ប្រទេសចិនបានធ្វើការបោះជំហានដ៏សំខាន់មួយទៀតឆ្ពោះទៅកាន់ការដឹកជញ្ជូនសម្រាប់ទីក្រុងស្អាតជាងមុនជាមួយនឹងដំណោះស្រាយនៃការសាកល្បងដ៏ជោគជ័យនៃរថយន្តដើរដោយថាមពលអ៊ីដ្រូសែនដំបូងគេបំផុតដែលបានអភិវឌ្ឍនៅក្នុងប្រទេសចិនតែម្តង។ ការតេស្តសាកល្បងជាប្រវត្តិសាស្រ្តនេះ បានធ្វើឡើងនៅព្រឹកថ្ងៃព្រហស្បតិ៍នេះ នៅក្នុងតំបន់ Changchun នៃខេត្ត Jilin។
នៅក្នុងការអភិវឌ្ឍដោយក្រុមហ៊ុន CRRC Changchun Railway Vehicles នោះ រថភ្លើងនេះ អាចធ្វើដំណើរបានល្បឿនដល់ទៅ 160km/h ជាមួយនឹងការផ្ទុកទំនិញថែមទៀតផង។ ការតេស្តជាមួយនឹងភាពជោគជ័យនេះ គឺជាការប្រើប្រាស់ដំបូងទៅលើបច្ចេកវិទ្យានៃថាមពលអ៊ីដ្រូសែនសម្រាប់ការដឹកជញ្ជូនតាមផ្លូវដែកនេះ។ ខុសប្លែកពីរថភ្លើងបុរាណនោះ ដែលផ្អែកនៅលើប្រេងឥន្ធនៈហ្វូស៊ីល ឬដំណើរការដោយខ្សែភ្លើងអគ្គិសនីនោះ រថភ្លើងថ្មីប្រកបដោយភាពច្នៃប្រឌិតនេះ គឺប្រើប្រាស់នូវប្រព័ន្ធថាមពលដំណើរការដោយអ៊ីដ្រូសែន។ ប្រព័ន្ធនេះ គឺផ្តល់នូវថាមពលខ្លាំងក្លា និងប្រើប្រាស់ថាមពលកម្រិត 5 គីឡូវ៉ាត់ម៉ោង។
រថភ្លើងនេះ អាចធ្វើដំណើរបានចម្ងាយលើសពី 1000 គីឡូម៉ែត្រ ដែលមានការកាត់បន្ថយទៅលើការប្រើប្រាស់នូវប្រេងហ្វូស៊ីលបានយ៉ាងច្រើន។ មុនការតេស្តសាកល្បងនេះ ប្រព័ន្ធអ៊ីដ្រូសែននេះ គឺបានតេស្តទៅលើភាពធន់ និងការធ្វើដំណើរចន្លោះសីតុណ្ហភាពពី -25°C ទៅ 35°C និងប្រព័ន្ធសុវត្ថិភាពផ្នែកអគ្គីភ័យថែមទៀត។ ការតេស្តនេះ គឺដើម្បីធានាទៅលើភាពធន់ និងសុវត្ថិភាពក្នុងប្រតិបត្តិការនៅលើរថភ្លើងនេះ។
ការដំណើរការសាកល្បងដ៏ជោគជ័យនេះ គឺជាព្រឹត្តិការណ៍ដ៏សំខាន់មួយសម្រាប់ឧស្សាហកម្មដឹកជញ្ជូនផ្លូវដែករបស់ប្រទេសចិនដែលមានការប្រើប្រាស់នូវបច្ចេកវិទ្យាអ៊ីដ្រូសែននេះ។ វាក៏រួមចំនែកក្នុងការសម្រេចបាននូវបច្ចេកវិទ្យាកម្រិតខ្ពស់ឯករាជ្យ និងការគ្រប់គ្រងទៅលើការអភិវឌ្ឍនៃសម្ភារៈនៃការដឹកជញ្ជូនកម្រិតខ្ពស់នោះ៕
