នៅថ្ងៃនេះ មានសេចក្តីរាយការណ៌ថ្មីបាននិយាយថា ក្រុមហ៊ុន Sony បាននឹងកំពុងតែធ្វើការនៅលើសិនស័រកាមេរ៉ាដំបូងបំផុតដែលមានទំហំ 100MP ស្របពេលដែលក្រុមហ៊ុនបច្ចេកវិទ្យាជប៉ុនមួយនេះ នៅមិនទាន់បានបញ្ចេញនូវនូវព័ត៌មានស៊ីជម្រៅពីសិនស័រទំហំ 100MP នេះនៅឡើយទេ។ យោងតាមការទម្លាយចេញរបស់ Digital Chat Station ដែលមានប្រភពចេញពីប្រទេសចិននោះ គឺបាននិយាយថ សិនស័រថ្មីនេះ គឺមិនមែនប្រើប្រាស់នៅលើស្មាតហ្វូនថ្នាក់ប្រណិតនោះទេ គឺប្រើប្រាស់សម្រាប់ស្មាតហ្វូនថ្នាក់កណ្តាលប៉ុណ្ណោះ។ សូមជំរាបថា ក្រុមហ៊ុន Sony ពេលនេះ បានក្លាយជាអ្នកផ្គត់ផ្គង់បច្ចេកវិទ្យាកាមេរ៉ាសម្រាប់ក្រុមហ៊ុនធំៗជាច្រើន ក្នុងនោះមានដូចជា Apple និង Google ជាដើម។
អ្នកទម្លាយរូបនេះបានបន្ថែមថា សិនស័រ 100MP គឺជាបច្ចេកវិទ្យាថ្មីមួយដែលស្ថិតនៅក្នុងផ្នែកនៃសិនស័រ Sony’s IMX8 series ផងដែរ។ ជាមួយនិងគ្នានេះ ក្រុមហ៊ុន Sony ក៏បានបញ្ជាក់ពីការធ្វើការងារនៅលើសិនស័រ IMX9 Series ដែលជាបច្ចេកវិទ្យាថ្មីផងដែរ។ យ៉ាងណាមិញជាមួយនិងការបែកធ្លាយនេះ គឺនៅមិនទាន់មានការបញ្ជាក់ថា ស្មាតហ្វូនម៉ូដែលណា ដែលនឹងបំពាក់ជាមួយនិងសិនស័រថ្មី 100MP នេះនៅឡើយទេ។ សូមជំរាបថា IMX8 Series គឺបានបង្ហាញវត្តមានជាមួយនិងកាមេរ៉ាទំហំ 54MP 1/1.49 IMX800 sensor ដែលពេលនេះ គឺប្រើប្រាស់នៅលើ Honor 70 series។
បន្ថែមពីនេះ អ្នកទម្លាយរូបនេះ ក៏បានរាយការណ៌ថា Sony’s IMX9 series គឺនឹងមានការប្រើប្រាស់នូវកាមេរ៉ាទំហំ 50MP IMX989 Sensor ដែលមានទំហំ 1-inch ហើយអាចនឹងមានការបំពាក់នៅលើស្មាតហ្វូនជំនាន់ថ្មី Xiaomi 12 Ultra នៅក្នុងពេលឆាប់ៗនេះ។ ប៉ុន្តែបើមើលមកសិនស័រទំហំ 100MP នេះវិញ ក្រុមហ៊ុន Sony មានគោលដៅយកឈ្នះសិនស័ររបស់ក្រុមហ៊ុន Samsung ដែលទើបតែបង្ហាញចេញនូវសិនស័រទំហំ 200MP ISOCELL HP3 sensor កាលពីពេលថ្មីៗនេះ។ សូមជំរាបថា ក្រុមហ៊ុន Motorola ទើបតែទម្លាយថា ខ្លួននឹងបង្ហាញចេញនូវស្មាតហ្វូនដែលមានសិនស័រកាមេរ៉ាទំហំ 200MP ISOCELL HP1 នៅខែក្រោយនេះហើយ។ មួយវិញទៀតថ្មីៗនេះ នាយកប្រតិបត្តិរបស់ក្រុមហ៊ុន Sony ក៏ធ្លាប់បានបញ្ជាក់ថា កាមេរ៉ាស្មាតហ្វូន នឹងអាចយកឈ្នះកាមេរ៉ា DSLR នៅប៉ុន្មានឆ្នាំខាងមុខនេះផងដែរ។
