នៅថ្ងៃទី 26 ខែកក្កដា ឆ្នាំ 2016 នេះ Bosch ដែលជាក្រុមហ៊ុនឈានមុខគេមួយនៅលើពិភពលោកខាងផ្នែកផ្តត់ផ្គង់បច្ចេកវិទ្យា និងសេវាកម្ម បានធ្វើការបូកសរុបតួលេខលក់របស់ខ្លួននៅក្នុងប្រទេសកម្ពុជាសម្រាប់សារពើពន្ធឆ្នាំ 2015 ជាមួយនឹងកំណើនជាវិជ្ជមាន។ នេះគឺជាឆ្នាំទីប្រាំដែល Bosch ទទួលបានកំណើនតួលេខជាភាគរយពីរខ្ទង់ជាប់ៗគ្នាចាប់តាំងពីក្រុមហ៊ុនចូលមកក្នុងប្រទេសកម្ពុជាកាលពីឆ្នាំ 2010។
លោក Andre de Jong អគ្គនាយកក្រុមហ៊ុន Bosch ប្រចាំនៅកម្ពុជាបានមានប្រសាសន៍ថា កម្ពុជាគឺជាទីផ្សារដ៏សំខាន់មួយសម្រាប់ការរីកចម្រើននៃអាជីវកម្មរបស់ Bosch នៅក្នុងតំបន់អាស៊ីអាគ្នេយ៍។ កម្ពុជាទទួលបានកំណើនសេដ្ឋកិច្ចជាងប្រាំពីរភាគរយក្នុងអំឡុងពេលជាងប្រាំឆ្នាំមកនេះ ជាពិសេសយើងឃើញមានកំណើនគួឲ្យកត់សំគាល់ក្នុងវិស័យសំណង់ និងយានយន្ត។ ក្នុងនាមជាក្រុមហ៊ុននាំមុខគេមួយក្នុងវិស័យបច្ចេកវិទ្យាយានយន្ត ប្រព័ន្ធសុវត្ថិភាព និងឧបករណ៍ជាងជំនាញ Bosch បានពង្រីកនូវការផ្គត់ផ្គង់ផលិតផល និងសេវាកម្មដែលមានគុណភាពខ្ពស់ដើម្បីលើកកម្ពស់កំរិតស្តង់ដាគុណភាពក្នុងវិស័យទាំងពីរខាងលើនេះ។”
នៅក្នុងឆ្នាំ 2015 វិស័យអាជីវកម្មផ្នែកបច្ចេកវិទ្យាយានយន្តរបស់ Bosch នៅក្នុងប្រទេសកម្ពុជានៅតែបន្តទទួលបានកំណើនជាវិជ្ជមានស្របគ្នាទៅនឹងការរីកចម្រើនរបស់វិស័យយានយន្តនៅកម្ពុជា។ បើយោងតាមក្រសួងសាធារណការ និងដឹកជញ្ជូន ចំនួនយានជំនិះដែលបានចុះបញ្ជីថ្មីនៅក្នុងឆ្នាំ 2015 មានកំណើន 14ភាគរយ ដែលចំនួនសរុបបានកើនដល់ 3.2 លានគ្រឿង ក្នុងនោះទោចក្រយាន្តមានចំនួនប្រមាន 2,7 លានគ្រឿង។ លោក De Jong បានមានប្រសាសន៍ថា៖ “កំណើននេះធ្វើឲ្យយានយន្តនៅក្នុងប្រទេសកម្ពុជាកាន់តែចម្រុះម៉ូដម៉ាក។ Bosch គាំទ្រការអភិវឌ្ឍន៍នេះដោយពង្រីកនូវប្រភេទផលិតផលបន្ថែមជាច្រើនដើម្បីឆ្លើយតបទៅនឹងតម្រូវការរបស់ទីផ្សារ។ ជាពិសេសនៅក្នុងឆ្នាំនេះ ក្រុមហ៊ុនបានចាប់ផ្តើមផ្គត់ផ្គង់គ្រឿងបន្លាស់សម្រាប់យានយន្តធន់ធំ ដែលស្របគ្នាទៅនឹងគោលការណ៍របស់ក្រសួងសាធារណការ និងដឹកជញ្ជូនដែលកំពុងជម្រុញពង្រឹងសុវត្ថិភាពយានយន្តធន់ធំដែលកំពុងធ្វើចរាចរណ៍នៅក្នុងប្រទេសកម្ពុជា” ។
វិស័យអាជីវកម្មផ្នែកផលិតផលប្រើប្រាស់ទូទៅរបស់ Bosch នៅបន្តកំណើនការលក់ជាភាគរយពីរខ្ទង់ និងនៅតែជាផ្នែកដែលទទួលបានប្រាក់ចំណូលច្រើនជាងគេសម្រាប់អាជីកម្មរបស់ Bosch ក្នុងប្រទេសកម្ពុជា។ អាជីវកម្មផ្នែកនេះមានការរីកលូតលាស់ក្នុងកម្រិតនេះក៏ដោយសារកំណើនដ៏ខ្ពស់នៃវិស័យសំណង់នៅក្នុងប្រទេសកម្ពុជាដែលការវិនិយោគនៅទូទាំងប្រទេសកើនដល់ទៅ 33 ភាគរយ ស្មើនឹង 3.3 ប៊ីលានដុល្លាសហរដ្ឋអាមេរិក។ Bosch មានគោលដៅគាំទ្រដល់ការរីកចម្រើនផ្នែកបច្ចេកវិទ្យានៃវិស័យសំណង់នៅក្នុងប្រទេសកម្ពុជា ហើយយល់ថាការរីកចម្រើននេះនឹងអាចមានសន្ទុះកាន់តែលឿនប្រសិនបើអ្នកសាងសងអាចមានឧបករណ៍ដែលសាកសមបំផុតសម្រាប់គាត់។ លោក De Jong បានមានប្រសាសន៍ថា៖ “នៅក្នុងឆ្នាំ2015 យើងបានណែនាំជូននូវឧបករណ៍ជាងថ្មីជាច្រើនហៅថា ជម្រើសសម្រាប់អ្នកម៉ៅការ ដែលជាឧបករណ៍ដែល Bosch បានរចនាសាជាថ្មី រក្សានូវភាពធន់ និងប្រសិទ្ធភាពខ្ពស់ ខណៈដែលតម្លៃត្រឹមមធ្យមតែប៉ុណ្ណោះ។ តាមរយះនេះ Bosch ជួយឲ្យជាងជំនាញកាន់តែច្រើនអាចទទួលយកនូវឧបករណ៍គុណភាពល្អទៅប្រើប្រាស់”។
ការរីកចម្រើននៃវិស័យសំណង់ក៏បានផ្តល់ឱកាសជាច្រើនដល់វិស័យអាជីកម្មបច្ចេកវិទ្យាសម្រាប់ថាមពល និងអគាររបស់ Bosch ផងដែរ។ ដោយផ្នែកនេះបានបំពាក់ជូននូវប្រព័ន្ធសុវត្ថិភាព និងសន្តិសុខសម្រាប់គម្រោងអគារពានិជ្ជកម្ម ខុនដូរ និងសណ្ឋាគារជាច្រើនផងដែរ។ អាជីវកម្មផ្នែកប្រព័ន្ធសុវត្ថិភាពបានបូកសរុបលទ្ធផលលក់នៅក្នុងឆ្នាំ 2015 ជាមួយកំណើនភាគរយពីរខ្ទង់ផងដែរ។កាម៉េរាសុវត្ថិភាព និងប្រព័ន្ធសោរទ្វាសុវត្ថិភាព ជាផលិតផលដែលរកប្រាក់ចំណូលបានច្រើនជាងគេ។
វិស័យអាជីកម្មផ្នែកបច្ចេកវិទ្យាឧស្សាហកម្មរបស់ Bosch បានបោះជំហានចូលមកក្នុងប្រទេសកម្ពុជាជាមួយនឹងផ្នែកគ្រឿងចក្របញ្ជាកាលពីដើមឆ្នាំ 2015 ដើម្បីសិក្សាអំពីឱកាសអាជីវកម្ម និងសម្រាប់គាំទ្រដល់គោលនយោបាយអភិវឌ្ឍឧស្សាហកម្មរបស់កម្ពុជា (IDP 2015-2025) ដែលមានគោលបំណងពង្រីកមូលដ្ឋានផលិតកម្មក្នុងស្រុក។ ជាមួយនឹងផ្នែកថ្មីនេះ Bosch ធ្វើការផ្តល់ជូននូវផលិតផលបន្ថែមដូចជាគ្រឿងបង្គុំ និងគ្រឿងបន្លាស់សម្រាប់ម៉ាស៊ីន និងឧបករណ៍ធុនធំដែលប្រើនៅក្នុងឧស្សាហកម្មរោងចក្រ កសិកម្ម និងសំណង់ ក៏ដូចជារ៉ែ និងថាមពលផងដែរ។
