Hyundai កំពុងបោះទុន 1.52 ពាន់លានដុល្លារអាមេរិកដើម្បីសាងសងរោងចក្រផលិតរថយន្តអគ្គិសនីថ្មីដំបូងនៅទឹកដីកូរ៉េខាងត្បូង

ក្រុមហ៊ុន Hyundai Motors បានប្រកាសថ្ងៃនេះថា ក្រុមហ៊ុនខ្លួនបានចាប់ផ្តើមការសាងសងរោងចក្រផលិតរថយន្តអគ្គិសនីថ្មីនៅតំបន់ Ulsan របស់ប្រទេសកូរ៉េខាងត្បូងដែលជាទឹកដីកំណើតរបស់ខ្លួនផ្ទាល់តែម្តង។ គម្រោងការវិនិយោគក្នុងការសាងសងរោងចក្រថ្មីនេះ គឺត្រូវចំនាយទឹកប្រាក់ប្រមាណ 1.52 ពាន់លានដុល្លារអាមេរិក ហើយក៏ជាក្រុមហ៊ុនដំបូងដែលបានសាងសងឡើងនៅលើទឹកដីកំណើតក្នុងរយះពេល 29 ឆ្នាំមកនេះផងដែរ។

បើតាមការបញ្ជាក់ពីក្រុមហ៊ុនដំណើរការសាងសងរោងចក្រផលិតរថយន្តអគ្គិសនីថ្មីដំបូងក្នុងប្រទេសកូរ៉េខាងត្បួងនេះ អាចនឹងត្រូវបញ្ចប់ការសាងសងជាស្ថាពរនៅក្នុងឆ្នាំ 2025 ហើយដំណើរការសង្វាក់ផលិតកម្មរថយន្តអគ្គិសនីជំហ៊ានដំបូងក្នុងរោងចក្រថ្មីនេះរំពឹងថា នឹងចាប់ផ្តើមនៅឆ្នាំ 2026។ 

Hyundai Motors Group បច្ចុប្បន្នមានគ្រប់គ្រងលើម៉ាកយីហោរថយន្តដូចជា Hyundai, Kai និង Genesis ហើយសម្រាប់រថយន្តអគ្គិសនីដំបូងដែលចេញពីរោងចក្រថ្មីនៅឆ្នាំ 2026 អាចជាម៉ូដែល SUV នៃម៉ាក Genesis តែម្តង។ សម្រាប់ខ្សៃសង្វាក់ផលិតកម្មនៅក្នុងរោងចក្រថ្មីនេះត្រូវបានគេប៉ាន់ប្រមាណថា អាចផលិតបានចំនួន 20 ម៉ឺនគ្រឿងក្នុងមួយឆ្នាំ។

បច្ចុប្បន្ននេះ Hyundai Motors ក៏មានរោងចក្រស្រាប់កំពុងដំណើរការសង្វាក់ផលិតរថយន្តរបស់ខ្លួននៅក្នុងតំបន់ Ulsan របស់កូរ៉េខាងត្បូងផងដែរ ដោយរោងចក្របច្ចុប្បន្នមានលទ្ធភាពអាចធ្វើការផលិតបានដល់ 1.4 លានគ្រឿងក្នុងមួយឆ្នាំ និងការនាំចេញបាន 1.1 លានគ្រឿងក្នុងមួយឆ្នាំ។ ហើយជាមួយការបង្កើតរោងចក្រថ្មីនេះគឺនឹងបង្កើនចំនួនផលិតកម្មបានបរិមាណកាន់តែច្រើនបន្ថែមទៀតពីលើសង្វាក់ផលិតកម្មដែលមានស្រាប់។ 

នាយកប្រតិបត្តិរបស់ក្រុមហ៊ុនបាននិយាយថា Hyundai កំពុងផ្តោតលើមជ្ឈមណ្ឌលផលិតក្នុងស្រុក និងនៅសហរដ្ឋអាមេរិកសម្រាប់ពេលបច្ចុប្បន្ននេះ ហើយក្រុមហ៊ុននៅមិនទាន់មានផែនការណាមួយក្នុងការបន្ថយល្បឿនសម្រាប់ផលិតកម្មរថយន្តអគ្គិសនី (EV) របស់ខ្លួននោះទេ មិនដូចដៃគូប្រជែងមួយចំនួនរបស់ខ្លួនដែលកំពុងមានការព្រួយបារម្មជុំវិញតម្រូវការរថយន្ត (EV) ធ្លាក់ចុះ។ ចំពោះសម្ព័ន្ធក្រុមហ៊ុន Hyundai Motor Group បច្ចុប្បន្ននេះ បាននឹងកំពុងសម្លឹងមើលទៅលើអនាគតនៃការមកដល់សម្រាប់រថយន្តអគ្គិសនីរបស់ខ្លួនចំនួន 31 ម៉ូដែល ត្រឹមឆ្នាំ 2030 មកពីគ្រប់សាខាក្រុមហ៊ុនទាំងអស់របស់ខ្លួនថែមទៀតផង៕