តាមការបញ្ជាក់របស់រដ្ឋមន្ត្រីលោក Piyush Goyal ក្រសួងពាណិជ្ជកម្ម និងឧស្សាហកម្មនៃប្រទេសឥណ្ឌា ដែលមានប្រសាសន៌កាលពីពេលថ្មីៗនេះ បានបញ្ជាក់ថា ក្រុមហ៊ុន Apple មានគម្រោងក្នុងការបង្កើនទៅលើការផលិតស្មាតហ្វូន iPhone ជាសកលរបស់ខ្លួននៅក្នុងប្រទេសឥណ្ឌាដល់ទៅ 25% ។ បច្ចុប្បន្ននេះ ក្រុមហ៊ុន Apple កំពុងតែផលិតនូវស្មាតហ្វូន iPhones ចន្លោះពី 5-7% នៅក្នុងប្រទេសនេះ នេះបើតាមការបញ្ជាក់របស់លោក Goyal ។
លោក Goyal បានសរសើរទៅលើការបោះជំហាននេះថា គឺជារឿងជោគជ័យមួយផ្សេងទៀតសម្រាប់សេដ្ឋកិច្ចនៅក្នុងប្រទេសនេះ។ បើទោះបីជាមានការប្រកាសនេះក៏ដោយ អ្នកនាំពាក្យរបស់ក្រុមហ៊ុន Apple បានធ្វើការបដិសេដទៅលើការអធិប្បាយនេះ។ ការពង្រីកនេះ គឺបន្ទាប់ពីមានការរៀបចំនូវការតម្លើងស្មាតហ្វូន iPhone 14 របស់ខ្លួនរបស់ Apple នៅក្នុងប្រទេសឥណ្ឌា ហើយនេះ គឺជាលើកដំបូងបំផុតដែលក្រុមហ៊ុននេះបានផលិតនូវស្មាតហ្វូនម៉ូឌែលចុងក្រោយបំផុតនេះនៅក្នុងប្រទេសនេះ។
ក្រុមហ៊ុន Apple បានធ្វើការផលិតស្មាតហ្វូន iPhones នៅក្នុងប្រទេសឥណ្ឌាចាប់តាំងពីឆ្នាំ 2017 ប៉ុន្តែ គឺផ្តោតទៅលើម៉ូឌែលជំនាន់មុនៗ។ ស្មាតហ្វូនជាច្រើនបានផលិតនៅក្នុងរោងចក្រ Foxconn របស់តៃវ៉ាន់ ហើយវាមានរោងចក្រនៅក្នុងតំបន់ Sriperumbudur។ នៅក្នុងការព្យាករណ៍ចេញពីអ្នកវិភាគជាច្រើនរបស់ JPMorgan បាននិយាយថា ក្រុមហ៊ុន Apple អាចផលិតនូវស្មាតហ្វូន iPhones សម្រាប់ទីផ្សារសកលដល់ទៅ 25% នៅក្នុងប្រទេសឥណ្ឌានៅត្រឹមឆ្នាំ 2025 នេះ។ នេះគឺជាដំណឹងដ៏ល្អនៃសេដ្ឋកិច្ចរបស់ប្រទេសឥណ្ឌា ខណៈពេលដែលក្រុមហ៊ុន Apple គឺជាក្រុមហ៊ុនបច្ចេកវិទ្យាធំបំផុតមួយដែលផ្តល់នូវទីផ្សារបច្ចេកវិទ្យាកម្រិតខ្ពស់នៅក្នុងប្រទេសឥណ្ឌា៕