នៅក្នុងឆ្នាំនេះ ក្រុមហ៊ុន Apple មានគម្រោងនៅក្នុងការបង្ហាញនូវកាសស្តាប់ AirPods wireless ដ៏ពេញនិយមរបស់ខ្លួនជាច្រើន។ យោងតាមអ្នកវិភាគ Jeff Pu បានរាយការណ៍ថា ក្រុមហ៊ុនអាមេរិកាំងមួយនេះ មានគោលដៅក្នុងការបញ្ចេញនូវកាសស្តាប់ដែលមានតម្លៃសមរម្យក្នុងការប្រើប្រាស់។ បើតាមរបាយការណ៍ចេញពីលោក Pu គឺបានបញ្ជាក់ថា ការផលិតនេះ នឹងមានការពាក់ព័ន្ធទៅនឹងក្រុមហ៊ុន Foxconn ហើយក៏នឹងមានការតម្លើងនូវរោងចក្រមួយនៅក្នុងប្រទេសឥណ្ឌានៅចុងឆ្នាំ 2024 ខាងមុខនេះទៀតផង។
កាលពីពេលមុននេះ មានពាក្យចចាមអារ៉ាមជាច្រើន ដែលបានបានព្យាករណ៍ចេញពីលោក Mark Gurman ដែលជាជាអ្នកវិភាគរបស់ Bloomberg បានបញ្ជាក់ថា កាសស្តាប់ AirPods ថ្មីនេះ នឹងបង្ហាញខ្លួននៅក្នុងខែកញ្ញា ឬតុលាខាងមុខនេះ។ កាសស្តាប់នេះ គឺមានកូដហៅថា B768E និង B768M ដែលសំដៅទៅលើប្រភេទ ‘entry’ និង ‘mid-tier’។ លោក Gurman បាននិយាយទៀតថា ម៉ូដែលថ្មីនេះ នឹងមានការពង្រឹងទៅលើការឌីស្សាញយ៉ាងប្រសើរ គុណភាពសំឡេងខ្ពស់ និង USB C ថែមទៀតផង។
បន្ថែមពីនេះ កាសស្តាប់នេះ ក៏នឹងមានបំពាក់នូវមុខងារ active noise cancellation (ANC) និង speaker នៅក្នុង charging case ដើម្បីជួយក្នុងការតាមដានតាមរយៈការប្រើប្រាស់នូវកម្មវិធី Find My Location ផងដែរ។ សូមជំរាបថា មកដល់ពេលនេះ នៅមិនទាន់ច្បាស់នោះទេថា ម៉ូដែលថ្មីនេះ អាចជា AirPods ជំនាន់ទី 4 នោះទេ។ លោក Gurman បានទម្លាយទៀតថា ការផលិតទ្រង់ទ្រាយធំទៅលើកាសស្តាប់ AirPods 4 នឹងចាប់ផ្តើមនៅក្នុងខែឧសភានេះ តាមរយៈដៃគូរបស់ខ្លួន គឺក្រុមហ៊ុន GoerTek និង LuxShare Precision ជាមួយនឹងវត្តមានរបស់ស្មាតហ្វូន iPhone 16 series ផងដែរ។
ទាក់ទងនឹងរឿងនេះ ក៏មានពាក្យចចាមអារ៉ាមជាច្រើន និយាយពីការអាប់ដេតទៅលើកាសស្តាប់ AirPods Max ដែលគ្រោងនឹងបង្ហាញខ្លួននៅក្នុងត្រីមាសទី 4 ឆ្នាំ 2024 នេះដូចគ្នា។ កាសស្តាប់នេះ គឺមានពណ៌បៃតង ផ្កាឈូក ទឹកប្រាក់ ផ្ទៃមេឃ និងប្រផេះថែមទៀត៕