កាលពីម្សិលមិញនេះ ប្លុកបច្ចេកវិទ្យារបស់ប្រទេសចិនដែលមានឈ្មោះថា Digital Life ទើបតែបញ្ចេញនូវរូបភាពជាច្រើននៃសម្បកការពាររបស់ស្មាតហ្វូន Huawei P40 Pro ដែលរូបភាពគឺមានការខុសប្លែកពីសម្បកទូរស័ព្ទធម្មតា ព្រោះថា វាមានភ្ជាប់ជាមួយនឹងឡូហ្គោ Porsche។ សម្រាប់សម្បកទូរស័ព្ទនេះ គឺមានខ្សែឆ្នូតស្បែកដែលស្រដៀងគ្នាទៅនឹងការឌីស្សាញរបស់ស្មាតហ្វូន Mate 30 Pro RS Porsche នេះ។ ដូចអ្វីដែលយើងបានដឹងហើយនោះ ចំណុចល្អបំផុតរបស់ស្មាតហ្វូន Huawei P40 Pro គឺដោយសារតែកាមេរ៉ារបស់ស្មាតហ្វូននេះ។ មានការបញ្ជាក់ផងដែរនៅក្នុងព័ត៌មានចុងក្រោយបំផុតដែលមានការបង្ហាញនូវម៉ូឌុលកាមេរ៉ារបស់ស្មាតហ្វូននេះផងដែរ។
កាលពីពេលមុននេះ តាមការបញ្ជាក់នៅក្នុងរបាយការណ៍ជាច្រើន កាមេរ៉ារបស់ស្មាតហ្វូន P40 Pro នេះ នឹងមានការអាប់ដេតជាមួយនឹងកាមេរ៉ា 5 គ្រាប់ Leica ដ៏ស្រស់ស្អាតថែមទៀតផង។ កាមេរ៉ាគោលរបស់ស្មាតហ្វូននេះ គឺមានទំហំ 52MP ដែលមានការទ្រទ្រង់ជាមួយនឹងបច្ចេកវិទ្យា Quad Quad Bayer technology ថែមទៀត។ សម្រាប់សេនស័រនេះគឺមានទំហំ 1/1.3 inches ហើយវាមានការថតវីដេអូកាន់តែល្អប្រសើរថែមទៀតនៅពេលយប់។ ស្មាតហ្វូន P40 Pro នេះត្រូវគេរំពឹងថានឹងភ្ជាប់ជាមួយនឹងកាមេរ៉ាភ្លោះ prism periscope lens ជាមួយនឹងបច្ចេកវិទ្យា 10x optical zoom ថែមទៀត។
បន្ថែមពីនេះទៀតនោះ ពាក្យចចាមអារ៉ាមជាច្រើនបញ្ជាក់ថា ក្រុមហ៊ុនបច្ចេកវិទ្យា Huawei ឆាប់ៗនេះនឹងផ្ញើនូវស្មាតហ្វូន P40 Pro សម្រាប់ការធ្វើតេស្តរបស់ DxOMark ផងដែរ។ ស្មាតហ្វូន P series នេះគឺធ្លាប់ជាស្តេចកាមេរ៉ាថែមទៀតផងនៅលើវេបសាយនេះ។ ស្មាតហ្វូន P40 Pro នេះ នឹងមានភ្ជាប់ជាមួយនឹងអេក្រង់ដែលមានគែមកោងនៅលើជ្រុងទាំង 4 របស់វាជាមួយនឹងrefresh rate 90Hz។ ស្មាតហ្វូននេះ នឹងមានភ្ជាប់ជាមួយនឹងបន្ទះឈីប Huawei Kirin 990 5G SOC; ជាមួយនឹងការទ្រទ្រង់នូវ SA និង NSA dual-mode 5G ថែមទៀត។ សម្រាប់មុខងារជាច្រើនទៀតរបស់ស្មាតហ្វូន Huawei flagship នេះនឹងមានភ្ជាប់ជាមួយនឹងបច្ចេកវិទ្យា 40W wired flash charging, wireless flash charging និង reverse wireless charging។ស្មាតហ្វូន P40 នេះ នឹងមានភ្ជាប់ជាមួយនឹងបច្ចេកវិទ្យា Wi-Fi 6+ technology។ ស្មាតហ្វូន Huawei P40 series នេះ នឹងបង្ហាញខ្លួននៅថ្ងៃទី 26 ខែមីនាខាងមុខនេះ៕
