កាលពីសប្តាហ៍មុននេះ របាយការណ៍ចេញពី Wall Street Journal បានរាយការណ៍ថា ស្មាតហ្វូន Motorola ដែលស្ថិតនៅក្រោមការគ្រប់គ្រងរបស់ក្រុមហ៊ុន Lenovo គឺបានត្រៀមខ្លួនក្នុងការបង្ហាញនូវស្មាតហ្វូនស៊េរីថ្មីប្រភេទ Motorola RAZR V3 ដែលអាចបត់បានហើយ។ ស្មាតហ្វូននេះ ត្រូវបានគេរំពឹងថា នឹងមានការរចនារូបរាងថ្មីដែលងាយស្រួលក្នុងការបត់ ហើយវាមានតម្លៃថ្លៃថែមទៀតផង។ កាលបរិច្ឆេទនៃការប្រកាសបង្ហាញស្មាតហ្វូន Motorola RAZR 2019 នៅមិនទាន់សម្រេចជាផ្លូវការនៅឡើយទេ ប៉ុន្តែវាប្រហែលជាមិនយូរនោះទេ។ នៅថ្ងៃនេះ អ្នកតាមដាននៅ 91mobiles បានប្រទះឃើញនូវបញ្ជីប៉ាតង់មួយនៃស្មាតហ្វូនរបស់ Motorola នៅក្នុងអង្គការកម្មសិទ្ធិបញ្ញាពិភពលោក (WIPO)។ ចាប់តាំងពីស្មាតហ្វូននេះ មានការរចនារូបរាងបត់នោះ ត្រូវគេជឿជាក់ថាស្មាតហ្វូននេះគឺជា Motorola RAZR 2019 ។
នៅក្នុងរូបភាពខាងក្រោមនេះ មានការប៉ាន់ស្មានថានេះ គឺជាស្មាតហ្វូន Motorola RAZR 2019 ដែលមានអេក្រង់ខ្ពស់ជាងមុន ហើយផ្នែកខាងក្រោមនៃអេក្រង់គឺមានកម្រាស់ក្រាស់ផងដែរ។ នៅផ្នែកខាងលើរបស់ស្មាតហ្វូននេះគឺមាន Notch ដែលមានភ្ជាប់ជាមួយនឹងរន្ធស្រូបសំឡេង។ សម្រាប់ការរចនាផ្នែកខាងក្រោយនៃស្មាតហ្វូនMotorola RAZR 2019 នេះ គឺពិតជាគួរអោយចាប់អារម្មណ៍ខ្លាំងមែនទែនដោយសារតែស្មាតហ្វូននេះ អាចកាច់បត់ជាពីរបានជាមួយនឹងគន្លឹះមួយនៅកណ្តាល។ សម្រាប់ផ្នែកពាក់កណ្តាលរបស់ស្មាតហ្វូននេះគឺមានអេក្រង់ទី 2 ដូចគ្នាទៅនឹងស្មាតហ្វូន Motorola RAZR V3 ។ សម្រាប់អេក្រង់របស់ស្មាតហ្វូននេះអាចធ្វើការឆែកទៅលើសារ Notifications សម្រាប់ការខល និងការផ្ញើសារដោយមិនចាំបាច់បើកទៅលើស្មាតហ្វូននេះដើម្បីចូលទៅកាន់ Main Display នោះ។ វាហាក់ដូចជាមានកាមេរ៉ាមួយស្ថិតនៅពីលើអេក្រង់ទី 2 ខណៈពេលដែលវាមានភ្ជាប់ជាមួយនឹងប្រព័ន្ធស្កេនក្រយ៉ៅដៃនៅផ្នែកខាងក្រោម។
រូបភាពខាងក្រោមនេះ គឺមានការបង្ហាញអំពីជ្រុងរបស់ស្មាតហ្វូន Motorola RAZR 2019 ដែលអាចបត់បាននេះ។ យោងតាមព័ត៌មានចុងក្រោយបំផុត ដែលបានបែកធ្លាយនៅក្នុងប្រទេសកូរ៉េខាងត្បូង បាទទម្លាយថា ស្មាតហ្វូនស៊េរីថ្មី Motorola RAZR 2019 នឹងប្រើប្រាស់នូវដំណោះស្រាយនៃអេក្រង់ដែលអាចបត់បានពីស្មាតហ្វូន Galaxy F របស់ក្រុមហ៊ុន Samsung។ គួរបញ្ជាក់ថា កាលពីសប្តាហ៍មុននេះ របាយការណ៍មួយបានទម្លាយថា ក្រុមហ៊ុននេះនឹងធ្វើការផលិតនូវស្មាតហ្វូន RAZR 2019 ច្រើនជាង 200,000 គ្រឿង ហើយស្មាតហ្វូននេះ នឹងដាក់លក់ផ្តាច់មុខនៅក្នុងសហរដ្ឋអាមេរិកតាមរយៈ Verizon Wireless តែមួយប៉ុណ្ណោះជាមួយនឹងតម្លៃដល់ទៅ $1,500៕
