នៅទីបំផុត Asus សម្រេចបញ្ចេញកំពូលស្មាតហ្វូនហ្គេមជំនាន់ថ្មី ROG Phone 8 Series របស់ខ្លួនជាផ្លូវការណ៍ហើយ ដោយមានជម្រើស ROG Phone 8 និង ROG Phone 8 Pro។ Gaming Phone ជំនាន់ថ្មីនេះត្រូវបានក្រុមហ៊ុនធ្វើការឌីស្សាញរូបរាងបែបថ្មី ជាមួយកម្រាស់ស្តើងជាងមុន ប៉ុន្តែ នៅរក្សារចនាបថបែបស្មាតហ្វូនហ្គេមដដែល។
Asus ROG Phone 8 Series មានការឌីស្សាញរូបរាងបែបស្លីមជាងមុនជាមួយការបំពាក់នូវបន្ទះអេក្រង់រាបស្មើរ និងមានគែមកញ្ចប់អេក្រង់តូចស្តើង ជាមួយលែនទំលុះថ្ងាសអេក្រង់មួយគ្រាប់។ នៅផ្នែកខាងក្រោយរបស់ ROG Phone 8 មានរំលេចដោយភ្លើង Aura RGB នៅលើនិមិត្តសញ្ញាភ្នែកនៃម៉ាក ROG ខណៈនៅលើម៉ូដែល ROG Phone 8 Pro មានបង្កប់ដោយអំពូលភ្លើង AniMe Vision mini-LED ចំនួន 341 គ្រាប់។ ជាងនេះទៅទៀតស្មាតហ្វូនហ្គេមជំនាន់ថ្មីទាំងពីរនេះមានបំពាក់នូវអាវគ្រោះការពារទឹក និងធូលីកម្រិត IP68 ថែមទៀតផង។
Asus ROG Phone 8 និង ROG Phone 8 Pro បានបំពាក់នូវបច្ចេកវិទ្យាអេក្រង់ LTPO-AMOLED Display ល្បឿន 165Hz ទំហំ 6.78-inch និងគាំទ្រកម្រិតបង្ហាញចេញ Full-HD+ ទំហំ 1080x2400px។ បន្ទះអេក្រង់ស្មាតហ្វូនហ្គេមទាំងពីរនាក់បងប្អូននេះមានកម្រិតពន្លឺ 2,500nits, អាចចុចបញ្ជាទោះពាក់ស្រោបដៃបាន (Glow touch) និងប្រព័ន្ធចាក់សោរសុវត្ថិភាពក្រោមអេក្រង់ (in-screen fingerprint scanner) ផងដែរ។ ROG Phone 8 Series មានកម្រាស់ 8.9mm និងទំងន់ 225 ក្រាម ដែលស្តើងជាង និងស្រាលជាងបើធៀបនឹងជំនាន់ ROG Phone 7 Series។ ម៉ូដែល ROG Phone 8 មានជម្រើសពណ៌ប្រផេះ ហៅថា Rebel Grey និងពណ៌ខ្មៅហៅថា Phantom Black ខណៈ ROG Phone 8 Pro មានតែមួយជម្រើសប៉ុណ្ណោះ គឺពណ៌ខ្មៅ Phantom Black។
ROG Phone 8 Series បានបំពាក់នូវកំពូលឈីប Snapdragon 8 Gen 3។ ដោយម៉ូដែល ROG Phone 8 មានជម្រើសរ៉េមទំហំ 12GB/16GB LPDDR5x និងទំហំផ្ទុកទិន្នន័យ 256GB UFS4.0។ សម្រាប់ម៉ូដែល ROG Phone 8 Pro វិញ មានជម្រើសរ៉េមទំហំចាប់ពី 16GB ដល់ 24GB LPDDR5x ជាមួយអង្គផ្ទុកទិន្នន័យទំហំ 512GB ដល់ 1TB UFS4.0។ ស្មាតហ្វូនហ្គេមជំនាន់ថ្មីទាំងពីរនេះមានថ្មទំហំ 5,500mAh គាំទ្រកំលាំងសាកភ្លើងល្បឿនលឿន 65W Wired Fast Charging ដោយប្រើបច្ចេកវិទ្យា Quick Charge 5.0 និង PD Charging ហើយស្មាតហ្វូនទាំងពីរនេះក៏គាំទ្រការសាកភ្លើងឥតខ្សែកំលាំង 15W Qi Wireless Charging។
នៅលើ ROG Phone 8 Series ដំឡើងដោយប្រតិបត្តិការ ROG UI នៅលើ Android 14។ ស្មាតហ្វូនហ្គេមទាំងជំនាន់ថ្មីទាំងពីរម៉ូដែលនេះ មានប្រព័ន្ធបន្សាបកំដៅ conduction cooling system និងមានភ្ជាប់មកជាមួយ AeroActive Cooler X accessory ដែលមានទំហំតូចមុន 29% និងស្រាលជាងមុន 10%។ ជាងនេះទៅទៀត ROG Phone 8 Series ក៏មានភ្ជាប់មកជាមួយមុខងារ AI Grabber សម្រាប់សម្រួលដល់ដំណើរការអូសហ្គេម, មុខងារ AI-driven, AI Wallpaper និងមុខងារឆ្លាតវៃថ្មីៗជាច្រើនទៀត។ មុខងារសំខាន់ៗផ្សេងទៀតដែលមាននៅលើ Asus ROG Phone 8 Series រួមមានដូចជា រន្ធដោតកាសខ្នាត 3.5mm, ប្រព័ន្ធបំពងសំឡេង 5-magnet speaker system, Air Trigger buttons, Wi-Fi 7, Bluetooth 5.3, dual-frequency GPS, NFC, និង USB-C ជាដើម។
សម្រាប់ផ្នែកាមេរ៉ាវិញ Asus ROG Phone 8 Series មានដំឡើងមកជាមួយសែនស័រសែលហ្វីប្រភេទ RGBW ទំហំ 32MP។ រីនៅផ្នែកខាងក្រោយមានដំឡើងមកជាមួយប្រព័ន្ធកាមេរ៉ា 3 គ្រាប់ទំហំ 50MP Main Sensor ជា Sony IMX890 មាន OIS, សែនស័រ Ultra-wide ទំហំ 13MP អាចផលិតរូបថតមុំទូលាយបានកម្រិត 120 ដឺក្រេ FOV និង Telephoto ទំហំ 32MP មានលទ្ធភាពអាចធ្វើ Optical-zoom បាន 3x និងគាំទ្រ OIS ថែមទៀតផង។
ស្មាតហ្វូនហ្គេមជំនាន់ថ្មីទាំងពីររបស់ Asus នឹងមានចេញលក់ផ្លូវការណ៍នៅនិទាឃរដូវ ឆ្នាំ2024 ដោយក្នុងនោះ
-Asus ROG Phone 8 មានរ៉េម 12GB និងម៉េមូរី 256GB មានតម្លៃខ្ទង់ $1,099
-Asus ROG Phone 8 មានរ៉េម 16GB និងម៉េមូរី 512GB មានតម្លៃខ្ទង់ $1,199
-Asus ROG Phone 8 Pro មានរ៉េម 24GB និងម៉េមូរី 1TB មានតម្លៃខ្ទង់ $1,499៕
