រថយន្តអគ្គិសនីម៉ូដែលថ្មីពី Xiaomi ម៉ូដែល YU7 ដែលជាប្រភេទរថយន្ត SUV ត្រៀមបង្ហាញខ្លួនលើទីផ្សារឆាប់ៗនេះ គឺនឹងមានសមត្ថភាពអាចបើកបរបានចម្ងាយផ្លូវឆ្ងាយ និងបំពាក់នូវបច្ចេកវិទ្យាទំនើបចុងក្រោយបំផុត។ ថ្មីៗនេះ ស្ថាប័ន MIIT ឬ Ministry of Industry and Information Technology ក្នុងប្រទេសចិនបានធ្វើការវិញ្ញាណបនប័ត្របញ្ជាក់ថា Xiaomi YU7 គឺមានសមត្ថភាពអាចជិះបានចម្ងាយផ្លូវដល់ 770km។
រថយន្តអគ្គិសនីប្រភេទ SUV ដំបូង និងជាម៉ូដែលទីពីររបស់ក្រុមហ៊ុន Xiaomi បន្ទាប់ពី SU7 ដែលជារថយន្ត sedan កំពុងមានប្រជាប្រិយភាពខ្លាំងនៅលើទីផ្សារបច្ចុប្បន្ន ត្រូវបានគេរំពឹងថា នឹងបង្ហាញវត្តមានលើទីផ្សារជាផ្លូវការណ៍នៅរវាងខែមិថុនា និងខែកក្ដដា ឆ្នាំ 2025 នេះ។ ហើយគំរូនៃការរចនារូបរាងផ្លូវការណ៍ត្រូវបានក្រុមហ៊ុន Xiaomi បញ្ចេញជាច្រើនមកហើយមួយរយះពេលចុងក្រោយនេះ។
ទៅលើការរចនាផ្នែកខាងមុខរបស់ YU គឺរក្សា DNA Design ដូចគ្នានឹងម៉ូដែល SU7 ដែរ។ រថយន្ត SUV ស៊េរីថ្មីនេះ មានការរចនាបែប Aerodynamic ដែលនឹងជួយកាត់បន្ថយកំលាំងកកិតដោយខ្យល់ក្នុងពេលបើកបរ ជាមួយដៃទ្វាររចនាលាក់ចូលក្នុងទ្វារដែលហៅថា semi-concealed door handles ជាមួយកញ្ចក់ទ្វាររចនាបែប Frameless ដែលជួយធ្វើឲ្យរូបរាងរបស់ YU7 កាន់តែមានភាពប្រណិត។
Xiaomi YU7 មានបណ្តោយតួរខ្លួន 4,999mm/ទទឹង 1,996mm/កំពស់ 1,608mm និងមានគម្លាតចន្លោះកង់មុខទៅកង់ក្រោយ 3,000mm។ ផ្នែកខាងក្រោយរបស់ YU7 មានការរចនាលក្ខណៈបែបស័្ពរជាមួយកន្ទុយ Ducktail spoiler រំលេចជាមួយចង្កោមចង្កៀងបំភ្លឺប្រភេទ LED ពេញខាងក្រោយតែម្តង។ នៅលើដំបូលខាងមុខមានបំពាក់នូវសែនស័រ LiDAR សម្រាប់ដំណើរការប្រព័ន្ធជំនួយការបើកបរ Advanced Autonomous driving។ តាមប្រភពបានបញ្ជាក់ថា Xiaomi YU7 ក៏នឹងមានជម្រើសម៉ូដែលមិនបំពាក់សែនស័រ LiDAR ផងដែរ ប៉ុន្តែ បំពាក់នូវប្រព័ន្ធបើកបរស្វ័យប្រវត្តិ Self-driving ដែលអភិវឌ្ឍន៍ដោយក្រុមហ៊ុន Xiaomi ផ្ទាល់តែម្តង។ នៅផ្នែកខាងក្នុង YU7 គឺមានបំពាក់បច្ចេកវិទ្យាអេក្រង់លាតពេញកាប៊ីនខាងមុខតែម្តងដែលផ្តល់នូវការបង្ហាញព័ត៌មានផ្សេងៗរបស់រថយន្ត និងប្រព័ន្ធកម្សាន្តក្នុងរថយន្តជាដើម។
រថយន្តអគ្គិសនី SUV ស៊េរីថ្មីដំបូងរបស់ Xiaomi នឹងផ្តល់ជូននៅជម្រើសប្រើម៉ូទ័រអគ្គិសនីមួយ និងម៉ូទ័រអគ្គិសនីពីរ។ ដោយក្នុងនោះម៉ូដែលប្រើម៉ូទ័រពីរមានកំលាំងសរុប 508kW ឬ 691 សេះ (hp) ដែលម៉ូទ័រខាងមុខមានកំលាំង 220kW និងម៉ូទ័រខាងក្រោយមានកំលាំង 288kW ហើយអាចជាន់ល្បឿនលឿនបំផុត ឬ Top speed បានដល់ 253km/h។
រីម៉ូដែលប្រើ Dual-motor មួយទៀតមានកំលាំងសរុប 365kW ដោយប្រើម៉ូទ័រខាងមុខកំលាំង 130kW និងម៉ូទ័រខាងក្រោយ 135kW។ ហើយសម្រាប់ម៉ូដែលប្រើម៉ូទ័រមួយ ឬ Single-motor គឺមានកំលាំង 235kW និងអាចជាន់ល្បឿន Top Speed បានដល់ 240km/h។
ក្រៅតែពីមានជម្រើសកំលាំងម៉ូទ័របីជម្រើសផ្សេងគ្នាទៅ Xiaomi YU7 ក៏ផ្តល់ជូននៅជម្រើសកញ្ចប់អាគុយអគ្គិសនីបីទំហំផ្សេងគ្នាផងដែរជាប្រភេទកញ្ចប់អាគុយ NMC Battery Pack។ ក្នុងនោះមានទំហំ 96.3kWh សាកភ្លើងពេញម្តងអាចជិះបានចម្ងាយផ្លូវ 770km, 760km និង 675km ទៅតាមជម្រើសម៉ូដែលរៀងគ្នា។ ជម្រើសកញ្ចប់អាគុយទំហំ 101.7kWh សាកភ្លើងពេញម្តងអាចជិះបានចម្ងាយផ្លូវ 670 km, 750 km, និង 760 km ហើយសម្រាប់ជម្រើសកញ្ចប់អាគុយ LFP វិញ នឹងមានតែសម្រាប់ម៉ូដែលប្រើម៉ូទ័រអគ្គិសនី។ Xiaomi YU7 ត្រូវបានគេព្យាករណ៍ថា អាចនឹងមានតម្លៃចាប់ពីខ្ទង់ $33,802 ឡើងទៅ៕
