ក្រុមហ៊ុនផលិតរថយន្តអគ្គិសនីរបស់ចិន Nio ត្រូវបានគេរាយការណ៍ថា បាននឹងកំពុងដំណើរការផលិតមនុស្សយន្តរបស់ខ្លួន Humanoid Robots។ យោងទៅលើប្រភពចេញពី China Star Market បានឲ្យដឹងថា Nio កំពុងធ្វើតេស្តលើមនុស្សយន្តឈ្មោះថា Kuavo Robot ដែលផលិតដោយក្រុមហ៊ុន Leju Robotics នៅក្នុងរោងចក្ររបស់ខ្លួន។ Kuavo គឺជាមនុស្សយន្តដំបូងគេដែលនឹងគាំទ្រនូវប្រព័ន្ធប្រតិបត្តិការ Huawei Harmony OS Robot ដែល Huawei បានធ្វើការប្រកាសចេញកាលពីអំឡុងព្រឹត្តិការណ៍ HDC 2024 Developer Conference កាលពីខែមិថុនាកន្លងទៅ។
Nio មិនមែនជាក្រុមហ៊ុនផលិតរថយន្តតែមួយដែលប្រើប្រាស់នូវបច្ចេកវិទ្យាមនុស្សយន្ត Humanoid robots ធ្វើការនៅក្នុងខ្សែសង្វាក់ផលិតកម្មរថយន្តរបស់ខ្លួននោះទេ ប៉ុន្តែ ក្រុមហ៊ុននេះហាក់បានជានឹងកំពុងឈានមុខគេក្នុងការអភិវឌ្ឍន៍បច្ចេកវិទ្យាមួយនេះ។ នៅមុនពេលនៃការសាកល្បងមនុស្សយន្ត Kuavo គឺមានមនុស្សយន្តមួយផ្សេងទៀតដែលមានឈ្មោះថា Walker S ដែលផលិតដោយក្រុមហ៊ុន UBTech Robotics ក៏បានទទួលការបណ្តុះបណ្តាលសម្រាប់ការសាកល្បងនៅរោងចក្រ Nio នាំអំឡុងខែកុម្ភៈ ឆ្នាំ 2024 ផងដែរ។ ដែលនេះត្រូវបានគេកត់សម្គាល់ងថា ជាលើកដំបូងនៃការសាកល្បងប្រើមនុស្សយន្ត Walker S ពិតៗនៅក្នុងរថយន្តសង្វាក់ផលិតរថយន្តអគ្គិសនីថ្មី New Energy Vehicle (NEV ) នៅក្នុងរោងចក្រ។
នៅក្នុងអំឡុងពេលនៃការហ្វឹកហាត់សាកល្បងមនុស្សយន្ត Walker S បានប្រើប្រាស់សមត្ថភាពចាប់យករូបភាព និងការបញ្ជូនរបស់វាសម្រាប់ការងារត្រួតពិនិត្យគុណភាពដូចជា ការត្រួតពិនិត្យសោទ្វារ ខ្សែក្រវ៉ាត់កៅអី និងគម្របចង្កៀងមុខជាដើម។ លើសពីនេះ មនុស្សយន្តនេះអាចដាក់ស្លាកសញ្ញារថយន្តដូចដែលបានបង្ហាញក្នុងវីដេអូដែលចែករំលែកដោយ UBTech Robotics ថែមទៀតផង។ នៅខែមេសា ឆ្នាំ 2024 លោក Yi Peng ដែលជាប្រធានផ្នែកមនុស្សយន្តរបស់ Nio សម្រាប់វិស្វកម្មបញ្ញា ឬហៅថា “intellectual engineering” បានបង្ហាញអំពីការបង្កើត "ក្រុម" នៃមនុស្សយន្ត នៅឯសន្និសីទបរិស្ថានមនុស្សយន្តរបស់ប្រទេសចិន។
លោក Yi ក៏បានគូសបញ្ជាក់ពីផ្នែកសំខាន់ពីរនៃការផ្តោតអារម្មណ៍សម្រាប់ការខិតខំក្នុងការបង្កើតក្រុមមនុស្សយន្តរបស់ Nio ថែមទៀតផងដូចជា Nio បានបង្កើត "ក្រុម" នៃមនុស្សយន្ដមនុស្សយន្តនៅឆ្នាំ 2023 ដោយផ្តោតលើផ្នែកសំខាន់ៗចំនួនពីរ៖ គឺការជួសជុលដៃមនុស្សយន្តនៅក្នុងកន្លែងចង្អៀត និងកិច្ចការច្រើនជាមួយប្រព័ន្ធ 5G និងក្បួនដោះស្រាយសម្រាប់ចក្ខុវិស័យ ឬ vision algorithm។
មួយទៀត គឺការប្រើប្រាស់មនុស្សយន្ត humanoid robots នៅក្នុងដំណើរការត្រួតពិនិត្យគុណភាពមួយចំនួនរបស់រថយន្ត។ នៅខណៈពេលដែលវិសាលភាពនៃការសហការរបស់ Nio ជាមួយក្រុមហ៊ុន Huawei និង Leju Robotics នៅមិនទាន់មានភាពច្បាស់លាស់ ការធ្វើតេស្តលើមនុស្សយន្ត Kuavo ដែលដំណើរការដោយ HarmonyOS គឺជាជំហានដ៏សំខាន់ក្នុងការខិតខំប្រឹងប្រែងរបស់ក្រុមហ៊ុនក្នុងការបញ្ចូលមនុស្សយន្តចូលទៅក្នុងដំណើរការផលិតកម្មរបស់ក្រុមហ៊ុន៕
