ក្រៅតែពីបានប្រកាសបង្ហាញចេញផ្លូវការណ៍នូវម៉ាស៊ីនកុំព្យូទ័រយួរដៃជំនាន់ថ្មីស្រឡាយ Latitude Laptop ដែលមានដូចជាម៉ូដែល Latitude 9000, 7000 និង 5000 នៅក្នុងព្រឹត្តិការណ៍តាំងពិព័រណ៍ផលិតផលបច្ចេកវិទ្យាប្រចាំឆ្នាំ 2021 ហៅកាត់ថា CES2021 កាលពីថ្ងៃម្សិលមិញនេះ ក្រុមហ៊ុន Dell ក៏បានបង្ហាញចេញនូវម៉ូនីទ័រស៊េរីថ្មីមួយចំនួនផងដែរ ដោយក្នុងនោះគឺមានម៉ូដែល Ultra-Sharp 40 Curved WUHD Monitor ដែលជាម៉ូនីទ័រអេក្រង់កោងទំហំ 40 អ៊ីញដំបូងគេក្នុងលោកដែលមានសមត្ថភាពខ្ពស់ទ្រទ្រង់កម្រិតបង្ហាញចេញបានដល់ 5K ក្នុងទំហំរីសូលូហ្ស៊ិន 5,120 x 2,160px។
បើតាមការប្រាប់អោយដឹងពីក្រុមហ៊ុន Dell ម៉ូនីទ័រអេក្រង់កោងកម្រិតខ្ពស់ស៊េរីថ្មីនេះគឺប្រើប្រាស់បន្ទះអេក្រង់កោងប្រភេទ IPS panels ដែលទ្រទ្រង់ទឹកពណ៌កម្រិត 100% sRGB និង 98% DCI-P3 ដែលអាចចាក់ទឹកពណ៌ច្បាស់ដុត (render) កម្រិត 1.09 ពាន់លានពណ៌។ ម៉ូនីទ័រស៊េរីថ្មីនេះមានភ្ជាប់ដោតរន្ធចម្លងប្រភេទ Thunderbolt 3 ដែលផ្តល់អោយការផ្លាស់ប្តូរទិន្នន័យចេញចូលបានលឿនកម្រិត 40Gbps និងអាចប្រើដើម្បីសាកថ្មទៅអោយម៉ាស៊ីនកុំព្យូទ័រយួរដៃផ្សេង ឬម៉ាស៊ីន Apple MacBook Series បានក្នុងកំលាំង 90W ថែមទៀតផង។ ជាមួយគ្នានេះដែរវានៅមានរន្ធដោត USB-C ដែលអាចសាកថាមពលថ្មអោយស្មាតហ្វូនបានក្នុងកំលាំង 15W ផងដែរ។
បន្ថែមពីនេះ Dell Ultra-Sharp 40 Curved WUHD Monitor នៅមានរន្ធដោត USB-Type-A ជំនាន់ចុងក្រោយជាច្រើនដែលផ្តល់នូវភាពងាយស្រួលក្នុងការផ្លាស់ប្តូរទិន្នន័យចេញចូល ហើយវានៅមានរន្ធ Ethernet RJ45 សម្រាប់ភ្ជាប់ខែ្សបណ្តាញអ៊ីនធ័រណិតដែលផ្តល់នូវស្ថេរភាពក្នុងការភ្ជាប់បណ្តាញក្នុងកម្រិតខ្ពស់ជាងការប្រើប្រាស់ដោយការភ្ជាប់ជាមួយប្រព័ន្ធ Wi-Fi។ ហើយអ្វីដែលពិសេសបំផុតនោះគឺវាមានភ្ជាប់នូវមុខងារ KVM Switch ដែលអនុញ្ញាតិអោយអ្នកប្រើប្រាស់អាចធ្វើការតភ្ជាប់ម៉ាស៊ីនកុំព្យទ័របានច្រើនគ្រឿងរួមទាំងស្មាតហ្វូនផងដែរជាមួយម៉ូនីទ័រស៊េរីថ្មីដើម្បីប្រើប្រាស់ Mouse និង Keyboard តែមួយព្រមគ្នាតែម្តង។ ម៉ូនីទ័រស៊េរីថ្មី Dell Ultra-Sharp 40 Curved WUHD Monitor នឹងត្រូវចេញលក់ផ្លូវការណ៍នាថ្ងៃទី 28 ខែមករា ឆ្នាំ 2021 ជាមួយមានតម្លៃខ្ទង់ $2,099។
ប៉ុន្តែប្រសិនបើលោកអ្នកគិតថាម៉ូនីទ័រស៊េរីថ្មីនេះមានតម្លៃថ្លៃបន្តិច ក្រុមហ៊ុន Dell ក៏ផ្តល់ជូននៅម៉ូនីទ័រស៊េរីថ្មីដែលមានអេក្រង់កោងដូចគ្នាតែមានគុណសម្បត្តិរាងទាបជាងបន្តិច ហើយតម្លៃក៏ធូរជាងនេះបន្តិចផងដែរគឺជាស៊េរី Dell UltraSharp 38 Curved USB-C Hub Monitor (U3821DW) ដែលមានតម្លៃខ្ទង់ $1,499។ សម្រាប់គុណសម្បត្តិរបស់ស៊េរីមួយនេះគឺមានអេក្រង់កោងទំហំ 38 អ៊ីញប្រភេទបន្ទះបង្ហាញ IPS Panels ទ្រទ្រង់កម្រិតបង្ហាញចេញក្នុងទំហំរីសូលូហ្ស៊ិន 3,840 x 1,600px ប៉ុន្តែវាមិនមានរន្ធ Thunderbolt ទេ គឺមានត្រឹមតែ USB-C ជាមួយ Power Delivery ប៉ុណ្ណោះ។ ម៉ូនីទ័រអេក្រង់កោងស៊េរីថ្មីទាំងពីរម៉ូដែលនេះត្រូវបានក្រុមហ៊ុនតំឡើងនូវប្រព័ន្ធ Speaker បំពងសំឡេងកម្រិត 9W ដូចគ្នា៕
