Nio មានចំណាប់អារម្មក្នុងការទិញយករោងចក្រផលិតរថយន្តអគ្គិសនីរបស់ Audi នៅប្រទេសបែលហ្សិក

មានសេចក្តីរាយការណ៍ថា ក្រុមហ៊ុនផលិតរថយន្តអគ្គិសនីរបស់ប្រទេសចិន Nio កំពុងពិចារណាទិញរោងចក្រផលិតរថយន្តអគ្គិសនីរបស់ Audi នៅប្រទេសបែលហ្សិក។ បច្ចុប្បន្ន នេះ រោងចក្រ Vorst របស់ Audi ដែលផលិតរថយន្តម៉ាក Audi Q8 e-tron គឺស្ថិតនៅក្រោមការគំរាមកំហែងក្នុងការបិទទ្វារ។

យោងតាមកាសែត Flemish De Tijd ក្រុមហ៊ុនផលិតរថយន្តប្រណិតរបស់អាឡឺម៉ង់មួយនេះ កំពុងស្វែងរកយ៉ាងអ្នកទិញរោងចក្ររបស់ខ្លួនដែលជាជម្រើសតែមួយគត់ចំពោះការបិទទ្វារ។ សម្រាប់រថយន្តម៉ូដែល Audi Q8 e-tron គ្រោងនឹងចាប់ផ្តើមខ្សែសង្វាក់ផលិតកម្មនៅឆ្នាំក្រោយ ហើយបន្ទាប់ពីនោះបុគ្គលិកចំនួន 2,910 នាក់ដែលធ្វើការនៅរោងចក្រនឹងត្រូវប្រឈមមុខនឹងការបញ្ឈប់ពីការងារ។

ក្នុងរយៈពេលប៉ុន្មានសប្តាហ៍កន្លងមកនេះ គណៈប្រតិភូមកពី Nio បានទៅមើលទីតាំងរោងចក្ររបស់ Audi ហើយពួកគេមានពេលរហូតដល់ថ្ងៃទី 23 ខែកញ្ញា ដើម្បីធ្វើការជូនដំណឹងជាផ្លូវការ។ រោងចក្រនេះមានទីតាំងនៅក្នុងក្រុងមួយក្នុងចំណោមក្រុងទាំង 19 ដែលបង្កើតជាតំបន់រាជធានី Brussels។ ក្រុមហ៊ុនផលិតរថយន្តអគ្គិសនីរបស់ប្រទេសចិន Nio បានចូលប្រឡូកក្នុងទីផ្សារអ៊ឺរ៉ុបជាលើកដំបូងក្នុងឆ្នាំ 2021 ជាមួយនឹងការចែកចាយរថយន្តដំបូងម៉ូដែល ទៅកាន់ប្រទេសន័រវេស។

នៅក្នុងខែមិថុនា ការចុះបញ្ជីរថយន្ត Nio របស់អាឡឺម៉ង់មានត្រឹមតែ 44 គ្រឿងប៉ុណ្ណោះ បើធៀបនឹងក្រុមហ៊ុន BYD ដែលមានចំនួន  425 គ្រឿង និង MG មានចំនួន 5,158 គ្រឿង។ ចាប់តាំងពីខែកក្កដាមក Nio បានជាប់ពន្ធនៅសហភាពអឺរ៉ុបទៅលើរថយន្តអគ្គិសនីនាំចូលពីចិនចូលទៅទីផ្សារតំបន់អឺរ៉ុប។ បច្ចុប្បន្ន Nio ជាប់ពន្ធប្រមាណ 20.8% បន្ថែមពីលើពន្ធគយ 10% ដែលមានស្រាប់។ បច្ចុប្បន្នសហភាពអឺរ៉ុបកំពុងស្ថិតក្នុងដំណើរការផ្តល់សច្ចាប័នលើពន្ធអចិន្ត្រៃយ៍បន្ថែមទៀតសម្រាប់រយៈពេលប្រាំឆ្នាំខាងមុខ។

សម្រាប់ការចាប់អារម្មណ៍របស់ Nio ចំពោះការទិញយករោងចក្រផលិតរថយន្តអគ្គិសនី Audi នៅបែលហ្សិក គឺជារឿងដ៏គួរឲ្យចាប់អារម្ម ព្រោះថាកាលពីដើមឆ្នាំ 2024 នេះ ក្រុមហ៊ុនផលិតរថយន្តទាំងពីរត្រូវបានជាប់គាំងក្នុងការតស៊ួជាមួយគ្នាតាមផ្លូវច្បាប់ជុំវិញសិទ្ធិប្រើប្រាស់ឈ្មោះរថយន្ត ES6 និង ES7 ដែល Audi បានអះអាងថា បានរំលោភលើកម្មសិទ្ធិពាណិជ្ជសញ្ញារបស់ខ្លួន។ យ៉ាងណាមិញនៅមិនទាន់មានការបញ្ជាក់ផ្លូវការណ៍ណាមួយពីក្រុមហ៊ុន Nio សម្រាប់ចំណាប់អារម្មក្នុងការទិញយករោងចក្រផលិតរថយន្តអគ្គិសនីរបស់ Audi នៅប្រទេសបែលហ្សិកនៅឡើយទេក្នុងពេលនេះ៕