ថ្មីៗនេះក្រុមហ៊ុន Xiaomi បានបញ្ចេញគំរូរថយន្តសមាជិកថ្មីក្នុងត្រកូលរថយន្តអគ្គិសនីដំបូងរបស់ខ្លួន គឺ SU7 Ultra។ ហើយនៅពេលនេះ Xiaomi ក៏បានធ្វើការបញ្ជាក់ផ្លូវការណ៍ថា SU7 Ultra នឹងមកដល់នៅលើទីផ្សារនាឆមាសដំបូងក្នុងឆ្នាំ 2025។
តាមគំរូដែលក្រុមហ៊ុនបានបង្ហាញ គឺ SU7 Ultra នៅរក្សាទម្រង់នៃការឌីស្សាញដូចគ្នានឹងម៉ូដែល SU7 ដែលចេញលក់នៅលើទីផ្សារបច្ចុប្បន្នដដែល គ្រាន់តែមានការកែប្រែឲ្យវាមើលទៅមានលក្ខណៈបែបរថយន្តស្ព័រ ឬរថយន្តប្រណាំង ដោយមានការបំពាក់នូវផ្ទាំង bumper លយចេញមកខាងមុខបន្តិច និងកន្ទុយ Spoiler ជាដើម។
បើតាមការបញ្ជាក់ពីលោក Lei Jun នាយកប្រតិបត្តិជាន់ខ្ពស់របស់ Xiaomi បានឲ្យដឹងថា Xiaomi SU7 Ultra គឺជាកំពូលរថយន្តអគ្គិសនីដែលមានសមត្ថភាពខ្លាំងបំផុតមិនធ្លាប់មាន ដោយរថយន្តថ្មីនេះ នឹងមានការបំពាក់នូវប្រព័ន្ធម៉ូទ័រខ្លាំងចំនួន 3 និងកញ្ចប់អាគុយគុណភាពខ្ពស់បំផុតមិនធ្លាប់មាន។ Xiaomi SU7 Ultra នឹងបំពាក់ម៉ូទ័រអគ្គិសនីដែលផលិតដោយក្រុមហ៊ុនផ្ទាល់តែម្តង ដោយក្នុងនោះមានម៉ូទ័រខាងក្រោយចំនួនពីរជាប្រភេទ V8s Electric Motor ដែលមានប្រព័ន្ធរង្វិល 27,200rpm និងម៉ូទ័រមុខប្រភេទ V6s Electric motor ដែលសរុបកំលាំងម៉ូទ័រទាំងបីបញ្ចូលគ្នា គឺអាចផលិតបានដល់ 1,548 សេះ។
ជាមួយកំលាំងដ៏ខ្លាំងនេះ គឺអនុញ្ញាតិឲ្យ SU7 Ultra អាចជាន់សន្ទុះល្បឿនពី 0 ទៅ 100km/h ប្រើពេលប្រមាណតែ 1.97 វិនាទី ឬ 200km/h ប្រើពេលខ្ទង់ 5.98 វិនាទី និងអាចជាន់ល្បឿនលឿនបំផុត (Top-speed) បានដល់ 350km/h។ សម្រាប់កញ្ចប់អាគុយអគ្គិសនីដែលត្រូវបាននៅលើ Xiaomi SU7 Ultra វិញត្រូវបានគេដឹងថាជាកញ្ចប់អាគុយជំនាន់ថ្មីដែលផលិតដោយក្រុមហ៊ុន CATL ស៊េរី Qilin II ឬ Kirin II។ បើតាមរូបគំរូរបស់ Xiaomi SU7 Ultra ដែលបានបង្ហាញ ឃើញថា តួរខ្លួនរបស់រថយន្តនេះ គឺបានស្រោបពេញដោយសារធាតុលោហៈកាបោនហ្វៃប៊ឺ (Full carbon fiber)។
ប៉ុន្តែ បើតាមការបញ្ជាក់ពីលោក Lei Jun នៅពេលសង្វាក់ផលិតកម្មដំណើរការ គឺអាចនឹងមានការកាត់បន្ថយផ្នែកមួយចំនួនដើម្បីកាត់បន្ថយតម្លៃដើម និងតម្លៃលក់។ យ៉ាងណាមិញសម្រាប់តម្លៃរបស់ SU7 Ultra លោក Jun មិនបានបង្ហើបឲ្យដឹងនៅឡើយទេក្នុងពេលនេះ ដោយលោកគ្រាន់តែបានបញ្ជាក់ថា តម្លៃរបស់ SU7 Ultra នឹថ្លៃជាងម៉ូដែល SU7 ស្តង់ដារបច្ចុប្បន្នដែលមានតម្លៃចាប់ពីខ្ទង់ $29,700។ ចំនែកតម្លៃរបស់ម៉ូដែល SU7 Max ដែលមិនទាន់បានចេញលក់ផ្លូវការណ៍វិញ គឺខ្ទង់ប្រហែលជាង $40,000។
ក្រៅតែពីការបង្ហាញគំរូរបស់ Xiaomi SU7 Ultra ក្រុមហ៊ុនផលិត Xiaomi Auto ត្រូវបានគេដឹងថា ក៏កំពុងធ្វើការផលិត SU7 ម៉ូដែលថ្មីមួយផ្សេងទៀតផងដែរ ដែលត្រូវគេដឹងថាជាម៉ូដែល SU7 FE។ ហើយគេដឹងទៀតថា ម៉ូដែល FE នេះ គឺមានបំពាក់ម៉ូទ័រអគ្គិសនីបី ដែលអាចផលិតកំលាំងបានដល់ 1,074 សេះ អាចជាន់ស្ទុះល្បឿនពី 0 ទៅ 100km/h ប្រើពេលខ្ទង់ 1.98 វិនាទី ហើយម៉ូដែលនេះអាចនឹងមានតម្លៃជាង $46,000៕
