បន្ទាប់ពីការបង្ហាញវត្តមានរបស់ស្មាតហ្វូន OPPO Ace2 flagship ជាផ្លូវការនៅក្នុងប្រទេសចិនរួចមក ក្រុមហ៊ុន OPPO ពេលនេះ ក៏មានគម្រោងក្នុងការប្រកាសចេញនូវស្មាតហ្វូនថ្មីមួយទៀតរបស់ខ្លួនផងដែរ នោះគឺ OPPO Reno4 Series។ ថ្មីៗនេះ ក្រុមហ៊ុននេះ ក៏បានបញ្ជាក់អំពីស្មាតហ្វូននេះ នៅលើវីដេអូផ្សព្វផ្សាយមួយរបស់ខ្លួនផងដែរ។ នៅពេលនេះ ក្រុមហ៊ុនបានចែករំលែកនូវរូបភាពផ្លូវការរបស់ស្មាតហ្វូន Reno4 Series ដែលមានពីរម៉ូឌែលក្នុងការជ្រើសរើសនោះគឺ OPPO Reno4 និង Reno4 Pro។ ក្រុមហ៊ុននេះបានបញ្ជាក់ថា ស្មាតហ្វូននេះ នឹងមានតួខ្លួនស្តើងមែនទែន និងបទពិសោធន៍នៃការប៉ះបញ្ជាយ៉ាងអស្ចារ្យបំផុត។
ស្មាតហ្វូននេះ គឺមានផ្នែកខាងក្រោយដែលជាកញ្ចក់គែមកោង និងមានមានប៊ូតុងឡើងចុះសំលេងនៅគែមផ្នែកខាងឆ្វេង និងប៊ូតុង Power នៅគែមខាងស្តាំរបស់វាថែមទៀត។ អ្វីដែលគួរអោយចាប់អារម្មណ៍នោះ រូបភាព និងវីដេអូផ្សព្វផ្សាយរបស់ស្មាតហ្វូននេះគឺមានការបង្ហាញអំពីផ្នែកខាងមុខរបស់ស្មាតហ្វូននេះផងដែរ។ តាមរយៈរូបភាពនេះ បានបញ្ជាក់ថា ស្មាតហ្វូននេះនឹងមានកាមេរ៉ាខាងក្រោយ 3 គ្រាប់ជាមួយនឹងភ្លើង LED flash និង Laser focus ថែមទៀត។ ស្មាតហ្វូននេះនឹងមានការទ្រទ្រង់ទៅលើបច្ចេកវិទ្យា 5G ថែមទៀតផង។
ខណៈពេលដែលក្រុមហ៊ុន OPPO នៅមិនទាន់បង្ហាញអំពីលក្ខណៈសម្បត្តិរបស់ស្មាតហ្វូននេះនៅឡើយទេ ប៉ុន្តែព័ត៌មានបែកធ្លាយជាច្រើននៅលើអនឡាញ បានបញ្ជាក់ថា ស្មាតហ្វូន Reno4 នឹងមានរន្ធប្រហោង punch-hole ភ្លោះនៅលើអេក្រង់ទំហំ 6.43-inch 2.5D ជាមួយនឹងកាមេរ៉ា 32MP+2MP sensors ។ សម្រាប់ម៉ូឌែល Pro វិញនោះ វាមានអេក្រង់ទំហំ 6.55-inch display ជាមួយនឹងគែមកោង 3D និងកាមេរ៉ាខាងមុខមួយគ្រាប់ទំហំ 32MP។ ស្មាតហ្វូននេះ គឺមានកាមេរ៉ាខាងក្រោយទំហំ 48-megapixel primary sensor, 8-megapixel ultra-wide sensor និង 2-megapixel monochrome lens ។ សម្រាប់ម៉ូឌែល Pro វិញនោះគឺមានកាមេរ៉ាទំហំ 48-megapixel camera, 12-megapixel Night Scene video និង 12-megapixel telephoto lens ផងដែរ។
ស្មាតហ្វូនទាំងពីរនេះ នឹងមានបន្ទះឈីប Snapdragon 765G របស់ក្រុមហ៊ុន Qualcomm និងថាមពលថ្មទំហំ 4000mAh ។ស្មាតហ្វូន OPPO Reno4 Pro នេះនឹងមានការទ្រទ្រង់ទៅលើបច្ចេកវិទ្យា 65W fast charging និងមានរ៉េមទំហំ 12GB និងម៉េមូរីទំហំ 256GB ។ ស្មាតហ្វូន OPPO Reno4 នឹងមានពណ៌ Crystal Diamond Blue, Dream Mirror Black និង Purple Taro ខណៈពេលដែលម៉ូឌែល Pro នឹងមានពណ៌ Crystal Diamond Blue, Crystal Diamond Red, Dream Mirror Black និង Titanium Black ៕
