ចាប់ពីដើមឆ្នាំ 2020 នេះ ក្រុមហ៊ុនឧស្សាហកម្មជាច្រើន បានឆ្លងកាត់នូវរឿងដ៏អាក្រក់ជាច្រើននៅក្នុងត្រីមាសទី 1 ឆ្នាំ 2020 នេះ ដោយសារតែលទ្ធផលនៃមេរោគរាតត្បាតកូរ៉ូណាវីរុស។ មានតែទីផ្សាររបស់កុំព្យូទ័រ Notebook ប៉ុណ្ណោះ គឺបានគេចចេញពីស្ថានភាពអាក្រក់ដោយសារមេរោគ COVID 19 នេះ។
យោងតាមក្នុងរបាយការណ៍មួយដោយក្រុមហ៊ុនស្រាវជ្រាវទីផ្សារ Strategy Analytics បានគឺមានការបង្ហាញថា ទីផ្សាររបស់ Notebook នេះ គឺមានការធ្លាក់ចុះត្រឹមតែ -2% បើធៀបទៅនឹងឆ្នាំមុនសម្រាប់ត្រីមាសទី 1 ឆ្នាំ 2020 នេះ។ របាយការណ៍នេះ គឺមានការប្រកួតប្រជែងខ្លាំងក្លាមែនទែនដោយសារតែវាមានតម្រូវការច្រើននៅក្នុងត្រីមាសទី 2 នេះ។
ក្រុមហ៊ុន Lenovo នៅតែរក្សានូវការនាំមុខទៅលើទីផ្សារ Notebook ជាមួយនឹងការកើនឡើងដល់ទៅ 8.9 លានគ្រឿង ហើយចំណែកទីផ្សាររបស់វា គឺមានចំនួន 23.5%។ ក្រុមហ៊ុន HP គឺមានការនាំចេញកើនឡើងដល់ទៅ 8.1 លានគ្រឿង និងចំណែកទីផ្សារចំនួន 21.3%។ ក្រុមហ៊ុន Dell មានការនាំចេញចំនួន 6.9 លានគ្រឿងនៅក្នុងត្រីមាសទី 1 ឆ្នាំ 2020 នេះ ដែលមានចំណែកទីផ្សារចំនួន 18.2%។ ក្រុមហ៊ុន Apple មានការនាំចេញចំនួន 3 លានគ្រឿង និងចំណែកទីផ្សារចំនួន 8%។ ក្រុមហ៊ុន Asus មានការនាំចេញចំនួន 2.5 លានគ្រឿង ហើយវាមានចំណែកទីផ្សារចំនួន 6.6% ។
លោក Chirag Upadhyay អ្នកស្រាវជ្រាវទីផ្សារជាន់ខ្ពស់ បានអះអាងថា អ្នកផ្គត់ផ្គង់កុំព្យូទ័រ Notebook គឺមានការពឹងផ្អែកយ៉ាងខ្លាំងទៅលើទីផ្សារនៅក្នុងប្រទេសចិន សម្រាប់ខ្សែសង្វាក់ផ្គត់ផ្គង់របស់ខ្លួន ហើយវាមានតម្រូវការខ្ពស់មុនការផ្ទុះឡើងនៃមេរោគ COVID-19 នេះ។
លោក Eric Smith ដែលជាអគ្គនាយកផ្នែក Connected Computing បានបន្ថែមថា “យើងរំពឹងថា ការផ្ទុះឡើងនៃមេរោគ COVID-19 នៅជុំវិញពិភពលោកសម្រាប់ត្រីមាសទី 2 នេះ ប្រតិបត្តិការសាជីវកម្មធំ និងវិទ្យាស្ថានអប់រំជាច្រើនទៀតនឹងមានការកម្មង់ច្រើនសម្រាប់កុំព្យូទ័រ Notebooks សម្រាប់ការរៀន និងការធ្វើការងារពីចម្ងាយ។ គ្រួសារជាច្រើនត្រូវបង្ខាំងនៅផ្ទះ ហើយវាក៏មានតម្រូវការខ្លាំងសម្រាប់ការធ្វើការងាររបស់ពួកគេផងដែរ៕”
