ឡានអគ្គិសនី GAC Aion Y Plus ឆ្នាំ 2025 ម៉ូទ័រមួយកំលាំង 150kW ចេញលក់តម្លៃជាង 1 ម៉ឺនដុល្លារប៉ុណ្ណោះ

ក្រុមហ៊ុន GAC ទើបតែបានបញ្ចេញរថយន្តស៊េរីថ្មីមួយម៉ូដែលស្ថិតនៅក្រោមម៉ាកយីហោ Aion របស់ខ្លួន គឺម៉ូដែល Aion Y Plus ស៊េរីឆ្នាំ 2025។ រថយន្តអគ្គិសនីស៊េរីថ្មីនេះ ត្រូវបានក្រុមហ៊ុនធ្វើបច្ចុប្បន្នភាពថ្មីមួយចំនួនទៅលើការឌីស្សាញផ្នែកខាងក្រៅ និងខាងក្នុងជាមួយនឹងប្រព័ន្ធជំនួយបច្ចេកវិទ្យាបើកបរកាន់តែទំនើប។ Aion Y Plus 2025 ត្រូវបានក្រុមហ៊ុនប្រកាសដាក់លក់ក្នុងតម្លៃចាប់ពីខ្ទង់ $13,760 ដល់ $17,070 នៅទីផ្សារប្រទេសចិន។

ការឌីស្សាញថ្មីនៅលើ Aion Y Plus 2025 គឺនៅលើចង្កៀងខាងក្រោយដែលត្រូវបានឌីស្សាញជាបន្ទាត់អូសកាត់ពីម្ខាងទៅម្ខាងដែលមានអក្សរ AION នៅកណ្តាល។ រថយន្តអគ្គិសនីស៊េរីថ្មីនេះ មានតួរខ្លួនប្រវែង 4,535mm/ទទឹង 1,870mm/កំពស់ 1,650mm និងគម្លាងពីកង់មុខទៅកង់ក្រោយ 2,750mm។

ផ្នែកកាប៊ីនខាងក្នុងទទួលបានការឌីស្សាញថ្មីកាន់តែមានភាពទូលាយផ្តល់នូវផាសុខភាពក្នុងការបើកបរ ជាពិសេសវាត្រូវបានធ្វើបច្ចុប្បន្នភាពថ្មីលើផ្ទៃ UI ដែលផ្តល់នូវបទពិសោធន៍ប្រើប្រាស់ថ្មីកាន់តែសម្បូរបែបជាងមុន។ បន្ថែមពីនេះអេក្រង់កម្សាន្តរបស់ Aion Y Plus 2025 គាំទ្រនូវប្រព័ន្ធតភ្ជាប់ Carlink/Hicar ដែលងាយស្រួលក្នុងការភ្ជាប់ជាមួយនឹងស្មាតហ្វូន។ 

ជាងនេះទៅទៀតវា ក៏គាំទ្រនូវប្រព័ន្ធ Navigation System ដែលមានសមត្ថភាពភាពក្នុងការបង្ហាញពីការរាប់លេខថយនៃភ្លើងចរាចរ traffic light countdown និងមុខងារជំនួយការបើកបរនៅក្នុងក្រុង Urban Driving ថែមទៀតផង។ សម្រាប់កៅអីវិញ គឺអាចកាចទៅក្រោយបានទាំងកៅអីជួរមុខ និងជួយក្រោយ ហើយកៅអីអ្នកបើកបរមានមុខងារម៉ាស្សា និងកម្តៅកៅអីផងដែរ។

ចំពោះមុខងារថ្មីៗមួយចំនួនទៀតដែលមាននៅលើ GAC Aion Y Plus 2025 មានដូចជាមុខងារកំនត់ល្បឿនតាមរថយន្តខាងមុខ  automatic following និង adaptive cruise រួមនឹងកាមេរ៉ាបង្ហាញជុំវិញរថយន្ត Exterior rearview mirrors ជាដើម។ ទៅលើអនុភាពកម្លាំងដំណើរការវិញ Aion Y Plus 2025 ត្រូវបានក្រុមហ៊ុនភ្ជាប់ប្រព័ន្ធដំណើរការជាមួយនឹងម៉ូទ័រអគ្គិសនីមួយ ដែលមានពីរកម្លាំងផ្សេងគ្នា គឺកម្លាំង 100kW និង 150kW។ 

ទោះជាយ៉ាងណាសម្រាប់ចំនុចពិសេសផ្សេងៗទៀត ដូចជា ទំហំកញ្ចប់ថ្ម រយះចម្ងាយបើកបរ កម្លាំងសាកភ្លើង និងមួយចំនួនទៀតរបស់ Aion Y Plus 2025 មិនទាន់ត្រូវបានបង្ហាញលម្អិតនោះទេ។ ទោះជាយ៉ាងណា GAC Aion Y Plus នឹងផ្តល់នូវអត្ថប្រយោជន៍ជាច្រើនដល់អ្នកទិញ ដែលអត្ថប្រយោជន៍ទាំងនោះរួមបញ្ចូលទៅលើការធានាថ្ម ការឧបត្ថម្ភធនជំនួសរហូតដល់ 26,000 យាន់ ការបញ្ចុះតម្លៃលើការធានារ៉ាប់រង 5,000 យ៉ន់ ជម្រើសនៃការបង់ប្រាក់គ្មានការប្រាក់ និងទិន្នន័យកម្សាន្តក្នុងរថយន្តដោយឥតគិតថ្លៃរយៈពេលមួយឆ្នាំ។

Aion Y Plus ស៊េរីឆ្នាំ 2025 នឹងបន្តដំណើរការដ៏រឹងមាំ នៅក្នុងទីផ្សាររថយន្តអគ្គិសនី ដោយផ្តល់ជូននូវការឌីស្សាញរូបរាងដ៏ទាក់ទាញ បច្ចេកវិទ្យាប្រើប្រាស់ទំនើប និងកញ្ចប់តម្លៃដ៏សមរម្យបំផុតសម្រាប់អ្នកទិញ៕