ក្រុមហ៊ុន Huawei ទទួលបានប៉ាតង់ថ្មីមួយទៀតសម្រាប់ស្មាតហ្វូន ដែលផ្តោតទៅលើការឌីស្សាញកាមេរ៉ាក្រោមអេក្រង់

មកទល់ពេលនេះ មានក្រុមហ៊ុនផលិតស្មាតហ្វូនជាច្រើនបានខិតខំប្រឹងប្រែងយ៉ាងខ្លាំងក្នុងការបញ្ចេញនូវស្មាតហ្វូនថ្មីៗ ជាច្រើនរបស់ខ្លួន ដែលមានអេក្រង់ពេញគែម។ ជាមួយនឹងការឌីស្សាញនៃគែម Bezels ស្តើង និង Notch នៅលើអេក្រង់ ហើយក៏ក្លាយជាអេក្រង់ Punch-Hole ឬកាមេរ៉ាផុសឡើងនៅលើអេក្រង់ជាបន្តបន្ទាប់។ ពេលនេះ គឺមានបច្ចេកវិទ្យាមួយ ដែលនៅមិនទាន់មានវត្តមាននៅលើទីផ្សារនោះទេ គឺបច្ចេកវិទ្យាកាមេរ៉ាក្រោមអេក្រង់។ ក្រុមហ៊ុន Huawei ប្រហែលជាក្រុមហ៊ុនដំបូងគេដែលបញ្ចេញនូវស្មាតហ្វូនដែលមានបច្ចេកវិទ្យានេះនៅក្នុងប៉ាតង់មួយរបស់ខ្លួន។

ក្រុមហ៊ុនបច្ចេកវិទ្យាយក្សរបស់ចិននេះ បានស្នើសុំនូវប៉ាតង់ចំនួន 2 នៅក្នុងឆ្នាំ 2019 ដែលក្រោយមកក៏បានចុះផ្សាយដោយ CNIPA (China National Intellectual Property Office) ផងដែរ។ នៅក្នុងប៉ាតង់នេះ រូបភាពផលិតផលចំនួន 7 គឺមានការបង្ហាញអំពីការឌីស្សាញរបស់វា។ ប៉ាតង់នេះ គឺមើលទៅមានភាពស្រដៀងគ្នា ហើយភាពផ្សេងគ្នាគឺទៅលើការឌីស្សាញផ្នែកខាងក្រោយរបស់វាប៉ុណ្ណោះ។ បើមើលទៅលើរូបភាពទាំងនោះ រូបភាពដំបូងរបស់ស្មាតហ្វូននេះ គឺមានការឌីស្សាញកាមេរ៉ាបញ្ឈរ 3 គ្រាប់ដែលមានភាពស្រដៀងគ្នាទៅនឹងស្មាតហ្វូន flagship P series របស់ក្រុមហ៊ុន Huawei។ កាមេរ៉ាពីរគ្រាប់ នៅក្រោមភ្លើង LED flash ។ 

ម៉ូឌែលទី 2 របស់វា គឺមានភាពស្រដៀងគ្នាទៅនឹងម៉ូឌែល Mate seriesដែលមានកាមេរ៉ា 4 គ្រាប់មានរូបរាងជារង្វង់។ ផ្នែកខាងមុខ និងផ្នែកចំហៀងរបស់ស្មាតហ្វូននេះគឺមានលក្ខណៈដូចគ្នា គឺមានអេក្រង់គែមកោង និងគ្មានកាមេរ៉ា Selfies នៅផ្នែកខាងមុខនោះទេ ដូចនេះ កាមេរ៉ាមុខអាចប្រហែលជាបង្កប់នៅក្រោមអេក្រង់នេះតែម្តង។ ក្រុមហ៊ុននេះ នៅមិនទាន់បញ្ជាក់ជាផ្លូវការនៅឡើយទេអំពីស្មាតហ្វូននេះ៕