រថយន្តអគ្គិសនី Xpeng Mona M03 មានការកក់មុនជាង 3 ម៉ឺនគ្រឿង ត្រឹម 48 ម៉ោងប៉ុណ្ណោះ

ក្រុមហ៊ុនផលិតរថយន្តអគ្គិសនី Xpeng បានប្រកាសចេញរថយន្តអគ្គិសនីប្រភេទ Crossover ស៊េរីថ្មីម៉ូដែល Mona M03 កាលពីថ្ងៃទី 27 ខែសីហាថ្មីៗនេះ។ ហើយនៅថ្ងៃនេះ នៅក្នុងពិធីព័រណ៌ Chengdu Auto Show ក្រុមហ៊ុនបានប្រកាសថា ខ្លួនបានទទួលការកក់មុនសម្រាប់ Mona M03 បានចំនួនជាង 3 ម៉ឺនគ្រឿងរួចហើយ បន្ទាប់ពីការប្រកាសចេញបានរយះពេល 48 ម៉ោង។ លោក He Xiaopeng ដែលជាស្ថាបនិក និងជាអគ្គនាយក និងជានាយប្រតិបត្តិក្រុមហ៊ុន Xpeng បានធ្វើការប្រគល់រថយន្ត Mona M03 ម៉ូដែលដំបូងទៅកាន់ដៃម្ចាស់រថយន្តនេះដំបូងគេ។

Xpeng Mona M03 មានតម្លៃខ្ទង់ $16,900។ ដោយឡែកសម្រាប់ម៉ូដែលផ្សេងមួយទៀត គឺ Mona M03 Max ដែលបំពាក់នូវបច្ចេកវិទ្យា Advanced Urban Driving system អាចនឹងបង្ហាញវត្តមាននៅក្រោយពិធីបុណ្យចូលឆ្នាំថ្មីប្រពៃណីចិនឆ្នាំ 2025។ Mona M03 មានប្រវែងបណ្តោយ 4,780mm/ ទទឹង 1,896mm និងកម្ពស់ 1,445mm ជាមួយការឌីស្សាញបែប Aerodynamic ដែលជួយកាត់បន្ថយទំងន់របស់រថយន្ត។

រថយន្តនេះមានបំពាក់អេក្រង់ទំហំ 15.6-inch គាំទ្រដំណើរការដោយបន្ទះឈីប Qualcomm Snapdragon 8155 និងគាំទ្រមុខងារបង្ហាញរូបភាពកម្រិត 360 ដឺក្រេ 360-degree panoramic imaging និងផែនទីបែប 3D map rendering ថែមទៀតផង។ Xpeng Mona M03 មានជម្រើសប្រើម៉ូទ័រអគ្គិសនីពីរកំលាំងផ្សេងគ្នា គឺកំលាំង 140kW និង 160kW ជាមួយជម្រើសកញ្ចប់អាគុយទំហំ 51.8kWh ឬ 62.2kWh។ រថយន្ត Crossover នេះ មានទំងន់សរុប 1,739kg។

ក្រុមហ៊ុន Xpeng បានដាក់គោលដៅក្នុងការលក់ Mona M03 ឲ្យបានចំនួន 10,000 គ្រឿងក្នុងមួយខែ។ សូមបញ្ជាក់ថាប្រាក់ចំណូលរបស់ក្រុមហ៊ុន Xpeng មានការកើនឡើងប្រមាណ 14% នៅត្រីមាសទីពីរក្នុងឆ្នាំ 2024 ដោយបានឈានមុខក្រុមហ៊ុមប្រកូតប្រជែងរបស់ខ្លួនដូចជា Nio ជាដើម។ ទោះជាយ៉ាងណាសម្រាប់ការលក់របស់ Xpeng ចាប់ពីខែមករា ដល់ខែកក្តដា ឆ្នាំ 2024 គឺមានចំនួនត្រឹមតែ 63,000 គ្រឿងប៉ុណ្ណោះ ដែលជាចំនួនតិចជាងការរំពឹងទុករបស់ក្រុមហ៊ុន៕