រថយន្តប្រណិត Denza នឹងឈានជើងចូលទីផ្សារប្រទេសអូស្ត្រាលី នៅឆមាសទី 2 ឆ្នាំ 2025 ខាងមុខ

Denza ដែលជាម៉ាកយីហោរថយន្តប្រណិតរបស់ក្រុមហ៊ុន BYD បានបញ្ជាក់ថា នឹងឈានជើងចូលទីផ្សារប្រទេសអូស្រ្តាលីជាមួយនឹងការប្រកាសចេញរថយន្តដំបូងរបស់ខ្លួនជាប្រភេទ off-road SUV ដើម្បីធ្វើការប្រគូតប្រជែងជាមួយនឹង Toyota Prado។ បើតាមការបញ្ជាក់ពីក្រុមហ៊ុនមេ គឺ BYD បានឲ្យដឹងថា ម៉ាករថយន្ត Denza នឹងបង្ហាញវត្តមាននៅទីផ្សារអូស្ត្រាលីដែលមានច្រើនជាងមួយម៉ូដែល។ Denza នឹងឈានជើងចូលទីផ្សារប្រទេសអូស្ត្រាលីនៅឆមាសទីពីរនៃឆ្នាំ 2025 បើតាមការបញ្ជាក់ពីក្រុមហ៊ុនផ្ទាល់។

ម៉ាករថយន្ត Denza នឹងឈានជើងចូលទីផ្សារអូស្ត្រាលីមុនម៉ាករថយន្ត Yangwang ខណៈដែល BYD បាននឹងកំពុងធ្វើការពិចារណាក្នុងការនាំយកម៉ាករថយន្តមួយនេះចូលទៅកាន់ទឹកដីប្រទេសអូស្ត្រាលី បើទោះបីជាថ្មីៗនេះ មានការបែកធ្លាយនូវរថយន្ត SUV ប្រណិត Yangwang U8 ដែលប្រើចង្កូតស្តាំបើកបរនៅលើដងវិថីក្នុងទឹកដីប្រទេសអូស្ត្រាលី។

អ្នកគ្រប់គ្រងទូទៅរបស់ BYD ប្រចាំតំបន់អាស៊ីប៉ាស៊ីហ្វិក លោក Liu Xueliang បាននិយាយថា ក្រុមហ៊ុនដែលមានជំនាញផ្នែកផលិតរថយន្ត Hybrid និងរថយន្តអគ្គិសនី គឺ "ពិតជានឹងចាប់ផ្តើមបង្ហាញម៉ាកយីហោរថយន្ត Denza នៅក្នុងប្រទេសអូស្ត្រាលី"។ លោក Xueliang ត្រូវបានគេដកស្រង់សំដីដូច្នេះថា៖ « BYD កំពុងធ្វើការពិចារណាបន្ត ថាតើម៉ូដែល Denza មួយណាដែលយើងនឹងនាំចូលទឹកដីប្រទេសអូស្ត្រាលី»។ 

សម្រាប់រថយន្ត Denza ម៉ូដែលដំបូង ដែលឈានជើងចូលទីផ្សារអូស្រ្តាលីអាច Denza B5 ដែលជាប្រភេទរថយន្ត Plug-in-hybrid SUV។ រថយន្តនេះជាប្រភេទ off-road SUV ប្រាំកៅអី ហើយមានទំហំវិមាត្រប្រហាក់ប្រហែលគ្នានឹងរថយន្តម៉ូដែល Toyota LandCruiser Prado, Ford Everest និង Isuzu MU-X ដែរ។ ហើយសម្រាប់រថយន្តម៉ាក Denza ដែលកំពុងមានវត្តមាននៅលើទីផ្សារពិភពលោកបច្ចុប្បន្នរួមមាន D9 multi-purpose vehicle, N7 mid-size SUV, N9 large SUV, Z9 sedan, និង Z9 GT wagon ដែលជារថយន្តដំណើរការដោយថាមពលអគ្គិសនីសុទ្ធ។

Denza នឹងចូលរួមជាសមាកជិកក្រុមហ៊ុនរថយន្តថ្មី ដែលត្រឡប់ចូលទឹកដីប្រទេសអូស្រ្តាលីជាមួយក្រុមហ៊ុនផ្សេងៗទៀតដូចជា Aion, Cadillac, Deepal, Foton, GAC, Geely, GMC, JAC, Jaecoo, Leapmotor, Skywell, Smart, Xpeng និង Zeekr…ជាដើម។

រថយន្ត BYD ដែលត្រូវបានចែកចាយដោយ EVDirect របស់អូស្ត្រាលី ហើយលក់រថយន្តបានជាង 35,000 គ្រឿងនៅក្នុងប្រទេសអូស្ត្រាលីចាប់តាំងពីពីការបង្ហាញវត្តមានកាលពី 3 ឆ្នាំមុន ដោយរថយន្តដំបូងបង្អស់របស់ BYD ដែលបានប្រកាសចេញក្នុងទីផ្សារប្រទេសអូស្ត្រាលី គឺជារថយន្តអគ្គិសនីខ្នាត mid-size SUV ម៉ូដែល Atto 3៕