ក្រុមហ៊ុន Apple បានប្រកាសចេញម៉ាស៊ីនកុំព្យូទ័រលើតុ iMac ជំនាន់ថ្មីឆ្នាំ 2021 របស់ខ្លួនជាផ្លូវការណ៍នៅក្នុងព្រឹត្តិការណ៍ Spring Loaded យប់មិញនេះ។ ម៉ាស៊ីនកុំព្យូទ័រជំនាន់ថ្មីឆ្នាំ 2021 នេះត្រូវបានក្រុមហ៊ុនបំពាក់នូវបន្ទះឈីប Apple ARM-M1 របស់ខ្លួនដែលប្រើនៅលើកុំព្យូទ័រយួរដៃ MacBook និងម៉ាស៊ីន Mac mini កាលពីឆ្នាំទៅ។
ហើយអ្វីដែលរិតតែពិសេសបំផុតនោះគឺថា iMac ជំនាន់ថ្មីនេះមានជម្រើសច្រើនពណ៌រហូតដល់ទៅ 7 ពណ៌ឯណោះដែលមានដូចជាពណ៌បៃតង, លឿង, ទឹកក្រូច, ស្វាយ, ខៀវ, ក្រហម និងទឹកប្រាក់។ម៉ាស៊ីន iMac ជំនាន់ថ្មីនេះមានកម្រាស់ 11.5mm និងបំពាក់នូវបន្ទះអេក្រង់Retina Display ទំហំ 23.5 អ៊ីញ ទ្រទ្រង់កម្រិតបង្ហាញដល់ 4.5K ជាមួយកម្រិតPixel 11.3M មានកម្រិតពន្លឺ 500nits គាំទ្រនូវកម្រិតទឹកពណ៌ P3 1B និង True-Tone Technology។
នៅលើគែមអេក្រង់ខាងលើមានភ្ជាប់នូវកាមេរ៉ាវ៉ិបខេមមួយគ្រាប់សម្រាប់វីដេអូខលមានកម្រិត 1080px។ iMac 2021 បានដំឡើងនូវប្រព័ន្ធ Speaker ចំនួន 6 គ្រាប់ដែលមាន force-cancelling woofer ចំនួនពីរគ្រាប់ ទ្រទ្រង់ មុខងារសំឡេង spatial audio ជាមួយនឹង Dolby Atmos ទៀតផង។
សម្រាប់បន្ទះឈីប Apple AMR-M1 ដែលប្រើនៅលើ iMac ជំនាន់ថ្មីនេះគឺមានជម្រើសអង្គ CPU ចំនួន 8-Core / GPU 7-Core និង CPU 8-Core / GPU 8-Core តម្រូវតាមការចង់បានរបស់អតិជន។ បន្ទះឈីប M1 នេះមានអង្គ CPU ប្រតិបត្តិការលឿងជាង CPU បន្ទះឈីបដែលប្រើនៅលើ iMac 21.5-inch ជំនាន់មុនដល់ 85% និងមានល្បឿន GPU លឿងជាងដល់ 50% ហើយលឿនជាង iMac mini ជំនាន់មុនដល់ទៅ 2 ដង និងប្រើមុខងារ machine learning លឿនជាងមុនដល់ 3 ដង។ ម៉ាស៊ីន iMac ជំនាន់ថ្មីនេះភ្ជាប់ដោយរ៉េមទំហំ 8GB និង 16GB ជាមួយអង្គផ្ទុកក្នុងម៉ាស៊ីនប្រភេទ SSD ទំហំចាប់ពី 256GB/512GB/1TB ដល់ 2TB។
iMac ជំនាន់ថ្មីនេះមានភ្ជាប់មកជាមួយរន្ធ Thunderbolt ចំនួនពីរ, USB-C ចំនួនពីរ, រន្ធ Ethernet 1Gbps និងទ្រទ្រង់បច្ចេកវិទ្យា Wi-Fi 6 ផងដែរ។ បន្ថែមពីនេះវាមានភ្ជាប់ប្រើជាមួយនឹង Magic Keyboard ដែលមានភ្ជាប់ជាមួយបច្ចេកវិទ្យា Touch ID ដែលធ្វើអោយ iMac ជំនាន់ថ្មីនេះក្លាយជាម៉ាស៊ីនកុំព្យូទ័រលើតុដំបូងគេក្នុងលោកដែលប្រើនូវបច្ចេកវិទ្យាសោះសុវត្ថិភាពបែប wireless ដោយប្រើប្រព័ន្ធបច្ចេកវិទ្យា biometric authentication system ភ្ជាប់នូវលើ Magic Keyboard តែម្តង។
Apple នឹងបើកអោយអតិថិជនធ្វើការបញ្ជាទិញម៉ាស៊ីន iMac ជំនាន់ថ្មីឆ្នាំ 2021 នេះបាននៅថ្ងៃទី 30 ចុងខែមេសានេះ ហើយការនាំចេញទៅកាន់ដៃអតិថិជនគឺនឹងធ្វើឡើងនៅពាក់កណ្តាលខែឧសភា ឆ្នាំ 2021។
ចំពោះតម្លៃវិញ iMac 2021 មានអង្គ CPU 8-Core / GPU 7-Core មានរ៉េមទំហំ 8GB និងអង្គផ្ទុកទិន្នន័យទំហំ 256GB រួមនឹងក្តារចុច color-matched Magic Keyboard ធម្មតាគ្មាន Touch ID ហើយនិង Magic Mouse មានតម្លៃខ្ទង់ $1,299 ចំនែកម៉ូដែលមានអង្គ CPU 8-Core / GPU 8-Core មានរ៉េមទំហំ 8GB និងអង្គផ្ទុកទិន្នន័យទំហំ 256GB ភ្ជាប់ជាមួយ color-matched new Magic Keyboard ដែលមាន Touch ID រួមនឹង Magic Mouse គឺមានតម្លៃខ្ទង់ $1,499 ហើយតម្លៃឡើងខ្ពស់ជាងនេះបន្ថែមទៀតសម្រាប់ម៉ូដែលមានរ៉េមទំហំ 16GB ជាមួយអង្គផ្ទុកទិន្នន័យទំហំ 512GB/1TB និង 2TB៕
