាពេលបច្ចុប្បន្ន។
ចំពោះការឌីស្សាញរបស់ BYD Seal 06 មានភាពប្រណិតទាក់ទាញជាមួយបណ្តោយខ្លួនរាងខ្លីជាង Seal EV និង Seal DM-i បន្តិច។ រថយន្ត Plug-in Hybrid Sedan ស៊េរីថ្មីនេះមានបណ្តោយ 4,830mm, ទទឹង 1,875mm, កម្ពស់ 1,495mm និងគម្លាតពីកង់មុខទៅកង់ក្រោយ 2,790mm ដែលធៀបទៅនឹងម៉ូដែល Qin L ដែលបានបែកធ្លាយលើកមុនដែលមានបណ្តាយ 4830mm, ទទឹង 1900mm និងកម្ពស់ 1495mm, ជាមួយគម្លាតពីកង់មុខទៅកង់ក្រោយ 2790mm។
BYD Seal 06 បានបំពាក់នូវម៉ាស៊ីន Hybrid ទំហំ 1,498ml ដែលអាចផលិតថាមពលបាន 74kW និងអាចជាន់ល្បឿន Top Speed បានដល់ 180k/h។ BYD Seal 06 ត្រូវបានស្ថាបនាឡើងដោយប្រើនូវស្ថាបត្យកម្មគំរូ BYD DM-i Hybrid system និងបានប្រើនៅបច្ចេកវិទ្យាស្នូលដែលមាននៅលើម៉ូដែល Qin L ប៉ុន្តែ មានការផ្លាស់ប្តូរសមាសភាគគ្រឿងតុបតែងមួយចំនួនខុសពី Qin L បន្តិច។
ទោះបីជាកំពុងមានប្រជាប្រិយភាពខ្លាំង និងឈានដល់ចំនុចកំពូលនៅក្នុងទីផ្សាររថយន្តអគ្គិសនីទាំងនៅទីផ្សារប្រទេសចិន និងទីផ្សារពិភពលោកក៏ពិតមែន ប៉ុន្តែ BYD នៅតែបន្តការគាំទ្រសម្រាប់ការផលិតរថយន្តកូនកាត់ ឬ Hybrid Vehicle ជាមួយការប្រើប្រាស់បច្ចេកវិទ្យាទំនើបៗចុងក្រោយរបស់ខ្លួន។ ហើយសម្រាប់ការបង្ហាញខ្លួនរបស់ BYD Seal 06 សបញ្ជាក់ពីការជម្រុញការលក់រថយន្ត Plug-in Hybrid របស់ខ្លួនឲ្យកាន់តែមានប្រសិទ្ធិភាពខ្ពស់ថែមមួយកម្រិតទៀត។
ទោះជាយ៉ាងណា BYD មិនទាន់បានបង្ហើបពីតម្លៃរបស់ Seal 06 Plug-in Hybrid របស់ខ្លួននៅឡើយទេក្នុងពេលនេះ។ ហើយថ្មីៗនេះ BYD ទើបតែបញ្ចេញលក់រថយន្តប្រភេទ mid-side SUV EV ថ្មីរបស់ខ្លួនម៉ូដែល Yuan Up ដែលមានតម្លៃត្រឹមតែ $14,000 ប៉ុណ្ណោះ៕
