យោងតាមព័ត៌មានថ្មីនៅថ្ងៃនេះ បានបង្ហាញថា ក្រុមហ៊ុន HMD នឹងមានការប្រកាសចេញនូវស្មាតហ្វូនជំនាន់ថ្មីរបស់ខ្លួន ដែលស្ថិតនៅក្រោមម៉ាកយីហោរបស់ខ្លួនហើយ។ បើតាមរបាយការណ៌ខាងលើបញ្ជាក់ថា យ៉ាងហោចណាស់ក៏មានស្មាតហ្វូនស៊េរីថ្មីចំនួន 9 ដែរ ដែលនឹងមានការសម្ពោធនៅលើទីផ្សារៅនៅពេលដ៏ខ្លីនេះ។ សូមជំរាបថា កាលពីពេលមុននេះ មានការបែកធ្លាយនូវរូបភាពថ្មីដោយមានការបង្ហាញនូវកាមេរ៉ាគោលដែលនឹងមានប្រើប្រាស់នៅលើស្មាតហ្វូនមួយក្នុងចំណោមស្មាតហ្វូនថ្មីនេះផងដែរ។ សម្រាប់ថ្ងៃនេះ គឺមានស្មាតហ្វូនថ្មីៗចំនួន 2 បន្ថែមទៀតបានបង្ហាញវត្តមាននៅលើបញ្ជី Geekbench ថែមទៀតហើយ។
នៅលើបញ្ជីរបស់ Geekbench នេះ បានបង្ហាញថា ស្មាតហ្វូនថ្មីៗទាំងពីរម៉ូដែលរបស់ក្រុមហ៊ុន HMD នេះ គឺមានឈ្មោះថា Legend និង LegendPro។ នៅក្នុងនោះក៏មានការបញ្ជាក់ពីរ៉េមនៅលើស្មាតហ្វូននេះផងដែរ។ ស្មាតហ្វូនទាំងនេះ គឺដំណើរការនៅលើបន្ទះឈីប Unisoc T606 ហើយសម្រាប់ម៉ូដែល Legend នឹងមានរ៉េម 4GB RAM និង LegendPro មានរ៉េម 8GB RAM។ ស្មាតហ្វូនទាំងពីររត់នៅលើប្រព័ន្ធប្រតិបត្តិការ Android 14។
គួរបញ្ជាក់ផងដែរ ថ្មីៗនេះក្រុមហ៊ុន HMD ក៏បានបញ្ចេញនូវព័ត៌មានរបស់ស្មាតហ្វូនរបស់ខ្លួនដែលមានការបំពាក់នូវកាមេរ៉ាទំហំ 108MP ដែលមានការគាំទ្រនូវមុខងារ OIS ផងដែរ។ បើតាមការទម្លាយចេញពីលោក Evan Blass នាពេលថ្មីៗនេះ ក៏បានចែករំលែកនូវឈ្មោះស្មាតហ្វូនរបស់ក្រុមហ៊ុន HMD នេះ ចំនួន 6 គ្រឿងថែមទៀត។ ក្រៅពី Legend និង LegendPro ស្មាតហ្វូនថ្មីៗនោះ នឹងមានឈ្មោះថា Pulse, Pulse+, PulsePro និង Legend។
ក្រុមហ៊ុន HMD ត្រូវបានគេដឹងថា នឹងមានការបង្ហាញវត្តមាននៅក្នុងព្រឹត្តិការណ៌ MWC 2024 ដែលរៀបចំនៅថ្ងៃទី 25 ខែកុម្ភៈខាងមុខនេះ។ ដូច្នេះស្មាតហ្វូនថ្មីៗទាំងនេះ នឹងមានវត្តមានៅក្នុងឱកាសនោះក៏ថាបាន។ ប៉ុន្តែនៅមិនទាន់ដឹងថា ក្រុមហ៊ុន HMD នៅបន្តប្រកាសចេញនូវស្មាតហ្វូនរបស់ Nokia ទៀតនោះទេ ខណដែលនៅឆ្នាំ 2024 នេះ ក្រុមហ៊ុននេះ នឹងមានការប្រកាសចេញនូវស្មាតហ្វូនថ្មីៗរបស់ខ្លួនចំនួន 17 ម៉ូដែល។
