យោងតាមព័ត៌មានថ្មីនៅថ្ងៃនេះ បាននិយាយថា ក្រុមហ៊ុន Huawei បាននឹងកំពុងតែអភិវឌ្ឍទៅលើផលិតផលថ្មីៗជាច្រើន។ ថ្មីៗនេះមានពាក្យចចាមអារ៉ាមជាច្រើន បាននិយាយអំពីស្មាតហ្វូនត្រកូល P-series និង Mate series ហើយក៏មានស្មាតហ្វូនដែលអាចបត់បានផងដែរ។ ពាក្យចចាមអារ៉ាមខាងលើនេះ នៅមិនទាន់បញ្ចប់នៅត្រឹមនេះទេ។ ប្រភពខាងលើនេះ បានបន្តថា ស្មាតវ៉ចថ្មីរបស់ក្រុមហ៊ុន Huawei នោះគឺមានឈ្មោះថា Band 9 ហើយថ្មីៗនេះ នាឡិកាឆ្លាតវៃនេះ ក៏មានវត្តមាននៅលើវិញ្ញាបនបត្រ SIRIM នៅក្នុងប្រទេសម៉ាឡេស៊ីផងដែរ។ ផ្អែកលើព័ត៌មានថ្មីនេះ មានការបញ្ជាក់ថា ស្មាតវ៉ចថ្មីនេះ នឹងបង្ហាញខ្លួននៅក្នុងទីផ្សារសកលឆាប់ៗនេះ។
សូមជំរាបថា SIRIM ដែលជាស្ថាប័នវាយតម្លៃស្តង់ដារគុណភាពសម្រាប់ទីផ្សារនៃប្រទេសម៉ាឡេស៊ីនេះ ទទួលស្គាល់នូវគុណភាពរបស់ស្មាតវ៉ច Band 9 នេះហើយ។ ការបញ្ជាក់ទទួលស្គាល់នេះ គឺធ្វើឡើងនៅថ្ងៃទី 6 ខែកុម្ភៈឆ្នាំ 2024 នេះ ហើយនាឡិកាថ្មីនេះ គឺមានលេខកូដ KIM-B19។ ប៉ុន្តែនៅលើវិញ្ញាបនបត្រនេះ នៅមិនទាន់ទម្លាយអំពីលក្ខណៈសម្បត្តិ ឬមុខងាររបស់នាឡិកានេះនៅឡើយទេ ស្មាតវ៉ច Band 9 នេះ នឹងក្លាយជាជំនាន់ថ្មីនៃស្មាតវ៉ច Band 8 ដែលបង្ហាញខ្លួនឆ្នាំមុននេះ។
គួរបញ្ជាក់ផងដែរថា ស្មាតវ៉ច Huawei Band 8 នេះ មានអេក្រង់ទំហំ 1.47-អ៊ីង AMOLED ហើយក៏មានបច្ចេកវិទ្យា Huawei TruSleep 3.0 sleep monitoring technology ដែលផ្តល់នូវភាពត្រឹមត្រូវ និងការជូនដំណឹងអំពីការគេងថែមទៀត។ បន្ថែមពីនេះ ស្មាតវ៉ចនេះ ក៏មានបច្ចេកវិទ្យា TruSeen 5.0 heart rate monitoring technology ដែលអាចវាស់ទៅលើចង្វាក់បេះដូងបានដល់ទៅ 7 ថ្ងៃបានយ៉ាងប្រសើរ។
ក្រៅពីការវាស់ទៅលើការគេង និងការវាស់ទៅលើចង្វាក់បេះដូងនោះ ស្មាតវ៉ច Band 8 នេះ មាន 100 sports modes, blood oxygen detection, women’s health tracking និងការវាស់ទៅលើកម្រិតស្ត្រេសថែមទៀត។ ស្មាតវ៉ចនេះ មានថាមពលថ្មប្រើប្រាស់បានដល់ទៅ 14 ថ្ងៃ ហើយនឹងអាចសាកថ្មពេញចាប់ពី 0 ទៅ 100% នៅក្នុងពេលតែ 45 នាទីប៉ុណ្ណោះ៕